AKTUALITATEA

| 2026-03-11 17:45:00

Petronorren jasandako azken istripuen ondorioz, otsailean Muskiz eta Abanto inguruan bizi izan ditugun gertakari larriak direla eta, gaur Meatzaldeko EH Bildutik gure haserrea eta kezka sakona adierazi nahi dugu.

Urte luzeetan petrolio-findegiko jardueraren osasunerako ondorio kaltegarriak jasan ditugu, baina euria ari du bustiaren gainean, eta orain gertatutakoa ez da beste bat gorabeheren zerrenda luze batean; aitzitik, aparteko larritasuna duen gertaera bat da, gure eskualdeko biztanleen osasun fisiko eta mentalari eragiten diolako eta arrisku potentzialak dituelako.

Ez gaude prest gutxi batzuen negozio partikularra lehenesteko, lurralde honetako biztanle guztien bizi-kalitatearen kontura.

Meatzaldeak denbora asko darama instituzioen utzikerian murgilduta, eskualdean trakzio politiko eta ekonomikorik gabe, ingurugiro-inpaktu handiko edo izaera logistikoko enpresak pilatzeaz gain, eredu argirik gabe. Izan ere, Meatzaldeak etorkizuneko apustu bat behar du, ingurumenarekin eta bizi-kalitatearekin bateragarria izango den industria-eredu aurreratu bat.

Kontua ez da osasuna edo ekonomia aukeratzea. Biak lortu nahi ditugu, eta horregatik beste behin ere Meatzaldean eta, bereziki eta modu iraunkorrean, Petronor enpresan gertatzen diren ingurumenaren aurkako jardunbideen aurka egiten dugu.

Petronorri ardura eskatuz, EH Bilduk bat egin zuen martxoaren 1ean, auzo ekimenak deitua, Petronorreko ateetan bukatu zen mobilizazio handiarekin. Erakundeen esparruan, EH Bilduk otsailaren 22ko gertakariari buruzko hainbat galdera erregistratu zizkion Osasun sailburuari, azterketa epidemiologiko bat eskatu zion, eta informazioa eskaru zion Industria sailburuari. Eragindako udaletan ere egin ditugu galderak. Otsailaren 26ko gasolio-tankean izandako gorabeheraren ondoren, Muskizen ohiko osoko bilkura egitea, Bizkaiko Batzar Nagusietan Natura Inguruneko diputatua eta Eusko Legebiltzarreko Osasun Publikoko zuzendaria agertzea eskatu genuen.

Ezin dugu onartu horrelako gertaerak normalizatzea. Herritarren osasuna negoziaezina da, eta administrazioei eskatzen diegu Petronorren gaineko kontrol zorrotzagoa ezartzeko eta gure bizilagunen segurtasuna bermatzeko. Gardentasuna, segurtasuna eta erantzukizunak eskatzen ditugu.