Kongresua-Senatua

EH Bilduk demokraziaren aurkako erasotzat jo du Kataluniako preso politikoen kargugabetzea

Kataluniako herritarren gehiengoaren mandatua ez errespetatzea leporatu die koalizio subiranistak PSOE, PP eta Ciudadanosi.

| 2019-05-24 17:24:00

EH Bilduk demokraziaren eta parlamentarismoaren aurkako erasotzat jo du Kongresuko Mahaiak Kataluniako preso politikoak kargugabetu izana. Kataluniako herritarren gehiengoaren mandatua hankaz gora jartzea, iragan apirilaren 28ko bozetan katalanek emandako hitza ez errespetatzea eta ordezkari politikoen parte hartze eskubidea urratzea egotzi die kargugabetzea babestu duten alderdiei.

EH Bilduren iritziz, erabat onartezina da Kataluniako preso politikoei herritarrek emandako babesa kentzea eta milioi bat katalan baino gehiagoren borondatea isilaraztea. Koalizio subiranistak uste du Espainiako Estatuaren demokrazia maila eskasa agerian uzten duela Kongresuko Mahaiaren erabakiak.

Ildo berean, igande honetan hautetsontziak betetzeko deia egin du EH Bilduk, preso politiko bat Europako Parlamentura bidaltzea baita demokraziaren aurkako eraso honi erantzuteko eta errepresioari aurre egiteko modu eraginkorrena. Horrez gain, EH Bilduk babesa eta elkartasuna helarazi nahi die Auzitegi Goreneko epaiketa injustutik hasita Espainiako Estatuaren krudelkeria jasaten ari diren preso politiko, iheslari eta senideei.

Oskar Matute: "Lege berri bat egin aurretik, presazkoa eta ezinbestekoa da LOMCE erabat indargabetzea"

| 2018-11-28 16:37:00

Isabel Celaa Hezkuntza Ministroak aurkeztu duen aurreproiektuak LOMCEren indargabetzea jasotzea ongi ikusi du EH Bilduk, baina kezka agertu du Madrilek ez duelako “konpromisorik argirik” erakutsi hezkuntza eskumenari buruz. “2006ra itzultzeko aldatu nahi du LOMCE, ez aurrera egiteko”, ohartarazi du Oskar Matute diputatuak.

Isabel Celaa Espainiako Hezkuntza Ministroak LOMCEren “neurri polemikoenak” legea erabat indargabetu gabe aldatuko dituela jakinarazi ostean, EH Bilduk berretsi du “presazkoa eta nahitaezkoa” dela LOMCE baliorik gabe uztea lege berri bat egin aurretik. Oskar Matute diputatuak ohartarazi du LOMCEren zati batzuk aldatuz “atzera begiratzea eta 2006. urtera itzultzea” dela Espainiako Gobernuaren asmoa, aukera aurrera egiteko zimenduak ezartzeko aprobetxatu beharrean.

LOMCE indargabetzeko bidean, Matutek “pauso irmoak” eskatu dizkio Espainiako Gobernuari, eta “ausart” aritzeko deia egin dio lege atzerakoi hori guztiz deseraiki eta LOMCE baliorik gabe utz dezan. “Ikasleen egunerokoan, hezkuntza komunitatean eta errealitate anitzetako autogobernuetan izan duen ondorio negatibo eta mingarriengatik”, azaldu du.

EH Bilduk betidanik defendatu du LOMCE indargabetu eta edukiz hustu zitekeela, inolako ñabardurarik gabe. “Ezinbestekoa da hankaz gora jartzea, are gehiago gizarteak hezkuntzan dituen beharrei errespetuan oinarritutako perspektiba inklusibo, parekide eta laiko batetik erantzun nahi badiogu”, gehitu du Matutek.

Koalizio subiranistak pozez hartu du gaur aurkeztutako aurreproiektuak LOMCEren indargabetzea bere gain hartzea, baina kezkatuta agertu da Hezkuntza Ministroak ez duelako “konpromiso argirik” erakutsi Euskal Hezkuntza Komunitateak eta Eusko Legebiltzarreko Autogobernu ponentziak aldarrikatu duten “hezkuntza eskumen esklusiboari buruz”.

EH Bilduk Hezkuntza Batzordean duen bozeramaileak, horrez gainera, agerian utzi ditu Espainiako Gobernuaren kontraesanak LOMCEren inguruan. “Joan den uztailean, ministroak agintaldiaren xehetasunak eman zituenean, argi utzi genuen ezinbestekoa eta presazkoa zela LOMCE erabat baliogabetzea lege berri baterako lehen pauso bezala. Celaak berak erantzun zigun ezinezkoa zela hori egitea. Zalantzan jarri genuen orduan eta gaur xehetutako aurreproiektuak arrazoia eman digu”, gogorarazi du.

Legea tentuz aztertuko duela jakinarazi du EH Bilduk, laikotasun, berdintasun eta kalitate irizpideei erantzuna ematen dien ikusteko. Ildo horretan, autogobernua errespetatzeko eskatu du Matutek, euskal eredu propio baterako Euskal Hezkuntza Komunitateak eginiko apustuari bide emateko. “Euskal gizarteak merezi eta behar dituen erronkei erantzungo lieke horrek”, nabarmendu du.

ALBISTEAK

Lurrikara arriskuen aurrean Esa urtegi inguruko bizilagunen segurtasuna bermatzeko eskatu du EH Bilduk

2020-10-13 10:49:00

Urtegia handitzeko lanen gainkostuak salatu ditu EH Bilduren Nafarroako diputatu Bel Pozuetak, eta azalpenak eskatu dizkio Espainiako Gobernuari berriki gertatutako lurrikaren inguruan. Esku hartzeko garaia dela dio.

EH Bilduk Babes Zibil eta Larrialdietako zuzendariaren agerraldia galdegin du Kongresuan Nafarroako lurrikaren inguruan azalpenak eman ditzan

2020-10-01 12:58:00

Nafarroan gertaturiko lurrikaren inguruko informazioa jakinaraztea, azpiegituretan izan ditzakeen ondorioez xehetasunak ematea eta esku artean dituzten prebentzio planen berri ematea nahi du ezkerreko indar subiranistak.

Kultura oinarrizko ondasun izendatzea proposatu du EH Bilduk, eta sektorea babesteko laguntza plan bat galdegin dio Madrili: «Babestu ezean, desagertu egingo da»

2020-09-21 12:03:00

EH Bilduren Kongresuko bozeramaile Mertxe Aizpuruak Legez besteko Proposamen bat erregistratu du Kultura Batzordean eztabaidatzeko, Espainiako Gobernuari eskatuz erreskate plan bat martxan jar dezala laguntza zuzenen bidez eta krisi ekonomikoak gogor jotako sektorearen biziraupena berma dezala. "Kultura funtsezko ondasun izendatzeaz gain, urgentziazkoa da ezinbesteko neurriak abian jartzea adierazpen huts batean gera ez dadin".

EH Bilduk Kongresu eta Senatura eraman du Moriako kanpalekuan dauden errefuxiatuen larrialdi egoera

2020-09-12 10:38:00

Greziaren eta Europako Batasunaren ekimen faltaren aurrean, ezkerreko indar subiranistak esku hartzeko eta errefuxiatuen asilo eskubidea bermatzeko eskatu dio Espainiako Gobernuari: Legez besteko Proposamen bat eta galdera sorta bat erregistratu ditu Kongresu eta Senatuan. Errefuxiatuen guneak su hartu ostean, 13.000 pertsonak etxerik eta janaririk gabe jarraitzen dute: pilatuta eta baldintza penagarrietan bizi dira.