Traducción automática: https://batua.eus
Duela urtebete hasi zen lanean udalbatza berria eta lehenengo osoko bilkuran udalaren antolaketa nolakoa izango zen erabaki zen. Guk elkarlana sustatzeko antolamendua proposatu genuen (ardurak zinegotzi guztien artean banatuz, informazio batzordeak eztabaidarako gune bihurtuz….) baina EAJ/PNVk ez zituen gure proposamenak onartu eta bere ohiko ereduari eutsi zion. Urtebete igaro eta gero, gure ustez udalean ez da elkarlanik egon, EAJ/PNVk ez duelako horretarako borondaterik izan eta gaiak eta proiektuak elkarrekin lantzeko fororik ez delako egon. Eztabaidarako gune izan beharko liratekeen Informazio Batzordeak Osoko Bilkuran onartu beharreko irizpenak emateko besterik ez dira bildu eta ordurako EAJ/PNVk erabakia hartuta izaten du eta aldaketak egitea oso zaila izaten da (izaera bereziko higiezinen zerga adostea, Armintzekaldeko aparkalekua handitzeko proiektua ez egitea eta aurrekontuetan 16.000 €-ko diru partidak adostea izan dira salbuespenak).
Hainbat gai elkarrekin lantzeko prozesuak abiatzea proposatu genien azaroan. Besteak beste:
- Urizarko tabernaren eredua
- Kofradiaren proiektua
- Udal lokalen erabilera
- Trafiko eta aparkaleku arazoak
- Txorrope bainurako arautzea
- Euskararen erabilera eta euskara ikasteko diru-laguntzen ordenantza
- Zergen ordenantzetan hobariak eta errekargoak
- Garraio publikoa
- Hondakinen bilketa eta kudeaketa
- ...
Hala ere, gai hauei buruz edota EAJ/PNVren intereseko beste gai batzuei buruz ideiak partekatzeko eta eztabaidatzeko mekanismorik ez da martxan jarri.
Adibide gisa aipagarria da udan Armintzako trafikoa eta aparkamendua arautzeko egin genuen proposamenarekin gertatutakoa. Elkarrekin lantzeko asmorik ez zutela ikusi genuenean, proposamena prestatzeari ekin genion. Proposamena maiatzean aurkeztu genien eta nahiz eta aztertuko zutela agindu, oraindik ez dugu erantzunik jaso.
Urizarko tabernaren inguruan hainbat aldiz eskatu dugu bilera bat tabernaren proiektuaz eta ereduaz hitz egiteko. Oraindik ez dugu bilerarik izan.
Gizartegintza eta Berdintasun gaiei buruzko Informazio Batzordea ez da urte osoan bildu, ezta Martxoak 8an egin zen ekitaldia antolatzeko. Egun horretan udalak ekitaldi bat antolatu zuen, baina EH Bilduko zinegotziak ez genuen ez abisurik ezta gonbidapenik jaso.
Elkarlana ahalbideratuko duen funtzionatzeko modua hobetzeko asmoz, azken Osoko Bilkuran Informazio Batzorde bakoitzak bere planifikazioa egitea eskatu genuen. Hau da, jorratuko dituen gaiak erabaki ondoren, bileren formatua eta maiztasuna zehaztuz egutegia egitea eta partaide guztien artean gaiak lantzea. Erantzunaren zain gaude.