Albisteak

Pandemian sortutako enpresa berriei eta irabazi asmorik gabeko entitateei dirulaguntza berriak proposatu ditu EH Bilduk


2022koak osasun pandemia honetako hirugarren udal aurrekontuak izango dira. Azken bi urteetan pandemiak kaltetutako pertsona eta sektoreei erantzuteko udal Talka Planak martxan jarri eta gero, Talka Plan hauetan erantzunik jaso ez duten enpresa eta entitateentzako bi dirulaguntza berri proposatu ditu EH Bilduk.

| 2022-01-17 11:46:00

2022ko aurrekontuari egindako emendakinetan garapen ekonomikora 200.000€ gehiago bideratzea planteatu du EH Bilduk. Batetik, 100.000€ osasun pandemia honetan zehar sortu diren enpresa berriei dirulaguntza zuzen berezi baterako. Eta bestetik, beste 100.000€ pertsonala kontratatuta duten irabazi asmorik gabeko entitateei lagundu ahal izateko.

Sortu diren enpresa berri hauek udalak martxan jarri dituen bi Talka Planetako dirulaguntzetatik kanpo geratu dira, baina udalagandik ere begirune bat ere merezi dutela uste du EH Bilduk, zalantzaz betetako garai hauetan enpresa berriak sortzeko izan duten ausardiagatik.

Zer esanik ez irabazi asmorik gabeko entitateetaz ari garenean. Entitate hauek enpresak ez diren heinean, pandemiari lotutako ohiko dirulaguntza guztietatik kanpo geratu dira. Gainera, entitate hauetako askok une latzak bizi izan dituzte osasun pandemia honetan. Adibidez, osasun egoeragatik entitatea diruz finantziatzeko antolatu ohi izan dituzten ekintzak bertan behera utzi behar izan dituztenean. Gauzak horrela, udalak pertsonala kontratatuta duten irabazi asmorik gabeko entitateak ere diruz laguntzea proposatu du EH Bilduk.