AKTUALITATEA

| 2026-07-02 09:49:00

Eskatu dute bi lurraldeetako aldundiek hitzarmen bat egin dezatela sei hilabeteko epean Bizkaiko Nerbioi Garaiko udalerrietan (Arrankudiaga-Zollo, Arakaldo, Orozko eta Urduña) bizi diren gaixotasun mentala duten pertsonak Arabako baliabideetan artatzeko

Araba. 2026-07-02 | EH Bildu Araba batzarkide taldeak mozio bat erregistratu du, zeinaren bidez Arabako eta Bizkaiko aldundiei eskatzen baitzaie hitzarmen bat sina dezatela Aiaraldeko eskualdeko Bizkaiko udalerrietan bizi diren pertsonak Aiaraldean osasun mentala artatzera bideratutako baliabideetan eta zerbitzuetan artatu ahal izateko. Horrela, Arrankudiaga-Zollo, Arakaldo, Orozko eta Urduñan bizi diren pertsonek beren etxeetatik gertuagoko zerbitzu horiek erabil ditzakete.

Aiaraldea eskualde naturala Arabako eta Bizkaiko udalerriek osatzen dute. Hala ere, gaur egun, ASASAMek kudeatzen dituen eta gaixotasun mentala duten pertsonei bideratutako okupazio-zentroa eta etxebizitza komunitarioa bezalako zerbitzuak Arabako udalerrietan bizi diren pertsonek baino ezin dituzte erabili, eta horrek desberdintasun-egoera sortzen du eskualde bereko Bizkaiko udalerrietan bizi diren pertsonentzat.

Eva Lopez de Arroyabe EH Bildu Araba batzarkide taldeko bozeramaileak azaldu duenez, «muga administratibo horrek urruneko baliabideetara mugitzera behartzen ditu pertsona batzuk, oinarrizko zerbitzuetarako sarbidea zailduz eta haien eta haien familien bizi-kalitateari kalte eginez. Horren aurrean, Araban kokatuta dauden hurbileko baliabideak eskuratzeko aukerak hobekuntza nabarmena ekarriko luke arretari, komunitate-sustraitzeari eta gizarte-zerbitzuen sistema publikoaren eraginkortasunari dagokienez».

Lopez de Arroyabek sen ona eskatu du egoera horren aurrean: «Administrazio publikoetako erakundeen arteko koordinazioa funtsezkoa da herritarren beharretara egokitutako arreta ekitatiboa, hurbila eta egokia bermatzeko, batez ere, Aiaraldea bezalako eskualdeetan, gizarte- eta lurralde-errealitate bat partekatzen baitute, administrazio-mugetatik haratago».

«Administrazio-mugek ez lukete ekarri behar zerbitzuak kaltetzea. Beraz, herri-administrazioen zeregina eta betebeharra da herritarrei zerbitzu-eskaintza bera emateko beharrezko urratsak ematea», amaitu du Eva Lopez de Arroyabek.