AKTUALITATEA

| 2025-12-05 11:11:00

Dokumentuak faltsutzearen ustezko delitua izango litzateke, besteak beste, alkateak Arabako Errioxako ADRn parte hartu baitzuen udalaren ordezkari gisa, osoko bilkuraren berariazko izendapena izan gabe

Laguardia. 2025-12-05 | Laguardiako Udaleko EH Bildu udal-taldeak txosten bat aurkeztu du gaur fiskaltzan, Laguardiako Udalean ustez egindako irregulartasunak jasotzen dituena. Zehazki, dokumentuak faltsutzearen balizko delitua litzateke, alkateak parte hartu baitu ADR-ren bileretan, udalaren ordezkari gisa. Kargu hori betetzeko, ezinbestekoa da udalaren osoko bilkurak izendatzea.

Angel Coca EH Bilduk Laguardian duen ordezkariak adierazi duenez, legegintzaldi honetan «hainbat jarduera egiten ari dira alkatea eta haren gobernu-taldea, eta, pertsona edo talde politiko bakoitzak legez egin dezakeen balorazio politikoa alde batera utzita, uste dugu legeditik kanpo daudela eta delituzkoak izan daitezkeela».

Txostenean jasotzen denez, 2024ko abenduan Laguardiako osoko bilkurak Arabako Errioxako Landa Garapenerako Elkarteari (ADR) atxikitzea erabaki zuen, baina ez zuen zehaztu nor izango zen ordezkaritza horretaz arduratuko zena. «Maiatzetik aurrera, gutxi gorabehera, alkatea zuzendaritza batzorde horretan parte hartzen hasi zen, udalaren ordezkari gisa, nahiz eta osoko bilkurak ez zuen inolako ordezkaririk izendatu. ADRko zerbitzu teknikoek irregulartasun horren berri eman zuten, eta alkateak ziurtagiri bat aurkeztu zuen. Ziurtagiri horren arabera, ADR-ren aurrean udalaren ordezkari izendatu zuten», azaldu du Angel Cocak.

EH Bilduk argudiatu du ziurtagiria ez duela Laguardiako Udaleko idazkari kontu-hartzaileak sinatu, haren aldi baterako ordezkoak baizik. «Itxura guztien arabera, alkateak itxaron egin zuen gure idazkariak oporrak hartu arte, bere ordezkoari ziurtagiri hori egiteko eskatzeko. Ziurtagiri horretan osoko bilkuran hartu ez diren erabakiak jasotzen dira, eta, beraz, ez da gertatutakoaren isla». «Gure ustez, ziurtagiri honen baldintzak –alkatearen oniritzia du, legeak eskatzen duen bezala– ez dira akats baten ondorio; aitzitik, alkateak erabat doluz zuzendu eta eragindako jarduera bati erantzuten diote, eta helburu bakarra du: alkatea Arabako Errioxako ADRko ordezkari gisa auto-izendatzea, osoko bilkurari udalaz gaindiko ordezkaritzak izendatzeko eskumena kenduz, horretarako gertaeren errealitatea faltsutuz, trafiko juridikoan zalantzarik gabeko eragina duen dokumentu publiko batean», argudiatu du EH Bilduk.

Eragozpenen txostena

Gainera, EH Bilduk Udalaren ustezko iruzurrezko kontratazio baten berri ere eman du. Udako hilabeteetan turismo-bulegoa indartzeko zerbitzua da. Kasu honetan ere, kontratua idazkari kontu-hartzailearen oporrak aprobetxatuz egin zen; izan ere, idazkariak aldez aurretik ohartarazi zuen ezin zela horrela kontratatu.

Kontratazioak erakunde publikoen kontratazioari buruzko hainbat lege eta araudi urratuko lituzke, bai lan-kontratuko langileenak, bai kanpoko zerbitzuenak, eta horregatik eman dio horren berri EH Bilduk Arabako Fiskaltzari.