AKTUALITATEA

EH Bilduk baserriak zatikatu ahal izatea proposatu du, etxebizitza eskaera asetzeko

| 2025-04-04 11:09:00

Mozio bat aurkeztu du EH Bildu Okondo udal taldeak, baserriak hondatzea saihestu eta, hala, udalerriko etxebizitzaren eskariari aurre egin ahal izateko

Okondo. 2025-04-04 | EH Bildu Okondo udal taldeak mozio bat erregistratu du udaletxean, baserriak bi etxebizitzatan edo gehiagotan zatikatu ahal izatea eskatzeko. Aukera hori emateko, Udal Hirigintza Araudia aldatzea proposatu du EH Bildu udal taldeak, Egungo Udal Arau Subsidiarioek baserriak bereiztea eragozten baitute.

Aldaketa hori, gainera, lehenbailehen egitea eskatu du EH Bilduk, «Okondoko ondarearen narriadura denboran luza ez dadin, eta gure bizilagunen etxebizitza-premia estal dadin». «Okondoko baserriak, gure ondarea, hondatzen eta behera etortzen ari direla ikusten dugu, eta ezin dugu hori onartu», adierazi dute EH Bildutik.

Mozioan, Okondoko EH Bilduk Eusko Jaurlaritzari eta Arabako Foru Aldundiari eskatzen die «baserriak birgaitzeko laguntza-lerroak ireki ditzatela, jabetzako nahiz alokairuko etxebizitzen eskaintza arrazoizko prezioan zabaltzera bideratuko direnentzat».

Horrekin batera, EH Bilduk Okondoko udal gobernuari eskatu dio udal jabetzako etxebizitza egokitzeko lanak egitea, herritarren esku ipintzeko lehenbailehen. Horretarako, EH Bilduk Arabako Foru Aldundiaren obra txikiak egiteko hurrengo deialdian laguntza eskatzea proposatu du.