AKTUALITATEA

| 2025-04-04 07:56:00

Asparrenako Udalak konpost-planta martxan jartzeko adostutako hitzarmena lehenbailehen sinatzeko eskatu dio Arabako Foru Aldundiari. Hala eskatu dio Udalbatzak atzoko bilkuran babestutako ekimen batean. Izan ere, dagoeneko amaitu dira Araian kokatuko den eta Arabako Lautadako eskualde osoari zerbitzua emango dion eskualdeko lehen konpost-planta eraikitzeko lanak, eta 20/2018 Foru Arauaren bidez onartutako Arabako Hiri Hondakinak Prebenitzeko eta Kudeatzeko Planarekin (2017-2030) bat datorrela.

Asparrenako Udalak martxan jartzeko behar den makineria ere erosi du. Guztira, Udalak 1,6 milioi euro inbertitu ditu azpiegitura horretan. Txelo Auzmendi alkateak azaldu duenez, ekimen honen bidez Arabako Foru Aldundiak "emandako hitza bete eta eraikuntza-lanen eta makinariaren zati bat finantzatzeko hitzarmena sinatu nahi dugu". Izan ere, ekarpen hori 350.000 eurokoa izango behar da, aurrekontu-partida jakin baten kontura.

Auzmendik gogorarazi duenez, konpostaje-planta hondakinen udal-politikaren barruan kokatzen da. Ildo horretan udalerrian sortutako biohondakinak zein Asparrena-Donemiliagako industrialdeetan eta Okiturriko industrialdean (Donemiliaga) kokatutako sortzaile handiak (jatetxeak) kudeatzeko tresna da. Baina hasieratik aurreikusten zen plantak eskualde-izaera izan zezakeela eta, horrela, Arabako Lautadako Kuadrillan sortutako biohondakinak kudeatu zitzakeela.

Kuadrilla honek Asparrena, Donemiliaga, Zalduondo, Barrundia, Agurain, Alegría-Dulantzi, Iruraiz-Gauna eta Burgeluko udalerriak hartzen ditu. Aurreikusitako dimentsionamendua nahikoa da udalerri horiei zerbitzua emateko eta bio-hondakinen tratamenduan hurbiltasun- eta autosufizientzia-printzipioari jarraiki. Eskualdeko konpostaje-plantaren kudeaketa Arabako Foru Aldundiaren, Asparrenako Udalaren eta Arabako Lautadako Koadrilaren arteko lankidetzahitzarmenaren bidez egin behar da. Arabako Lautadako zortzi udalerriak konpostaje-planta bat izatea da helburua. Gainera, biohondakinak konpost bihur daitezke, nekazaritzarako ongarri gisa erabil daitekeena. Tokiko enplegua ere sortuko du eta garraio-kostuak murriztuko ditu.