AKTUALITATEA

Gobernu taldeak aurkeztutako hasierako zirriborroari, egun batzuetako elkarrizketen ondoren, alderdi jeltzalearen proposamen batzuk gehitu zaizkio, besteak beste, kirol gunean kalestenia zirkuitu bat jartzea, Kulturetxean larrialdi irteera bat aztertzea eta tokiko elkarte baten dirulaguntza izendun bat handitzea.

Obra publikoaren arloan, Presalde, Elizalde eta Germán María Landazabal kaleetako azpiegitura-lanak amaitzeko iaz hartutako konpromisoak jasotzen dira, baita kultura-ondareari lotutako obrak ere, Marutegiko gaztelua sendotzeko prozesuaren azken fasearekin batera, 81.000 euro bideratuko baitira horretarako.

Era berean, 50.000 euroko zuzkidurarekin, Araiako Herriko Plazako eraikina, Gizarte Zerbitzuetarako erabiltzen dena, eta Udaletxea bera hobetzeko berrikuntzak egingo dira irisgarritasunaren eta espazioen banaketaren arloan, teknikariak birkokatzeko eta jendeari arreta emateko bulegoetako lan-baldintzak hobetzeko.

Obren arloan ere, oraingoan helburu sozialekin, eta behin proiektua eskura dagoenean, hasierako 15.000 euroko partida bat aurreikusten da, gazteentzako alokairurako erabiliko den erdiguneko eraikin bat egokitzeko prozesuarekin hasteko.

90.000 euro baino gehiago bideratuko dira Ingurumen Sailera hiriko hondakin solidoen gaikako bilketa abian jartzeko.

Tokiko merkataritza apurka-apurka desegiten ari delako kezkaren ondorioz, 6.000 euroko partida bat prestatu da udalerrian jarri nahi diren saltoki berriak sustatzeko eta diruz laguntzeko.

Aurrekontuak 15.000 euroko partida bat ere jasotzen du, Araiako erdigune batean estalitako espazio publiko baten proiekturako. Herri Eskolan urtero egin beharreko konponketak, haur-parkeak berritzea edo industrialdeko bideak eta espaloiak pixkanaka mantendu eta konpontzea, urtero aurrekontuaren zati handi bat izaten da, 70.000 €baino gehixeagorekin.

Kultura arloan, dirulaguntza izendunek gorakada nabarmena izan dute elkarte- sareak udalerrian egiten dituen jardueren garapena bermatzeko. Jarduera horietan, Andra Mari Zinema Elkarteak eta Germán María Landazabal Elkarteko Abesbatzak eta Bandak, hurrenez hurren, zinearekin eta musikarekin jarraitzearen aldeko apustua egin da bereziki.