Pernando Barrenak Caparrosoko behi haztegiari buruz galdetuko dio Europako Batzordeari
| 2021-03-31 11:14:00
EH Bilduko Pernando Barrena europarlamentariak Europako Batzordeari zuzendutako galdera bat erregistratu du, “Caparrosoko etxaldearen egoerari” buruz duen iritzia ezagutzeko.
Era berean, honako hau ere galdetu du: “Nafarroako Gobernuak emandako ingurumen-lizentziak animalien tratamendu eta ongizateari, hondakinen tratamenduari eta abeltzaintzako ustiategiei buruzko legeriari (makroustiapenak, esaterako) buruzko Europako araudia errespetatzen duen”.
EH Bilduk ohar batean gaitzetsi duenez, “onartezina da behi haztegiak bere ustiapena bikoiztu ahal izatea, Foru Gobernuak berriki emandako azken lizentziari esker; izan ere, horrek ingurumenean dagoeneko dituen ondorio kaltegarriak, erraz egiazta daitezkeenak, bikoiztu egingo ditu”.
Alde horretatik, EH Bilduren esanetan, “Greenpeacek eta beste erakunde batzuek salatu dute Caparrosoko behi haztegiaren egoera, eta agerian jarri dituzte enpresaren praktika txarrak”.
Hala, EH Bilduren ustez, premiazkoa da abiaraztea “animaliak bai eta gure ingurumena ere arrisku larrian jartzen dituzten gehiegizko abeltzaintza-jarduerak mugatuko dituen legedia”.
EH Bildu Nafarroak Covid-19 Hezkuntza Foroa sortzea proposatu du, ikasturte hasieran elkarrizketa eta akordioa bultzatzeko
| 2020-08-17 13:39:00
EH BILDU-Nafarroa Talde parlamentarioak zuzenketa bat aurkeztuko dio Nafarroako Parlamentuan laster eztabaidatuko den Normaltasun berrirako trantsizio planaren 3. fasea gainditu ondoren koronabirusaren osasun-krisiari aurre egiteko ezohiko prebentzio-neurriak onartzen dituen Foru Lege Proiektuari. Zuzenketa horren bidez, foru lege hori onartzen denetik astebeteko epean gehienez ere, Nafarroako Gobernuak foru agindu bidez COVID-19 Hezkuntza Foroa eratzea proposatuko du.
Foro horretan, Hezkuntza eta Osasun Departamentuak eta hezkuntza-komunitateko eragile guztiek ordezkaritza izango dute. Gune horrek, alderdi politikoaren arabera, "ziurgabetasunez beteriko ikasturteari aurre egiteko funtsezko tresna izan behar du, inoiz baino garrantzitsuagoa baita hezkuntza-komunitate osoak ikuspegi bera izatea, eta Nafarroako Gobernuari dagokio elkarrizketan eta akordioan aurrera egitea ahalbidetuko duen topagunea sustatzea".
EH Bildu-Nafarroak kezkaz ikusi du nola Nafarroako irakaskuntzan ordezkaritza duten sindikatu guztiek adierazi duten 20-21 ikasturtearen hasierarako Nafarroako Gobernuak aurkeztutako prebentzio eta antolaketa protokoloak ez diola erantzun nahikoa eta egokia ematen ikasgeletara modu seguru eta eraginkorrean itzultzeko erronkari, eta ziurtatu du protokolo hori ez dela adostu eta ez direla kontuan hartu hezkuntza komunitateko eragileen ekarpenak.
Horrexegatik, proposamen honen bidez sortuko litzatekeen foroak, taldeak azaldu duenez, "Hezkuntza-foroari hainbat funtzio esleituko lizkioke, hala nola egoera epidemiologikoa aztertzea ikasgeletara itzultzeari dagokionez, 2020-2021 ikasturtearen hasierarako protokoloa berrikustea eta egokitzea, eta osasun, antolaketa, pedagogia eta afektibo-emozio ikuspegitik beharrezkoak diren neurriak adostea, aurrez aurreko ikasturteari ekiteko behar diren baliabide materialak eta kontratazioak aurreikusiz eta segurtasuna eta ratioak jaistea lehenetsiz. Horrez gain, foro horrek osasun-egoeraren eta hezkuntza-egoeraren aldizkako jarraipena egingo luke ikasturte osoan, eta giza baliabideen eta baliabide materialen arloko beharrak aztertuko lituzke, segurtasuna, hezkuntza-kalitatea, aniztasunaren arreta eta ekitatea bermatzeko”.
Alderdi politikoak gogorarazi du, halaber, Nafarroa Suspertu Planean sartzeko proposamenen eztabaida parlamentarioan aho batez onartu zela EH Bilduk proposatutako ebazpen bat, non Nafarroako Gobernuari eskatzen zitzaion irailean izan zitekeen egoera epidemiologikoan oinarrituta hartu beharreko neurriak Nafarroako hezkuntza-komunitatearekin adosteko eta gure errealitateari erantzungo zion kontingentzia-plan bat egiteko. Ebazpenak, gainera, kontingentzia-planak izan beharko lituzkeen hainbat ezaugarri biltzen zituen, hala nola, ratioen jaitsieraren aurreko kontratazioaren aurreikuspena.
Taldearen arabera, "Hezkuntza Departamentuak modu proaktiboan entzun behar du ikastetxeetan bizi den errealitatea, eta haien ekarpenak jaso behar ditu, ikastetxeko ikasle guztien segurtasuna eta hezkuntza- eta emozio-beharrak erdigunean jartzeko. Horretarako, beharrezko baliabide guztiak erabili behar ditu, eta pandemia- eta konfinamendu-egoerek eragindako zailtasunei buruzko irakaspenak atera dituela ikusarazi".
Osasungintzako kontseilariaren premiazko agerraldia eskatu du EH Bilduk
| 2020-08-14 11:06:00
Nafarroako EH Bildu Talde Parlamentarioak eskaera bat erregistratu du Santos Indurain Osasun kontseilariak premiazko agerraldia egin dezan Parlamentuan, “egoera epidemiologikoaren eta sanitarioaren berri emateko”.
EH Bilduren ustez, "premiazkoa da foru Exekutiboak uda honetan bizi dugun egoerari buruzko informazio argia ematea, baita kutsatzeak goiz detektatzeko eta Lehen Mailako Arreta eta ospitaleko eremuan osasun-arreta emateko gaitutako baliabideei buruzkoa ere". Era berean, "beharrezkoa da jakitea zer aurreikuspen egiten duen Departamentuak udazkenaren hasierarako birusaren eraginari buruz, eta zer neurri beharko liratekeen".
Ildo horretan, koalizio subiranistak Carlos Gimeno Hezkuntza kontseilariaren agerraldia ere eskatu du, "2020-2021 ikasturtearen hasierari buruzko protokoloaren berri eman dezan, baita hezkuntza-komunitateko eragileekin duten adostasun-mailaren eta segurtasuna, ekitatea, aniztasunaren arreta eta hezkuntza afektibo-emozionala bermatzeko gaitutako baliabideen berri eman dezan ere".
EH Bilduren arabera, "ikasturte berri baten atarian gaude eta, COVID-19ren intzidentzia datuen bilakaera kontuan hartuta, ez da panorama erraza aurreikusten". Hori dela eta, "ezinbestekoa da Gobernuak bere aurreikuspenen berri ematea eta osasun- eta hezkuntza-sektoreetako eragile sozial, sindikal eta politiko guztiekin lan egitea, etorkizuneko berragerraldiei aurre egiten eta haien ondorioak arintzen lagunduko duten neurrien planak egiteko".
EH Bildu Berriozar, pozik euskara eskakizuna duen deialdi publikoa babesten duen ebazpenarekin
| 2020-08-07 11:19:00
EH Bildu pozik agertu da Berriozarko Udaleko Obra eta Zerbitzuen Buruzagitza lanposturako lehiaketa-oposizioaren deialdiari Navarra Sumako zinegotzi Daniel Cuesta Castañedak jarritako gora jotzeko errekurtsoa gaitzetsi duelako Nafarroako Adiministrazio Auzitegiak, eta "EH Bilduren jarrera babestu" duelako.
EH Bilduk hasieratik defendatu duen bezala, ebazpen judizialaren arabera, "egungo plantilla eskubide osoz onartu zen eta P4 (euskara) hizkuntza eskakizuna izateko baldintza legal guztiak betetzen ditu". Ildo horretan, ebazpenak dioenez, "EH Bilduk uneoro defendatu duen bezala, deialdiak ezin du plantillaren hizkuntza-eskakizun desberdina izan, eta, beraz, ezin da errekurritu".
Gainera, EH Bilduk nabarmendu duenez, "Berriozarko Udaleko Euskara Sailak txosten bat egin zuen lanpostu horrek euskara derrigorrezkoa izateko arrazoiak azaltzeko eta argudiatzeko". Eta udal taldeak gogorarazi duenez, "txosten hori behin baino gehiagotan igorri egin zaio Navarra Sumari".
Halaber, EH Bilduk gogorarazi duenez, "deialdia hainbat aldiz eraman da auzitegietara aurretik, eta kasu guztietan Berriozarko Udalaren aldekoa izan da ebazpena".
EH Bilduk Espainiako Gobernua eta Udal eta Probintzien Federazioaren arteko akordioa gaitzesten du
| 2020-08-05 10:55:00
EH Bilduk gogor gaitzetsi du Espainiako Gobernuak eta Espainiako Udalerrien eta Probintzien Federazioak atzo lortutako akordioa, tokiko erakundeek euren superabita Estatuari emango diotela dioena, eta erabaki horretan atzera egiteko exijitu du. Tokiko erakundeek "COVID-19ren krisiaren ondorio sozialak arintzera bideratutako politika publikoetarako soberakina eduki ahal izatea" eskatu du; maiatzaren 20an EH Bilduk, PSOEk eta Unidas Podemosek Madrilen sinatutako akordioan jasotzen zen bezala. Horrenbestez, sinatutako akordioa "bete egin behar da, eta ez da bateragarria atzo hartutako erabakiarekin".
Alderdi politikoak, gainera, "PPk eta UPNk onartutako Aurrekontuen Egonkortasunerako Legea makillatzeko PSOEk egindako ahalegina" dela uste du, "erabateko zentralizazioa ekarri duena, udalen autonomiaren aurkako erasoa eta zorra ordaintzeari lehentasuna ematea, herritarren beharren gainetik, Espainiako Konstituzioaren 135. artikuluan ezarritako betebeharra". EH Bilduk kritikatu egin du PSOEk Montoro Legea eta Konstituzioaren 135. artikulua indargabetzeko "borondate politikorik ez izatea", “ezta egungo testuinguruan ere, non erakundeek eta udalek, bereziki, behar sozial eta ekonomikoei aurre egiteko baliabide guztiak behar dituzten, kohesio soziala ziurtatzeko, tokiko ehun produktiboa sendotzeko, langabezia murriztuko duen jarduera ekonomikoa sortzeko eta okerren pasatzen ari direnei laguntzeko ". Hori dela eta, "berehala indargabetzeko" eskatu du.
Azkenik, EH Bilduren ustez, Espainiako Gobernuak eta FEMPek "gutxietsi egin dituzte Nafarroak toki-araubidean dituen eskumen historikoak, bereziki tokiko ogasunei dagozkienak; izan ere, Nafarroako udalek ez lizkiokete inolaz ere beren superabitak Estatuko Gobernuari utzi beharko". Ildo horretan, alderdi subiranistak ziurtatu du udaletan eta ordezkaritza duen gainerako eremuetan lan eginen duela "udalen autonomia aldarrikatzeko eta subiranotasun ekonomiko osoa lortzeko bidean aurrera egiteko, Nafarroako erakundeek diruzaintzako soberakinak nola eta zertan erabili behar dituzten erabakitzeko".