AKTUALITATEA

| 2023-10-23 12:11:00

EH Bildu udal taldeak urriko Osoko Bilkuran eztabaidatuko den mozio baten bidez,  Bilbobuseko lineak “ahalik eta lasterren” berregituratzea eskatzen du, “zerbitzua gure hiriak izan dituen aldaketa handietara egokitzeko”. Prozesu hori benetako parte-hartze prozesu baten bidez abiaraztea eskatu du alderdi soberanistak, langileen, auzo elkarteen eta erabiltzaileen inplikazioarekin, hain zuzen ere.

Maria del Rio EH Bilduko bozeramaileak azpimarratu duenez, berregituraketa hori "nahitaez langileen lan-eskubideak bermatuz egin behar da, plantilla osoa mantenduz, baita gure auzoetako egungo eta etorkizuneko beharrak eta erabiltzaileen aniztasuna kontuan hartuta". "Zerbitzu eraginkorra eta baliagarria nahi dugu bizilagunentzat. Une honetan, ez baitugu ", nabarmendu du, Karlos Renedo EH Bilduko zinegotziarekin batera Bilbon emandako prentsaurrekoan.

Klima aldaketari aurre egiteko hiriek duten "erantzukizuna" azpimarratu ondoren, gogorarazi du zuhaitzen babeserako eta bizikleta bidezko mugikortasunerako proposamenarekin batera, EH Bilduk Bilbobus hobetzeko eskatu duela, “mugikortasun jasangarria lortzeko, ezinbestekoa baita kalitatezko garraio publikoa izatea”.

Gogorarazi du hori ez dela "kezka berria" EH Bildurentzat; izan ere, 2021ean, alderdi sobiranistaren ekimenez, udal gobernuak hiri-lineak berregituratzeko azterketa bat egiteko konpromisoa hartu zuen. Hala ere, "bi urte igaro dira eta oraindik zain gaude", deitoratu du. "Herritarrekiko zor bat da, eta, beraz, premiazkoa da gai honi lehentasuna ematea eta lehenbailehen martxan jartzea", adierazi du.

Del Riok azpimarratu du “ezinbestekoa” dela berregituraketa hori benetako parte-hartze prozesu baten bidez egitea, eta horretan langileak, auzo-elkarteak eta erabiltzaileak inplikatuta egotea. "Haiek ezagutzen dute lehen eskuz zerbitzuaren funtzionamendua eta auzoen beharrak, eta, beraz, haien ekarpenak funtsezkoak dira zerbitzua hobe dadin".

Bizitegi-eremu berriak eta aldarrikapen historikoak

Bestalde, azpimarratu duenez, planteatzen duten berregituraketak "kalitatezko zerbitzua eman behar die San Inazioko Zarandoa etorbidea bezalako bizitegi-eremu berriei, baina, aldi berean, aldarrikapen historikoak ere jaso behar ditu, hala nola, auzo garaiak, Otxarkoagako goiko aldea, Peñascal, Deustuibarra edo Artxanda eta Santa Marina".

Bere esanetan, kasu batzuetan trazadura berriei buruz hitz egiten dute, baina kasu askotan maiztasunei buruz. Hori dela eta, Maria del Rioren hitzetan, “zerbitzuaren kalitatean eta langileen lan-baldintzetan arreta jarri behar dugu”. “Bilbobusen gabeziak asko dira, biztanleria gero eta zaharragoa baita, eta pertsona askok zailtasunak dituzte osasun-zentroetara, kiroldegietara edota ekipamendu desberdinetara heltzeko”, gaineratu du.

Greba

EH Bilduko ordezkariek ez dituzte Bilbobuseko langileak ahaztu nahi izan, gaur bertan greba egun batzuk hasiko baitituzte euren lan-baldintzak hobetzeko. “Bilbobus udal zerbitzua da eta Udalaren ardura da langileen baldintza duinak bermatzea, egun dauden lan postuei eutsiz”, azpimarratu du.

Azkenez, akordio bat lortzea espero dutela adierazi du Maria del Riok “behingoz Bilbobus egungo errealitatera eta bilbotarren benetako beharretara egokitzeko”.