AKTUALITATEA

EH Bildu kezkatuta agertu da Gedemelsan gertatutakoarekin

| 2025-02-26 13:22:00

Mikel Kolomo, EH Bilduk Lizarrako Udalean duen bozeramailea, kezkatuta agertu da Gedemelsa sozietate publikoan gertatutakoagatik, Fran Moleon zinegotzia dimititzera eraman duena. "Gertatu den guztiak kezkatzen gaitu. Diru publikoaz eta diru hori kudeatzeko moduaz hitz egiten ari gara, Lizarrako herritarrena da diru hori", adierazi du bozeramaile abertzaleak gaur Ega hiriko Udalean egindako Bozeramaileen Batzordearen ostean.

Era berean, Kolomok "gardentasun handiena" eskatu dio gobernu-taldeari, "gertatutakoa eta horren ondoriozko balizko erantzukizunak argitzea ahalbidetuko duten informazio eta elementu guztiak izateko".

Azkenik, EH Bilduko bozeramailea kezkatuta agertu da UPNren gobernu taldearen kudeaketarekin. "Egoera orokorra oso kezkagarria da. Gobernu-taldea kudeatzeko ezintasunak paralisia eragin du, eta honek eragin larria du hirian. Herritarren beharrei erantzun beharrean, azken hilabeteetan Lizarrak albiste negatiboak baino ez ditu sortzen ".