Irungo EH Bilduren proposamenak 2022 ko aurrekontuetarako
| 2021-12-01 11:04:00
EH Bilduk, 2022ko udal aurrekontuetarako proposamenak aurkeztu ditu gaur, irundarron bizitzak hobetzeko helburuarekin.
Lehenik eta behin, eta aurreko urteetako planteamenduan sakonduz, Irungo deszentralizazioan jarri nahi dugu jomuga. Beti pentsatu izan dugu auzoek Irun egiten dutela, eta izaera propioa duten komunitateak diren heinean bertan bizitza sustatu behar dugula, eta horretarako, udal zerbitzuak ere behar dituztela. Honen harira, hiru auzo zehatzetan proiektu pilotoak jartzea proposatuko dugu. Proiektu honek hiru ardatz izango ditu: 1. SAC/HAZeko unitatea, 2. Ongizateko arloaren lehenengo leihatila, eta 3. CBArekin sarean funtzionatuko lukeen Kultur gune/ liburutegi bat. Lehenengo proiektu pilotu honentzat Landetxa, Anaka eta Elitxuko auzoak pentsatu ditugu, baina esan bezala, gure asmoa Irungo auzoetara zabaltzea da .
Bigarrenik, Udalaren enpresa publikoa den IRUNVI bidelagun izanik, aurreko urteetan gure taldeari esker sortu zen etxebizitza parke publikoa handitzea eskatzen dugu. Dagoeneko adostuta ditugun hainbat eremutako etxebizitzez gain, proposatzen dugu IRUNVIk bueltan jasoko dituen etxebizitzak erostea, aipatu etxebizitza parke publikoa haz dadin. Ondoren, etxebizitza hauek alokairu sozialean eskainiko lirateke Irunek daukan arazo larri honi irtenbide progresiboa eman ahal izateko.
Euskararen arloan, jauzi kualitatiboa ematea eskatzen diogu udal gobernuari. Horretarako, udal kontratu eta pleguetan euskara klausulak betetzen diren jarraipena areagotzea eta sistematizatzea proposatuko dugu, txosten teknikoen bitartez. Argi dugu, oraindik ere, udal zerbitzu asko euskaraz ez direla ematen, eta neurri honekin, herritar euskaldunoi bere eskubideak bermatuta edukitzea eskatzen dugu. Horretan bidelagun hainbat neurri jarri ahal izango dira, hala nola, langileen formazioa,… Era berean, konszienteak gara udal ordezkariak eredu izan behar dugula, eta hori dela eta, udal gobernuari agerraldi publikoetan zein eguneroko harremanetan euskara ere erabiltzea eskatuko diogu.
Bukatzeko, ondo dakigun bezala, trantsitoan dauden migranteekin Irun drama humanitarioa bizitzen ari da. Ulertzen dugu Irungo hiriarena ez dela ez eskuduntza zuzena ezta ardura osoarena ere, baina zinez uste dugu Irungo Udalak ezin diola arazo honi bizkarra eman. Argi dago gainerako administrazioek dituzten dispositiboek ez diotela errealitateari erantzuten, zeren ia gauero hainbat pertsona kalean geratzen baitira, eta behar-beharrezkoa da dispositibo hauetatik geratzen diren pertsona hauei erantzun bat ematea. Era berean, udalari eskatzen diogu kanpoan geratzen diren pertsona hauen profila eta kasuistikarekin txosten tekniko bat egin dezala, egoera honen jabe eskumena duten erakundeak egitea urgentea baita, inork ez duelako beste tragediarik bizi nahi.
Irungo EH Bilduk eta EAJk euskara eskakizuna malgutzea eskatzen duen mozioa erretiratzeko eskatu diogu Elkarrekin Podemos- Ezker Anitza-IU ri
| 2021-10-28 09:26:00
Ostiral honetan egingo den ohiko udalbatzako gai zerrendan hizkuntza eskakizunen gaineko araudian euskaldun pasiboak ofizialki aitortzea eskatzen duen Elkarrekin Podemos- Ezker Anitza-IU taldeak aurkeztu duen mozioarekin egin dugu topo. Finean, ekimen horrek lanpostu publikoetan euskara eskakizuna malgutzea eskatzen du.
Irungo EH Bildu eta EAJren iritziz hau atzera pausu garbia da. Ulertezina da gure hirian euskarak duen egoera jakinda, eta eragileen aldetik zein instituziotik urte hauetan guztietan egin den ahalegina ezagututa euskara bultzatzearen kontrako norabidean aritzea.
Esan gabe doa aurkeztu zaigun ekimen hau Irungo Udalak onartuta duen euskararen normalkuntza planaren helburuekin bat ez datorrela, are gehiago, planteatzen denak euskara lan hizkuntza izateari oztopoak jartzen dizkio.
Guk garbi dugu euskararen normalizazioak babes juridiko irmoa behar duela eta instituzio eta alderdi politikoen partetik begirunea eta babesa. Zentzu honetan, euskararen gaineko legeei egin beharreko edozein aldaketa ahalik eta adostasun handienarekin egin behar dela defendatzen dugu, betiere hizkuntz eskubideak bermatzeko helburuarekin. Agerikoa da aurkeztu den mozioak ez duela ez batarekin ez bestearekin betetzen.
Hori dela eta, Irungo EH Bildu eta Irungo EAJ/PNV eta udal taldeek Elkarrekin Podemos Ezker Anitza/ IUri mozio hau erretiratzeko eskatzen diogu
Enpresa elektrikoak egiten ari diren lapurretaren aurkako itzalaldian eta lapiko-jotzean parte hartzera animatu ditu herritarrak EH Bilduk
| 2021-10-07 09:45:00
Azken asteetan ikusten ari gara argindar enpresa handiak egunez egun igotzen ari zaizkigula argindarraren prezioak. Ez dago markak apurtzen ez dituzten egunik. Irungo EH Bildun uste dugu nahikoa dela esateko unea iritsi dela, elektrikoen lapurretaren aurrean planto egiteko unea iritsi dela. Hori dela eta, ostiral honetan, 22:00etan Irungo udaletxeko argiak itzaltzea eskatu dugu erregistro bidez.
Izan ere, ostiralean, urriaren 8an, 22:00etan, Euskal Herriko herri eta auzo guztietan itzalaldi bat eta lapiko-jotze bat izango dira, enpresa elektriko handiak gure herriko herritarren eta enpresa txiki eta ertainen kontura egiten ari diren lapurretaren aurrean ez garela besoak gurutzatuta egongo salatzeko. Salatuko dugu ez dugula argindarraren prezioa ezartzeko behar besteko subiranotasun energetikorik; Espainiako Estatuan, berriz, alderdi handiek ez dituzte geldiarazten argindar elektrikoen botere eta diru nahiak, eta ez dugu ahaztu nahi alderdi horietako ordezkari esanguratsuak daudela enpresa elektrikoen administrazio-kontseiluetan.
Ez gaude bakarrik salaketa honetan. Kataluniako, Galizako eta Euskal Herriko indar independentistok indarrak batu nahi izan ditugu, eta ostiraleko protesta ekitaldia aldi berean egingo da hiru herrialde horietan. Enpresa elektrikoei nahikoa dela esateko ordua da. Bada garaia erakusteko gure herrian ez dugula uzten gehiengoaren eskubideekin jolasten (energia arrazoizko prezioan eskuratzea oinarrizko eskubidea delako), gutxi batzuek poltsikoak betetzen dituzten bitartean. Ostiralean, urriak 8, herritarrek bizitza duinak izan ditzaten borrokatzen duen herri duina garela erakutsiko dugu.
EH Bilduren ekimenez, 400.000 euro gehiago kreditu aldaketan
| 2021-08-05 11:24:00
Aurreko ostiralean egin zen udalbatzan 2021 urteko aurrekontuaren kreditu aldaketa onartu zen. Irungo EH Bilduk ekarpen esanguratsua egin zuen bertan, zuzenketa ezberdinen bidez 400.000 euro gehitu baikenizkion udal gobernuaren proposamenari.
400.000 euro horietatik zenbatekorik handiena duen partida (117.000 euro) udalaren eskumenekoak diren landa bideak konpontzeko erabiliko da. EH Bildun gure landa auzoen eta euren herritarren aldeko apustua egin nahi izan dugu. Ekimen honi esker landa bide askotan beharrezkoak diren konponketa eta mantentze-lanak egitea ahalbidetu dugu.
Kultura Km 0 izan da gure taldearen beste ardatzetako bat kreditu aldaketa honetan. Izan ere, garai hauetan tokiko kulturaren aldeko apustua indartu behar delakoan gaude. Hori dela-eta, EH Bilduren ekimenez 100.000 gehitu dira aurretik zegoen diru kopuruari. Gainera 5.000 euro bideratuko dira KM0-ko lanak erosteko.
Mugikortasun-jasangarriaren aldeko apustua txertatu nahi izan dugu ere, leku estrategikoetan bizikleteentzako takila-aparkalekuak ezartzeko proiektu pilotu baterako 20.000 euro bideratuz.
Eskola kirolak duen garrantziaz jakitun, horri ere heldu nahi izan diogu kreditu aldaketan. Hala, neskeen parte hartzea indartzeko ikerketa bat egiteko partida sustatu dugu (10.000 euro). Izan ere, eskola kirolean neskek parte hartze baxua dute eta ikerketa honekin Irungo neska bakoitzak kirolaz disfrutatzeko aukera izatea bermatu nahi dugu.
EH Bilduk kreditu aldaketa honi egin dizkion gainerako ekarpen nagusiak tokiko merkataritzari bideratutako diru partida handitzea, gazteen programazioa indartzea, gazteei Irunvi-ren berri emateko kanpaina egitea, euskararen erabilera sustatzeko diru-laguntzak ezagutarazteko kanpaina egitea eta udal liburutegirako euskarazko materiala erosteko partida dira.
Zinez uste dugu gure ekarpenek herritarron egunerekoan eragin positiboa izango dutela. Izan ere, beste behin argi geratu denez, EH Bildu akordioetan dagoenean irundarron bizi-baldintzak hobetzen dira.
Bidasoko EH Bilduk ostalaritzaren aldeko neurriak proposatu ditu
| 2021-06-04 13:52:00
Bi hilabete igaro dira Txingudiko Zerbitzuak mankomunitateko batzarrak ur eta zabor tasen salbuespenak onartu zituela erabat ixtera behartuak izan diren establezimendu eta zerbitzuentzat. Hala, egoera honetan daudenek (batez ere gaueko aisialdiko establezimenduei, entsegu aretoei eta elkarte gastronomikoei eragiten die) ez dituzte ur eta zabor tasak ordainduko itxierak irauten duen bitartean.
Bidasoko EH Bildun bat egin genuen neurri horrekin, baina motz geratzen dela uste dugu. Hori dela eta, 2021. urtean, ur eta zabor tasen salbuespena 3. mailako establezimenduei aplikatzea eskatzen dugu, beti ere, horien fakturazioa %50 baino gehiago jaitsi bada 2019. urteko hilabeteetako datuekin alderatuta. Fakturazioa horrenbeste jaitsi ez dutenentzat tartetako jaitsiera planteatzen dugu, adibidez, %25etik %50era fakturazioa jaitsi dutenentzat %50eko hobaria aplikatzea.
2. mailako establezimenduentzat tartetako hobari sistema bat planteatzen dugu, fakturazioaren jaitsiera datuen baitakoa. Hala, fakturazioaren jaitsiera %0tik %25era bada, %25eko hobaria porposatzen dugu; jaitsiera %25etik %50era bada %50eko hobaria, eta jaitsiera %50etik gorakoa den kasuetan %95eko hobaria.
Azken egunetan neurri murriztaile batzuk malgutu diren arren, ostalaritzak ezin du bere eguneroko jarduna ohiko baldintzetan garatu: ordutegi eta aforo murriztuak dituzte, esaterako. Eta honek egoera larrian utzi ditu establezimendu asko. Gaueko aisialdiaren kasuan, hilabeteak pasa beharko dira normaltasun berrira egokitzeko.
Beraz, Bidasoko EH Bildun, berriz ere, ur eta zabor tasen salbuespenak zabaltzea eskatzen dugu, batez ere, neurri murriztaileak indarrean dauden bitartean.