AKTUALITATEA

| 2023-03-17 17:28:00

Azken egunotan, EAJ-PSE gobernu-taldeak legegintzaldiko balantzearen aurkezpena egin du, eta, egia esanda, tristura eragin digu.

EAJ-PSE udaletxeko bulegoetan giltzapetu dira, kaleko errealitatearekin bat egin ezinik, eta aihotza ezarri du bere politika guztietarako. Ez diete auzokideei, ez gizarte taldeei ez oposizioko talde politikoei entzun. Edozertarako izan duten lankidetza falta izugarriaren ikusle izan gara, berea ez den ahots orori entzungor eginez. Eta hau guztia, geldotasunak, inertziak eta inprobisazioak gidatuta izan dira. Lau urte gogor herri osoarentzat, alkatetzaren bulegoarentzat izan ezik, eta, gainera, harro daude horretaz.

Badirudi, Laudioko gobernu-taldeak, pandemiak ekarritako alderdi txar guztiekin gelditzeko merezimendu zalantzagarria izan duela (geldialdia, inprobisazioa, isolamendua, urruntzea, burokrazia) eta ez ekarritako alde onekin (elkartasuna, hausnarketa, lankidetza, bultzada berria, etorkizuneko begirada).

Gogoeta egin eta hori zuzentzen saiatu beharrean, dagoeneko iragarri dute, zenbakiek ematen badiete,  hurrengo 4 urteetan berdin jarraituko dutela, eta hori oso larria iruditzen zaio koalizio independentistari.

Bizilagunen sumindura nabaria da. “Izandako komunikazioa gauzaez izan da eta erabaki guztiak ate itxita hartu dira” aipatu du Nagorek. Hori bai, ez dira kalera atera entzutera, baina bai argazkia ateratzera, dena den, erakusleiho politikak nekatu egin du herria.

Gainera, 4 urte hauetan, prozeduretan, moteltasun marka guztiak hautsi dira: 4 urte behar izan dira Antzokiko obrak hasteko; 4 urte Hiri Antolaketako Plan Orokor berriaren lizitazioa egiteko; gainera, hauteskunde-programan jasotzen zuten San Rokeko adinekoentzako egoitza zaharra, musikaren etxe berria izango zela eta 4 urte geroago abandonatuta jarraitzen du; baserritarrei zailtasunak jarri dizkiete; hiltegia justifikatu gabe itxi dute; Kultura Etxeak legegintzaldi osoa itxita darama kultura-taldeak udalerrian zehar sakabanatuz; zinemarik gabe geratu gara, eta erabiltzaile-talde baten inplikazioari esker, zerbitzu hori suspertu egin ahal izan da. Era berean, 4 urte behar izan dituzte haur parkeak eraberritzen hasteko. Ez hori bakarrik, nabarmentzekoa da euskararekiko azaldu duten jarrera, bai aurrekontuetan bai honen sustapenean baita hizkuntza politiketan ere. Hori bai, orain hauteskunde bezperan, herria hankaz gora dago beste argazki bat egiteko.

EH Bilduk mahai gainean dituen erronkak oso handiak dira, eta ezin da denbora gehiago galdu. Eraldaketa energetikoa edo biztanleriaren zahartzea desafio izugarriak dira herri honentzat. Udalaren politika bulego itxi batetik kudeatze hutsera mugatzeak ez du balio. Guztion artean erabaki behar da nola hartuko diren apustu berri horiek. Ez du balio beste aldera begiratzeak, orain arte egin den bezala, eta aurre ez egiteak. Etorkizunari begiratzeko garaia da. Erronkak mahai gainean daude eta EH Bilduk erantzukizunez eta eraginkortasunez aurre egiteko konpromisoa hartu du.

Egiteko beste modu batean sinesten du EH Bildu Laudiok: herritarren lankidetza eta parte-hartze aktiboa ardatz bezala duena. Herritarraren ongizatea erdigunean jartzen duena. Politika kalean egiten duena. Horregatik, gauzak beste modu batera egiteko unea da.

Daukagunarekin ez konformatzeko eta Laudio berpizteko energia guztia emateko unea da. “Herria bizilagunei itzuliko diegu eta lanean jarraituko dugu” esanez bukatu du zinegotziak.