Iruñea

“EH Bildutik eskatzen dugu pertsona migratzaile guztien eskubide politiko, zibil eta sozialak bermatu daitezela“

EH Bildutik kritikatzen dute Modou Faye “Beltxa” Iruñeko Udaleko zerrendako kidearen hautagaitza aurkezteko izandako ezintasuna, nazionalitate espainiarra ez izateagatik, nahiz eta aspaldidanik bizileku baimena duen arren.

| 2019-05-08 08:36:00

EH Bildutik kritikatzen dugu Modou Faye “Beltxa” Iruñeko Udalerako EH Bilduren zerrendako kidearen hautagaitza aurkezteko orduan izandako ezintasunak, espainiar nazionalitatea ez izateagatik, nahiz eta orain hamar urtetik duen egoera erregularizatua eta bizileku baimena. Zentzu horretan, eskatzen dugu pertsona migratzaile guztien eskubide politiko, zibil eta sozialak bermatu daitezela. Era berean, benetan sentitzen dugu hiriarekin konprometituta eta Iruñea hiri hobeago eta irekiago bat egiteko inplikatuta dauden pertsonek, partehartzerako traba administratibo eta politikoak topatzea etengabean, Estatutik inposatuta datozenak. 

Hiri demokratiko bat nahi dugu non bertan bizi diren pertsona guztiek eskubide guztiak izango dituzten. Hirian partehartzen duten eta beraien bizi eta lan proiektuak Iruñean garatzen dituzten pertsona migratzaile guztiek sufragio aktibo eta pasiborako eskubideak bermatuta izan ditzaten. Izan ere, nahiz eta pertsona horiek beraien betebeharrekin aurrera egiten duten gainontzekoen modura, ikus dezakegun oraindik ere parte hartze politikorako eskubidea urratzen zaiela. 

Zentzu horretan, funtsezkoa da bizileku baimena nazionalitatearen parekide izatea halako kasuetarako, baldintza berdintasuna bermatzeko eta gizarte bazterkeria kasuekin amaitzeko. Hiri anitz eta aktibo baten alde egiten dugu, Iruñea multikultural baten alde, non pertsona guztiek izango dituzten parte hartzeko aukera eta eskubide politikoak bermatuta, baldintza berdintasunean. Pertsona migratzaileak ere protagonista izango diren Iruñea, zeinetan guztiok elkarrekin hiriaren etorkizuna eraikiko dugun eta izan nahi dugun gizarte ireki, solidario eta anitza”. 

“Proiektu sendoa eta ilusioa eskaintzen duten 130 neurri aurkezten ditugu, zeintzuekin Iruñea geldiezina izango den ”

Aurkeztutako dokumentua sei ardatzetan banatuta dago eta 25 plan, 14 programa, 7 udal araudi berri eta topaketarako 7 gune berri barne biltzen ditu, baita beste hainbeste proiektu eta neurri ere, Iruñea hiri ireki, solidario, jasangarri eta eraldatzaile bilakatuko dutenak.

| 2019-05-06 11:15:00

EH Bildutik etorkizuneko Iruñea eraikitzeko proposatzen ditugun 130 neurriak aurkezten ditugu. EH Bilduk gidatuko duen udal gobernu berriak izango dituen lehentasunetan pentsatuz hautatu ditugu programatik neurri hauek. 130 neurri dira, proiektu sendoa eta ilusioa eskaintzen dutenak eta zeintzuek Iruñea hiri irekiago, solidarioago, feministago, jasangarriago eta eraldatzaileagoa izatera eramango duten. 130 neurri hauekin Iruñea modu geldiezinean doa aurrera hiri justuago eta duinago baterantz.

Izan ere, EH Bilduk anbizio handiko hiri eredu eta proiektu du, Iruñea etorkizunera begira jarri nahi duena; ditugun erronka garrantzitsuei aurre egiteko prest egongo den hiria, ingurugiroarekiko errespetuz jokatuko duena, baita pertsonekin ere, hobetzeko eta garatzeko aukerak eskainiz, eskubide sozialetan abanguardia izanez.

Eta bide horretan, legegintzaldi hau historikoa izan da, gobernu ezkerreko eta progresista bat, Udala herritarrei ireki diena eta pertsonen bizitza hobetzean ahalegindu dena, pertsona guztien bizitzak hobetzean. Eta hala, erreferentzia izan gara Estatu mailan berdintasuna arloan, memoria historikoan edo trantsizio energetikoan. Partehartzeari bultzada izugarria eman diogu, baita auzoetako bizitzari ere, eta hiriko mugikortasuna eraldatzen hasi gara, hau delako hain zuzen herritarren kezka handienetako bat. Udal kontuak garbitu ditugu eta inbertsioak %60 hazi. Halaber, inbertsio handiak egin ditugu larrialdi egoeran diren pertsonentzat udal etxebizitzak eraberritu eta ahalbidetzeko. Baina bereziki iruindarrekin egon eta hitz egin dugu, sare sozialarekin eta auzoetako eragileekin, entzun ditugu, eta kezka eta lehentasun horietatik sortu dira gaur aurkezten ditugun 130 neurriak.

Hain zuzen, garrantzia handiko testuinguruan aurkezten ditugu neurriak, datozen hauteskundeak gakoa izango direlako Iruñeko herritarrentzat. Hauteskunde hauek plebiszitu moduan datoz iraganeko Iruñaren artean, UPN-PP eta Ciudadanosek ordezkatzen duten eskuin zaharkituaren Iruñea, hitzarmen ekonomikoa eta legegintzaldi honetako lorpen guztiak xahutu nahi dituztenak; eta etorkizuneko Iruñearen artean, aurrerapen sozialen Iruñea, berdintasunarena, modernitatearena, EH Bilduk ordezkatzen duena.  

"M26ko hauteskundeak iraganeko eta etorkizuneko Iruñearen arteko plebiszitua izango dira" [BIDEOA]

Joseba Asironek apirilak 28ko emaitzak aztertu ditu eta nabarmendu du datorren udal eta foru hauteskundeek izango duten garrantzia, Iruñean aldaketaren jarraikortasuna dagolako jokoan.

| 2019-05-01 21:41:00

Asiron: "EH Bildu da aldaketaren erdiko karrila" [BIDEOA]

Joseba Asiron Iruñeko alkateari elkarrizketa egin diote Euskalerria Irratian. Bere esanetan, "hasieratik konpromisoz lan egin da eta askotan tokatu zaigu eskuzabaltasunez erdibideak bilatzea aldaketaren indar ezberdinen artean"

| 2019-04-11 19:08:00

​Eskuin mediatikoak eta politikoak diotenaren aurka, Joseba Asiron alkateak Iruñeko jendartea lasai dakusa, Euskalerria Irratiari bere bulegoan eskaini dion elkarrizketan azaldu duenez: "Iruindarrek hasieratik normaltasunez eta lasaitasunez hartu dute aldaketa, UPNk eta PSNk kaosa iragarri bazuten ere. Legealdiko irakaspen nagusia hori da, gauzak beste modu zintzo eta jator batean egin daitezkeela". Asiron kontent azaldu da azken lau urteotan egindako lanarekin: "Legealdiaren balorazioa oso ona da. Zorra murriztu dugu eta gastu soziala %40 handitu. Parte hartzean, euskararen alorrean aurrerapauso handiak eman ditugu. Berdintasunean eta memorian aitzindariak gara Estatuan".

Halaber, Asironek argi dauka, aldaketak aurrera eginen badu, lau indarron adostasunarekin izanen da: "Guztiok ikasi behar dugu egindako akatsetatik, aldaketarekin segitzeko. Datozen hauteskundeetan IEren eta Aranzadiren esparru soziopolitikoa oso garrantzitsua izanen da aldaketarako". Nolanahi ere, Asironen irudikoz, maiatzeko hauteskundeetan aldaketa beste behin ere gaildenduko da: "Konbentzituta nago duela lau urte aldaketaren alde egin zuen jendeak berriro eginen duela. Erakundeetako aldaketa aldaketa soziologiko sakon baten ondorioa izan da".

Era berean, oposizioa noraezean dakusa. PSN, behin eta berriz UPNrekin lerraturik. Eta UPNk bultzaturiko koalizioa, kontraesanez josia: "Navarra Suman elkartu direnek ez dute proiektu politiko komunik. Boterea berreskuratzeko nahiak, horrek soilik batzen ditu".

 

Talderik onena dugu, hiririk onenarentzat! [BIDEOA]

| 2019-04-01 19:03:00

 

EH Bildu auzolana da, elkarlana, taldea. Zu eta gu bezalako jendea gara EH Bildu. Pertsonak dira gure marka eta pertsonek mugitzen gaituzte. Eta horregatik, jende bikaina dugu berriz ere gurekin, Iruñearen eraldaketa aurrera eramateko prest daudenak. Talde jatorra eta zintzoa, aldaketaren konpromisoa berrestera datorrena eta egunero, kalean eta erakundeetan, eraikitzen ari garen hiri eredu berri horretan irmoki sinisten dutenak. Talde anitza, talde prestatua, erreferentziazko pertsonez osatua. Jardun ezberdinetako eta auzo ezberdinetako pertsonek osatzen duten taldea, kolektibo eta mugimendu sozialetakoak, gazteak, pentsionistak... experientzia eta bizipen desberdinak izan dituztenak. Enpatia duten pertsonak eta entzuten dakitenak, izan ere aniztasunaren eta berdintasunaren balioak ditu oinarri EH Bilduren talde honek. Baina guztiaren gainetik, ilusionatuta dagoen taldea da. Etorkizuneko talde bat, etorkizuneko Iruñea eraiki nahi duena, amesten duena, sortzen duena. Menpeko Iruñea nahi dutenen aurrean Iruñea errebeldea eraikitzen ari gara eta jarraituko dugu. Gizarte ireki, justu, berde eta feminista bat bultzatuko duen hiria. Iruñea maite dugulako, ez dugu atzera pausorik emango. Guk guztiok, atzo, gaurko Iruñea eraikitzea posible zela amestu genuen, eta gaur, biharko Iruñea dugu amets!