AKTUALITATEA

| 2025-04-03 08:30:00

Amarika aretoan erakusketa jardueraz haragoko arte sormen gune bat sustatzea ere eskatu diote Foru Aldundiari, sortzaileekin berekin elkarlanean

Araba. 2025-04-03 | EH Bildu Araba batzarkide taldeak “Sortzaileak” sariketa sortzea proposatu du, «sormenari eta sortzaileen lanari balioa emateko eta lanean jarraitzeko akuilu gisa». Mozio berean, Foru Aldundiari eskatu diote Amarika aretoan sortzaileen lana garatzeko zentro bat sustatzea, sortzaileekin berekin elkarlanean.

Amarika aretoari dagokionez, gaur publiko egin diren azken albisteen arabera Amarika Aretoan ez da ekintzailetza zentrorik irekiko eta, beraz, aretoa zabalik mantenduko da. Estitxu Martinez de Iturrate EH Bildu Arabaren batzarkideak azaldu duenez, «kultura azpiegitura kentzearen mehatxua bertan behera geratu da, baina Aretoak eta sektoreak dituzten erronka eta zailtasunek bere horretan diraute».

«Kulturaren bitartez pentsamendu kritikoa garatzen da eta, horrenbestez, gizarte hobe eta berdinzaleago bat eratu, batez ere oldarraldi erreakzionario betean gauden honetan». Ildo horretan, Martinez de Iturratek esan du horretarako ezinbestekoa dela Kultura Sailaren babesa eta bultzada.

Hala, gaur erregistratu duten mozioan, Foru Aldundiari eskatzen diote Amarika Aretoan artistentzako sormen gune bat sustatzea legealdia amaitu aurretik, kudeaketa eredua sektore artistikoarekin batera erabakita.

Horrekin batera, Diputazioari eskatzen diote “Sortzaileak” saria sortzea «sormenari eta sortzaileen lanari balioa emateko eta lanean jarraitzeko akuilu gisa». Sortzaileak sari honek hainbat arlo izango lituzke kontuan, EH Bilduk azaldu duenez: literatura eta grafika (komikigintza, gidoia, liburu ilustrazioa, entseguak…), arte eszenikoak (dantza eta antzerkia), arte plastikoak (eskultura, pintura, ilustrazioa), musika, arte bisual berriak (digitala, argazkilaritza, bideoartea…).

«Artisten garapen profesionala bermatzeko, sormena lantzeko eta goraipatzeko, ezinbestekoa da lanerako motibazioa lantzea, baita artisten prekarietateari aurre egitea ere. EH Bildu Batzarkide taldeak argi dauka kulturaren defentsa izan behar dela gure herrialdearen garapenerako tresna», esan du Estitxu Martinez de Iturratek.