AKTUALITATEA

Makro datu zentroei muga jartzeko EH Bilduren proposamena babestu du Dulantziko Udalak.

| 2025-04-03 08:35:00

Makro datu zentroei muga jartzeko EH Bilduren proposamena babestu du Dulantziko Udalak. Horrela jasota zegoen EH Bilduk aurkeztutako mozio batean eta azken osoko bilkuran ekimena babes nahikoa izan zuen DTI eta EH Bilduren bozkei esker. EAJk kontra bozkatu zuen. Onartutako ekimenean,  Merlin Properties Arasurren eraikitzen ari den edo Solariak proiektatzen duen datu zentroen hedapena geldiaraztea eskatzen zen. Bi proiektuek, 825MW-ko guztizko ahalmenarekin, Araba osoko urteko kontsumo elektrikoa bikoiztuko lukete, Arabako lurraldeak kontsumitzen duen energiaren ekoizpenaren % 10era iristen ez denean.

Horregatik guztiagatik, Dulantzi-Egiletan onartu den ekiemean hipereskalako datu-zentro horiek baztertzen dira eta Eusko Jaurlaritzari eskatzen zaio zentro horien garapena muga dezala eta neurriak har ditzala datu-zentroen garapen orekatua gauzatzeko. Era berean, Eusko Jaurlaritzari eskatzen zaio neurriak har ditzan gure lurraldean ezar daitezkeen energia berriztagarria ekoizteko egitasmoek hipereskalako datu zentroak elektrikoki elikatu ez ditzaten.