AKTUALITATEA

EH Bildu pozik agertu da Batzar Nagusiek Gasteizko Mendiak parke natural deklaratzea eskatu dutelako

| 2025-04-03 11:00:00

EH Bilduren mozio bat eztabaidatu da gaur Jasangarritasuneko batzordean, Eusko Jaurlaritzari eskatzeko mendien babesean sakontzeko

Araba. 2025-04-03 | EH Bildu Araba batzarkide taldeak poza adierazi du Garapen Ekonomikoko eta Jasangarritasuneko Batzordean Gasteizko Mendiak parke natural deklaratzeko mozioa onartu delako gaur.

EH Bildu Arabaren mozio batean oinarrituta, parke natural deklaratzeari buruzko eztabaida egin dute gaur talde politikoek batzordean. Antzeko mezua zuen mozioa aurkeztu du PPk ere.

Arabako EH Bilduren batzarkide Xabier Valdorrek azaldu du gaur eztabaidatu den mozioaren zergatia: «Otsailaren 11n jakin genuen Eusko Jaurlaritzak abiatu duela prozesua Gasteizko Mendiak Parke Natural izendatu ordez, bertako Kontserbazio Bereziko Eremua handitzeko. Zentzu horretan, argi dago 2006an Gasteizko Udalak abiatutako prozesua betiko itxi nahi duela azken urrats honekin. Gauzak horrela, badirudi azkenean 13.300 hektarea baino gehiagoko eremu bat babestu ordez, 5.130 hektareako hedadurara iritsiko ez den zonaldea babes figura lausoago baten pean utziko duela, Parke Natural izendatzeko ahalegina betiko estaltzeko asmoz».

Beraz, gaurko mozioaren helburua zen inguruan dauden Babes Bereziko Eremuak eta ingurumen-balio handikoak parke natural izendapenean batzea, eta hala, babestutako eremua zabaltzea.

Era berean, Arabako Foru Aldundiaren, Gasteizko Udalaren eta Eusko Jaurlaritzaren sustapena eta koordinazioa ere eskatzen zuten mozioan, Gasteizko Mendiak ahalik eta lehen parke natural izan daitezen.