AKTUALITATEA

| 2025-06-03 10:16:00

EH Bilduren Programa idazkaria eta Eusko Legebiltzarreko bozeramailea den Nerea Kortajarenak ETB1eko Egun On saioan adierazi duenez, EAJk eta PSEk aurkeztutako lege proposamen berria "atzerapauso historikoa" da eta "merkatuaren logikak" lehenesten ditu, herritarren oinarrizko eskubideen gainetik. Hona hemen bere adierazpen nagusiak:

• Nik uste dut, batzuetan, indar erakustaldiak egin nahi direnean agertzen direla ahuldade handienak. Eta etxebizitza politikak, nire ustez, gobernu honen funtzionatzeko modua islatzen duen eredu paradigmatiko bat dira.
• Desadostasunak oso agerikoak dira etxebizitzaren arloan –beste esparru batzuetan bezala–, baina bereziki gai honetan: oinarrizko desadostasunak dituzte bi bazkideek emergentzia habitazionalari nola heldu. Eta ez dakit... Ez dakit, adibidez, desadostasun horiek ikusita, halako erakustaldi bat egin nahi den, nolabait adostasun handi bat dagoela irudikatzeko.
• Gaur, agian, argituko digute Madrileko Etxebizitza Legearen inguruko helegitea kenduko duen Jaurlaritzak. Izan ere, alde batetik, sailburu bat dugu lege hori aplikatzeko beharra aldarrikatzen, eta bestetik, gobernu bera da helegitea aurkeztu diona. Gainera, gobernuak berak prezioen kontrola aldarrikatzen du, baina, aldi berean, alderdi berak dauden beste gobernu batzuetan ez da prezioen indizea ezartzen, eta izugarrizko atzerapenez dator. Blokeo egoera batean gaude.
• Beraz, ondo aztertuko dugu aurkeztuko dutena, baina nik uste dut aurkeztuko den hori baldintzatua egongo dela bi gobernukideen arteko desadostasunengatik. Eta horrek muga bat ezartzen dio herri honetako politika publikoari.
• Gainera, dagoeneko esan da: orain arte entzun dugunaren arabera, lege-erreformaren bueltan planteatzen dena da babes ofizialeko etxebizitzen erreserba murriztea. Eta, egia esan, guretzat hori akats historiko bat litzateke. Izugarrizko atzerapausoa izango litzateke.
• Ez zaigu azaldu zergatik aldatu behar den azken 20 urteetan aplikatu den erreserba hori. Dirudienez, promotorrek ez dutelako nahikoa irabazten. Baina, bizi dugun etxebizitza larrialdiaren aurrean, beharrezkoa da politika publiko sendoak bultzatzea: prezioen kontrola, merkatuan esku-hartze eraginkorra eta alokairu sozialaren sustapena.
• Merkatuari are espazio gehiago emateko norabidean kokatzen da, eta ez da hori behar dugun bidea.
• Azken finean, gobernuan dauden bi indar politikoek 40 urte daramatzate, era batean edo bestean, herri honen zati hau gobernatzen. Eta gaur egun jasaten ari gara urte hauetan egin ez diren etxebizitza politiken ondorioak: merkatu bat guztiz deskontrolatuta, 85.000 pertsona Etxebiden izena emanda, eta Europako emantzipazio-tasarik baxuena.
• Horregatik, beste bide bati ekiteko unea iritsi dela uste dut. Eta badago alternatiba bat. Guk defendatu egingo dugu, urrutira joan gabe, bihar, osoko bilkura monografikoan, azken asteetan egin dugun bezala.