AKTUALITATEA

EH Bilduk deitoratu egin du EAJk eta PSEk PP aukeratu izana lehentasunezko bazkide gisa

| 2024-06-27 11:13:00

Uste dute ez dela ona Araba «eskuinerantz eramatea», eta datorren ikasturteari begira politika publikoen norabidea aldatzea espero du

Araba. 2024-06-27 | Arabako EH Bildu batzarkide taldeak EAJk, PSEk eta PPk iazko aurrekontu luzatuaren osagarri izango den foru arauari buruz gaur iragarritako akordioaren balorazioa egin du.

EH Bildu Araba batzarkide taldeko bozeramaile Eva Lopez de Arroyabek balorazioa egin du akordioaren puntuen berri izan ondoren: «Uste dugu akordio hau ez dela ona, ez dituelako funtsezko gaiak jorratzen, hala nola energia modu deszentralizatuan eta demokratikoan sortzea, makrozefaliari eta lurralde osoan dituen etxebizitza-arazoei aurre egiteko neurriak edo zaintzen pribatizazioan sakontzea».

Lopez de Arroyabek uste du akordioak, gainera, ez duela ikuspegi global eta estrategikorik Arabak dituen erronkei irtenbidea emateko. «Helburu argirik ez duen foru-arau baten aurrean gaude; izan ere, loturarik gabeko hainbat partida dira, lurraldearen ikuspegi orokorrik eta epe luzekorik gabekoak».

Bozeramaileak gogorarazi du akordioa honek ezinezko egingo duela EH Bilduren proposamenak gauzatzea, hala nola plaza publikoak sortzea eta egoitza pribatuen hitzarmena konpontzea, Arabako nekazaritza eta abeltzaintzako sektorearen etorkizunari aurre egiteko txoke-plan bat, industrialdeen autosufizientzian aurrera egitea edo alokairu sozialeko etxebizitza publikoak birgaitzeko eta eraikitzeko tokiko erakundeen finantziazioa handitzea.

«Badirudi EAJk eta PSEk PP aukeratu dutela lehentasunezko bazkide gisa, fiskalitatean lortu dituzten akordioetan edo gaur iragarritako aurrekontu-itunean ikusi den bezala. Datorren ikasturteari begira, lurralde honetan sakoneko eztabaidak daude, eta ez da abiapuntu ona PPk lurralde honetako zerga- eta aurrekontu-politikak baldintzatzea», adierazi du bozeramaileak.

«PPrekin Arabak eta Arabakoek galdu egin dute. Ziklo aldaketa dagoeneko gertatu da Araban, eta horrek pertsonak politiken erdigunean jarriko dituzten politikak bultzatzea eskatzen du», amaitu du Eva Lopez de Arroyabek.