María Solar EH Bilduko zinegotziak azaldu duenez, pertsona askok dute ikasteko gela batera joateko beharra, eta, ondorioz, gune horiek gainezka daude zenbait unetan. Azterketen garaian ez ezik, oposizioak bezalako beste proba batzuk daudenean, gune hauen beharra areagotzen da, laster gertatuko den bezala.
Pandemia egoera dela eta, ohiko gune hauen edukiera erdira murriztu behar izan da, eta ez dira nahikoa eskaria asetzeko. Hori dela eta, Solarren ustez, eskaintza zabaltzeko neurriak hartu behar dira, eta Barakaldon egokitu daitezkeen udal-guneak badaudela adierazi du: topalekuak, kirol-ekipamenduak, kultura-gelak eta hutsik dauden beste lokal batzuk jarri ditu adibidetzat. Solarrek adierazi du ez dela plangintzarik izan, eskualdeko beste udal batzuetan ez bezala, non salbuespenez, behin-behineko ikasgelak sustatu dira. Horrez gain, Udalak gela horiek irekitzeko beharrezkoak diren garbitzaileek edo atezainek dituzten gastuei aurre egiteko diru nahikoa duela esan du, eta oraindik iazko aurrekontuetako soberakina dagoela eta ezusteko gastuetarako partida berezi bat onartuta dagoela gogorarazi du: "Behar bati erantzuteaz gain, lanpostu berriak sortuko genituzke", azpimarratu du bozeramaile subiranistak.
Azkenik, Solarrek azpimarratu du pandemiaren aurretik ere horrelako leku gutxi zeudela Barakaldon. Beraz, "etorkizunera begira, auzoetan ikasgela gehiago jarri beharko lirateke, erabiltzen ez diren udal jabetzako lokalak gaituz".
