AKTUALITATEA

EH Bilduk salatu du EAJ eta PSE martxoaren 3ko memorialean memoria-elkarteen parte hartzea galarazten ari direla

| 2023-01-16 14:10:00

EH Bilduk salatu du udal gobernuak alde batera utzi dituela Martxoak 3 eta Memoria Gara memoria-elkarteak martxoaren 3ko biktimen memorialaren sorreran. Egoera hori berriro ere agerian geratu da estatutuak sortzeko prozeduran. «Memoria Gara eta Martxoak 3 elkarteek etengabe galdetzen diote Udalari estatutuei buruz, ekarpenak egin ahal izateko. Bi urtez erantzunik jaso gabe egon ondoren, orain 72 ordu eman zaizkie proiektuaren oinarri izango diren estatutuak irakurri eta aztertzeko. Hori da EAJ-PSEren gobernuaren egiteko moduaren beste adibide bat, berriro ere memoria-elkarteen parte-hartzea eragozten ari dira», adierazi du Alberto Porras EH Bilduko zinegotziak.

Izan ere, joan den ostiralean helarazi zitzaien memoria-elkarteei estatutuei buruzko dokumentazioa, eta 72 orduko tartea eman zitzaien erantzuteko eta jakinarazteko gaia gaur egindako bizikidetza Batzordeari helaraziko zitzaiola. Hau da, ez zaie elkarteei denbora nahikorik eman biltzeko eta erantzun bat eman ahal izateko. «Haiekin kontatuko dutela esaten diete, baina ez da egia. Martxoak 3 eta Memoria Gara elkarte memorialistek martxoaren 3ko biktimen memorialaren sorreraren alderdi guztietan parte hartzea ezinbestekotzat jo du EH Bilduk, are gehiago proiektuaren oinarrietan, hala nola, estatutuen kasuan. Haien ekarpenak entzun eta kontuan hartu behar dira», ziurtatu du EH Bilduko zinegotziak.