Gasteiz

Albisteak

Trenaren lurperatzea hiri osora hedatzea eskatzeko alegazio eredu bat herritarren esku utzi du EH Bilduk


Testuan eskatzen zaio Sustapen Ministerioari proiektuak «kontuan har ditzala lurperatze oso baterako beharrezkoak diren baliabide teknikoak»

| 2019-08-02 10:13:00

Jakina denez, joan den uztailaren 5ean Espainiako BOEk Gasteizen Trena Integratzeko Azterlan Informatiboaren testu osoa argitaratu zuen, eta uneotan 45 eguneko epea irekita dago dokumentuaren audientzia publikoa egiteko. Prozedura horren barruan, herritar gutiek dute aukera aipatutako agiriari alegazioak aurkezteko.

EH Bilduren aburuz, ministerioak aurkeztu duen agiriak dituen gabezi ezberdinen artean, esanguratsuenetako bat da ez duela hirian lurperatze oso bat egiteko aukera bera ere kontuan hartzen. Hau da, egungo proiektutik kanpo uzten ditu Salburua eta Zabalgana, eta ez du inolako aurreikuspen teknikorik egiten etorkizunean lurperatzea bi auzo horietara hedatzeko. Auzo horiek proieketurako aintzat hartu ez izanak, gainera, kezka sortu du trena lurperatu gabe igarotzeak eragin ditzakeen ondorioak direla-eta.

Interesa duten Salburuko eta Zabalganako auzokideei prozedura errazteko asmoz, EH Bilduk alegazio eredu orokor bat prestatu du. Testuan eskatzen zaio Sustapen Ministerioari proiektua berrikustea, aintzat hartzeko «hirian lurperatze oso bat emateko beharrezkoak diren aukera eta baliabide teknikoak, Salburua eta Zabalgana barne, obren gauzatzea fase ezberdinetan aurreikusi arren».

Koalizioak Gasteiz.ehbildu.eus webgunean testua eskura jarri du, erabili nahi duten auzokideek deskargatu eta Sustapen Ministeriora bidaltzeko aukera izan dezaten, audientzia publikoaren epea amaitu baino lehen, irailaren hasieran.