AKTUALITATEA

| 2024-12-02 08:44:00

Aldundiak familiei jakinarazi die mendekotasun-maila handiko eta adin oso altuko egoiliarrak beste egoitza-zentro batzuetara eramango dituztela datozen hilabeteetan

Araba. 2024-12-02 | EH Bildu Araba batzarkide taldeak mozio bat erregistratu du Foru Aldundiari eskatzeko ez ditzala San Prudentzioko egoiliarrak beste zentro batzuetara eraman aldez aurretik euren senideekin adostu gabe. Hogei bat pertsona dira, oso adin aurreratukoak eta oso dependentzia altuak dituztenak.

Gasteizko San Prudentzio egoitzako erabiltzaileen senitartekoek EH Bilduri jakinarazi zioten euren senitartekoak laster beste foru egoitza batzuetara eramango dituztela, eta kezkatuta agertu ziren lekualdatze horiek euren senide egoiliarren osasun egoera kontuan hartu gabe egingo direla argudiatuz.

Claudia Venceslao EH Bilduko batzarkidea kezkatuta agertu da lekualdatze horiekin: «Familiek helarazi digute lekualdatze horiek senideentzat ekar dezaketen larritasuna eta beldurra. Ahultasun fisiko eta emozional izugarria duten adinekoei buruz ari gara».

EH Bilduk ekimena erregistratu du berehalako lekualdatze horiek pertsona horien buruko narriadura eta narriadura fisikoa eragingo dutela uste duelako, bereziki Alzheimerra, zahartzaroko dementzia edo inguruan egonkortasuna behar duten beste baldintza batzuk pairatzen dituzten pertsonena.

Horregatik, mozioak Arabako Foru Aldundiari eskatzen dio ados ez dauden familiekin adostu dezala San Prudentzio egoitzan bizi diren pertsona horien etorkizuna. Era berean, birkokatze-prozesuetan familien iritziak kontuan hartzeko eskatu diote Aldundiari, lekualdatzeak kaltetutako pertsonen ongizate-irizpideen arabera egiten direla bermatzeko, eta ez erabaki administratibo edo logistikoen arabera.

Era berean, EH Bilduk Gizarte Politiketako diputatuaren agerraldia eskatu du, San Prudentzio CIAMen bizi diren pertsonak beste egoitza-zentro batzuetara lekualdatzeari buruzko informazioa emateko eta kaltetuei eragingo dizkieten ondorioak baloratzeko.