AKTUALITATEA

| 2023-12-28 17:56:00

EH Bilduk kezka azaldu du berriro ere Gobernu Taldea ez delako gai legegintzaldi honetako zeregin garrantzitsuenetako bati aurre egiteko, hau da, herrian emisio txikiko eremuak zehazteko. Maiatzaren 20ko 7/2021 Legearen arabera, eremu horiek ezartzeko neurriak 2023 amaitu baino lehen hartu behar zirela kontuan hartuta, eta Barakaldoko Udalean egindako 23/2023 ohiko bilkuran Gobernu Taldeak emisio txikiko eremuak ahalik eta lasterren ezartzeko konpromisoa berretsi zuela kontuan hartuta, galdera sorta bat egin diogu Osoko Bilkurari norabide horretan eman diren azken pausoei buruz eta Udalak arlo horretako agindua bete ez izanaren inguruko aurreikuspenei buruz.

Garapen Iraunkorraren eta Ingurune Naturalaren Arloak emandako erantzunek berriro erakusten dute Amaia del Campok zuzentzen duen Gobernu Taldea ez dela gai udal-kudeaketan aurkezten zaizkigun erronka garrantzitsuenei kaudimenez aurre egiteko. Horietako bat, eta gure ustez garrantzi estrategikoa duena, eremu ekosoziala da, zeinean erakundeek eta legezko araudiek Barakaldok gaur egun bete ez dituen hainbat betebehar ezarri baitituzte.

Emandako erantzunetan, gaur egun egiten ari diren gestioen berri ematen zaigu. Eremu horiek zehazteko behar diren azterlanak eta planak egiteko langile kualifikaturik ez dagoela esan digute. Jakinarazi digute Udaleko Giza Baliabideen sailak ez duela erantzunik eman beharrezko langile teknikoen eskaeraren aurrean, diagnostiko-azterlanak kontratatu berri dituztela eta abar.

Baina ez zaio galdera nagusiari erantzuten. Nola liteke Gobernu Talde hau, Osoko Bilkuran gehiengo osoa izanik eta baliabide ekonomiko nahikoak izanik, udalaz gaindiko eskakizunen mugara iritsi izana eta gaur egun beharrezkoa den plan hori egin ez dela ikustea?

Gogora dezagun atzerapen horrek, betebeharrak ez betetzeak Arartekoak eta El Defensor del Pueblok egoera hori salatzea eragin duela. Aurtengo martxoan, Arartekoa kezkatuta agertu zen gai horren inguruan, eta ofiziozko jardunari ekin zion. Gainera, hil honen hasieran jakin genuen El Defensor del Pueblok ere gure herriko Udala ikertzen duela atzerapenagatik.

Beste behin ere, Barakaldoko herritarrok EAJren eta PSEren kudeaketa kaskarraren biktima gara, ez baitira gai egoerak eskatzen duen mailan egoteko. Amaia del Camporen taldea da ezinbesteko behar honetan Barakaldo Estatuko udal berantiarrenen artean kokatu duena.