AKTUALITATEA

Leioako Udaleko Osoko Bilkurak aho batez onartu ditu Lamiakoko posta-bulegoa irekitzeari eta Plentziarako norabidean metroaren maiztasuna handitzeari buruzko bi mozio.

| 2024-04-29 18:44:00

EH Bilduk bi mozio proposatu zituen apirilerako: bata, Lamiakon Posta Bulegoa irekitzeari buruzkoa, hilabeteak daramatzana itxita, eta bestea, Metro Bilbaori Plentziarako bidean metroen maiztasuna handitzeko eskatzeko.

Lehenengo mozioari dagokionez, irailean, auzoko posta bulegoa ixteagatik EH Bilduri auzokideek kexak helarazi ondoren, Udalean mozio bat aurkeztu genuen. Lurralde Batzordean jakinarazi ziguten, Alkatetza arduradunekin harremanetan jarri ondoren, berehala irekiko zutela, eta ondoren mozioak ez zuela arrazoirik. Azaroan, bulegoa ireki gabe zegoela ikusi ondoren, berriro galdetu genuen Batzordean, eta erantzun ziguten arrazoia bulegoan izurrite bat agertzea eta Correoseko garbiketako langileen greba zela.

Itxiera egoera luzatzen ari zen eta horregatik proposatu du EH Bilduk apirilean berriro Correosen bulegoaren irekierari buruzko mozioa. Hemen informazio berria ematen zaigu. Dirudienez, Udalari jakinarazi diote Correosek bulego hori ixteko erabakia hartu duela. EAJren transakzio proposamena onartu ondoren, proposamena osoko bilkuran bozkatu da eta aho batez onartu da. Correosi bulegoa irekitzeko eskatzen zaio, eta Correosek Udalarekiko duen errespetu- eta komunikazio-falta salatzen da.

Berri ona da, baina irailetik arazoa mahai gainean jartzen hasi izanak eta Udalak Correosi eskaera instituzional argia egiteak maniobratzeko aukera gehiago emango liguke. Espero dezagun berandu ez iristea.

Era berean, apirileko osoko bilkura honetan aho batez onartu da metroaren maiztasuna Plentziarako norabidean handitzeko mozioa. Batez ere bi arrazoirengatik: Urdulizko Ospitalearekiko komunikazioak hobetzeko, eta gure udalerritik igarotzen den autoaren erabilera gehiago murriztu ahal izateko.

Alde horretatik bitxia iruditu zaigu Gobernu Taldearen jarrera, ez baitu EH Bildurekin adostu nahi izan mozioaren baldintzak, eta, aldiz, Podemosena onartu du, ia gauza bera eskatzen zuenean.

EH Bilduk garrantzia eman dio Metro Bilbaori maiztasunak handitzeko eskatzea adosteko beharrari, eta horregatik babestu dugu proposatutako mozioa.