Irun
Irun
ES

Irungo EH Bilduk kontziliazioan laguntzeko diru-partida sor dezala eskatu dio Udal Gobernuari

| 2021-05-14 12:39:00

Koronabirusak sortutako osasun-egoera dela-eta, Udalak eskaintzen dituen udalekuen plaza kopurua nabarmen murriztu da aurten, talde txikiagoak egin baitira segurtasun-neurriak betetzeko. Eskaintza publikoaren murrizketari aurre egiteko Udalak aisialdirako aukera berriak sortu ezean, klub eta eragile desberdinen lanari esker beteko da hutsune hau.

Irungo Udaleku programan zein Solas Jolas programan ez dira plaza nahikorik eskaini zegoen eskaera guztiari erantzuteko, eta ondorioz, ehunka haur plazarik gabe gelditu dira. Haurrek merezi duten udaz eta aisialdiaz disfrutatu ahal izateko kanpoan gelditu diren familiek eskaintza pribatuak bilatu behar izan dituzte, horrek suposatzen duen, eta askok ordaindu ezin duten, gastuarekin.

Beraz, bigarren urtez, familiei uda honetako kontziliazioa erabat zaildu zaiela ohartuta instituzioek paper aktiboa jokatu behar dute familia eta lanaren bateratzea ahalbidetzeko, eta modu berean, Irungo haur guztien ongizatea bermatzeko.

Hala, Irungo EH Bilduk eskaera zehatza luzatzen dio Udal Gobernuari: udako hilabeteetan familientzako kontziliaziorako diru-laguntza partida bat sor dezala. Neurri honekin udaleku publikoen plaza kopururen jaitsiera konpentsatzeko. Udal eskaintza zabaldu ezean, dirua ez dadin oztopo izan bestelako eskaintzetara jotzeko orduan.

Diru-laguntza honekin, familien kontziliazioan laguntzetik harago, hala nahi duten haur guztiek aisialdi eskaintza eskuragarri izatea bilatzen dugu- Izan ere, haurrekin adiskidetsua izan nahi duen hiri baten Udal Gobernuak, haurrek hirian dagoen aisialdi eskaintzara sarbidea izango dutela bermatu behar du.

Pandemian zehar askotan familia eta haurrak ahaztuta gelditu dira, baita haien beharrak ere, ez ditzagun Irungo familiak bakarrik utzi. Hitzetatik ekintzetara pasatzeko unea da.

 

 

 

 

 

 

 

 

 

 

 

 

 

 

Irungo EH Bildu Pasquier-Recondoren aferaren harira

| 2021-04-27 12:37:00

Egun hauetan, Pasquier-Recondo enpresak eta Irungo udalak ostiraleko plenora sinatzera eramango duten hitzarmena da hizpide. Hitzarmen honen bidez, enpresak Azken Portun okupatzen dituen lurrak birkalifikatuko ditu udalak, eta 200 etxebizitza eraikitzeko operazioari irekiko dio bidea.

Operazio horretan ere, Pasquier-Recondo enpresako langile-batzordeari entzun diogunez, hamarnaka lanpostu galduko dira gure hirian, eta Landetxako lantegira doazen langileen lan baldintzek okerrera egingo dute.

Esan gabe doa egun Pasquier-Recondoren jabetzakoak diren Azken Portuko lur horiek balio natural handia dutela. ZEC (Zona de Especial Conservación) eta ZEPA (Zona Especial de Protección de Aves) sailkapena dute, eta zalantzarik gabe, gure ondare naturalaren parte dira.

Azken egunotan gaiak izan duen oihartzun mediatikoa handia izan da. Batetik talde ekologistek eta bestetik langileen ordezkariek hainbat komunikabidetan operazio honen aurkako posizioa jakinarazi dute.

Irungo EH Bildun garbi daukagu honelako gatazken aurrean interes publikoa gailendu behar dela. Beti esan dugun bezala, Irunek dituen hain balio handiko ondare naturaletan ezer egiten hasi baino lehen, ondo pentsatu behar da bertan zer egin, ezin baita onartu horrelako guneak betiko hipotekatzea. Gainera, hain eremu garrantzitsuaren aurrean gaiaren gainean dauden eragileen eta hiritarren iritziak kontrastatzea ezinbestekoa ikusten dugu.

Gure ustez negoziazio prrozesu guztietan parte hartzea eta gardentasuna lehentasunezko faktoreak izan behar dira. Hori dela eta, udal gobernuan dauden bi taldeei eskatu nahi diegu ostiral honetan eztabaidara eramango duten hitzarmena BERTAN BEHERA UZTEKO, eta gainerako udal taldeekin, talde ekologistekin, oro har, bizilagun guztiekin komunikazio kanalak irekitzeko.

 

Bidasoko EH Bilduk ur eta zabor tasen salbuespenak zabaltzea eskatzen du

| 2021-04-06 11:19:00

Txingudiko Zerbitzuak mankomunitateko batzarrak, martxoaren 22an egindako bilkuran, aho batez onartu zuen erabat ixtera behartuak izan diren establezimendu eta zerbitzuak ur eta zabor tasa ordaintzetik salbuetsiak izatea, itxierak irauten duen bitartean.

Neurri honek, batez ere, gaueko aisialdiko establezimenduei, entsegu aretoei eta elkarte gastrononikoei eragingo die.

Bidasoko EH Bildun bat egiten dugu neurriarekin eta horren alde bozkatu genuen mankomunitateko batzarrean, baina motz geratzen dela uste dugu. Hala, ur eta zabor tasen salbuespena 3. mailako establezimenduei, hau da, ordutegirik zabalena duten tabernei zabaltzea eskatzen dugu. Horrekin batera, gainerako taberna, jatetxe eta kafetegiek ere ordutegi murriztua dutenez, egoera desberdinei egokitutako tasen salbuespen plana egin dezala eskatzen diogu mankomunitateari.

Izan ere, ezaguna da ordutegia murrizteak eragin nabarmena izan duela ostalarien egunerokoan. Proposatzen ditugun salbuespenekin bizi duten egoera zailean laguntza txiki bat eman nahi diegu.

EH Bilduk hilabeteak daramatza autonomoen, dendarien, kulturgileen, taxilarien, ostalarien etab.en egoera zailaz ohartarazten. Instituzioek, beharrezkoak diren neurri lagungarriez harago sektore kaltetuen aldeko plan estrategikoak egin behar dituzte. Eta hori da, hain zuzen ere, Irungo eta Hondarribiko udalei eskatzen dieguna: sektoreekin elkarlanean, dituztenen eskumenak muturrera eramanez eta gainerako instituzioen aurrean beharrezkoak diren kudeaketak eginez, kaltetutako sektoreen aldeko plan estrategiko eraginkorrak martxan jar ditzatela.

EH Bilduk lortutako akordioari esker, 2 milioi euro gehiago egongo dira irundarron ongizatean inbertitzeko

| 2021-03-17 09:24:00

2020 urteko udal aurrekontuak inflexio puntu bat suposatu zuen, EH Bilduren zuzenketei esker, herritarren beharrak inoiz baino presenteago egon zirelako. Ia 6 milioi euroko akordioa lortu genuen udal gobernuarekin, besteak beste, alokairuan etxebizitza parke publikoa egiteko.

Aurten, gehiengo absolutua duen gobernuak aurkeztu zuen aurrekontu proposamenak ez zion bizi dugun krisi egoerari erantzuten. Gure zuzenketei esker 2 milio euroko akordioa lortu dugu irundarron ongizatean laguntzeko. Etxebizitza publikoan eta irundarren beharretan inbertitzeko. Hala, gure abstentzioarekin aurrekontu sozialagoa lortu dugu.

Iaz ikusi zen bezala, etxebizitza EH Bilduren ardatz nagusietako bat da, etxebizitza baita bizitza duina izan ahal izateko oinarria. Aurten lortutako akordioari esker Behobia auzoan kokatuta dagoen Lastaola Postetxearen eremua biziberrituko da eta etxebizitzak eraikiko dira alokairu publikoan.

Krisiak hainbat sektore gogor kolpatu ditu. Hala nola autonomoak, merkatariak, kuturgileak, taxilariak, ostalariak...Une gogorrak bizitzen ari dira eta baldintza zailetan ari dira euren jarduna aurrera eramaten. Akordioari esker 100.000 euro gehiago egongo dira laguntzen jarraitzeko. EH Bildutik krisiak kaltetutako sektoreen ondoan egongo gara, sektore horien aldeko plan estrategikoak bultzatzen.

Krisi garaiotan are eta nabarmenago da udalak beharrak dituzten herritarretatik gertu egon behar duela. Udal zerbitzuak auzoetara eramateko lehen pausoak emango dira aurrekontu akordioari esker. Gure taldetik lanean jarraituko dugu udal zerbitzuak herritarrengana hurbiltzeko eta auzoei dagokien garrantzia emateko.

Gizarte ongizatea da akordioak duen beste ardatz garrantzitsu bat. Lortutako akordioari esker ZUBIA dispositiboa eguneko 24 orduetan irekia egongo da abendura arte, bazterketa sozialean dauden pertsonei bideratutako tailer okupazionalak martxan jarriko dira eta babesgabetasun egoeran dauden haurrei bideratutako programa abiatuko da. Irungo EH Bilduk lanean jarraituko du herritar guztiek bizi baldintza duinak izan ditzaten, eta batez ere, inork kalean lo egin behar ez dezan.

Irungo EH Bildutik argi dugu ez direla guk egingo genituzkeen aurrekontuak eta ez gaituzte asetzen. Eta lanean jarraituko dugu irundarren beharrak politika publikoen erdigunean jar daitezen. Baina COVID19-ak baldintzatutako urtean irundarron ongizatea aurrekontuetan txertatzea lortu dugu. Izan ere, berriro ikusi denez, EH Bildu akordioetan dagoenean irundarron bizi-baldintzak hobetzen dira.

 

 

 

 

 

Irunen PREST gaude

| 2020-07-08 16:26:00

Irunen PREST gaude langile eta pertsonen bizimoduak politikaren erdigunean jarri eta hobetzeko.

PREST Gasteizen politika feminista, aurrerakoi eta jasangarriak aurrera eramango dituen lehendakaria izango dugulako.

Igandean, ezkerreko subiranisten bota bat bera ere ezin daiteke etxean geratu. Merezi duzun herria egiteko PREST gaude.

MADDALEN IRIARTE LEHENDAKARI izateko PREST!