AKTUALITATEA

| 2026-06-25 10:51:00

Aldirietako C3 lineak pairatzen jarraitzen duen egoera larria salatu du gaur EH Bilduk, eta atzo Ollargan eta Bidebieta-Basauri artean izandako intzidentzia Hego Uribeko eta Aiaraldeko milaka pertsonarentzat funtsezko zerbitzu horrek jasaten duen etengabeko narriaduraren adibide berri bat dela adierazi du. Seinaleztapen-sistemetan izandako matxuraren ondorioz, zerbitzua eten egin zen, atzerapenak izan ziren eta errepide bidezko garraio alternatiboa egokitu behar izan zen kaltetutako erabiltzaileentzat.

EH Bilduren ustez, atzo gertatutakoa ezin da gertakari isolatutzat jo, baizik eta C3 lineak aspaldidanik dituen egiturazko arazoen beste adibide bat: etengabeko matxurak eta atzerapenak, trenak kentzea, erabiltzaileentzako informazio falta, irisgarritasun arazoak eta herritarren egungo beharrei erantzuten ez dien azpiegitura zaharkitua.

Koalizioak gogorarazi du C3 linea oinarrizko zerbitzu publikoa dela, eta milaka pertsonak egunero erabiltzen dutela beren lantokietara, ikasketetara, osasun-zerbitzuetara eta eguneroko jardueretara joateko. Horregatik, onartezina iruditzen zaio herritarren mugikortasunari eta bizi-kalitateari zuzenean eragiten dieten gorabeherak errepikatzen jarraitzea.

EH Bilduk Eusko Jaurlaritzari, Renferi eta ADIFi eskatu die erantzukizuna beren gain hartzeko eta modu koordinatuan jarduteko, tren-zerbitzu fidagarria, segurua eta kalitatezkoa bermatzeko. Ildo horretan, azpiegiturak eta seinaleztapen-sistemak berehala hobetzea eskatzen du, bai eta tren puntualak eta fidagarriak bermatzea ere.

Ekainaren hasieran, EH Bilduk iragarri zuen ekimen instituzionalak bultzatuko dituela udaletan, Batzar Nagusietan, Eusko Legebiltzarrean eta Diputatuen Kongresuan, eta, gainera, gizarte-mobilizaziorako dinamikak sustatuko dituela, erabiltzaileekin eta eragindako eragileekin batera.

Koalizioak uste du atzo izandako eraginak berriro ere agerian utzi duela premiazkoa eta irmoa den jarduera baten beharra. "Ezin dugu normalizatu seinaleen matxura batek zerbitzua geldiaraztea eta ehunka pertsonaren bizitza aldatzea. Herritarrek ez dute aitzakia gehiagorik behar; konponbideak behar dituzte ", adierazi du Laudiko Alkatea Ainize Gastaka.

Azkenik, C3 linea zerbitzu moderno, seguru, irisgarri eta kalitatezkoa bihurtzeko lanean jarraitzeko konpromisoa berretsi du EH Bilduk, eta Hego Uribek eta Aiaraldeak "beren beharren mailako garraio publikoa merezi" dutela defendatu du.