AKTUALITATEA

| 2026-07-03 07:35:00

Hiriaren egoerari buruzko eztabaidaren bigarren saioan, Gasteizen, EH Bilduk azpimarratu du «herritarren agindua betetzeko» eta «Gasteizek aurrera egin dezan» legegintzaldiko azken urtea aprobetxatu behar dela. Rocio Vitero EH Bilduko bozeramaileak hartu du hitza bere alderdiaren izenean, eta legegintzaldi honetan akordioek udalerriaren erronkei aurre egiteko duten garrantzia defendatu du: «Herritarrek agindu argia eman ziguten duela 3 urte, eta gaur egun ez da ezer amaitzen. Oso eztabaida garrantzitsuak geratzen zaizkigu, eta uste dugu badagoela tarterik Gasteizek aurrera egin dezan proiektu gehiago betetzeko eta abian jartzeko».

Gainera, ongizatearen estatua eta aurrerapen sozialak mehatxatzen dituen olatu erreakzionarioaren aurrean, adostasun zabalak beharrezkoak direla aldarrikatu du Viterok. «Euskal Herria Bilduk argi dauka bere jarrera olatu erreakzionarioaren eraso honen aurrean, eta akordio zabalak, gobernu partekatuak eta herritarren arazo, eskaera eta beharren aurrean erantzun publiko indartsu eta argiak etorri beharko dira. Guk argi daukagu. Galdera da: Zuek ere baduzue?», galdetu du.

Viterok gogorarazi du Euskal Herria Bilduk erakutsi duela herritarren interesak alderdikoien aurretik jartzen dituela, arduraz eta ikuspegi zabalaz jokatzen duela, eta eskua luzatuta duela akordio zabalak eta sakonak lortzeko. «Hala izaten jarraituko du legegintzaldia amaitu arte. Ea gainerakoek argi duten, edo beren interes alderdikoiak inposatuko diren, udal-gobernua osatzerakoan gertatu zen bezala».

Aldaketaren bultzatzaile

Bozeramaileak EH Bilduren papera defendatu du «aldaketarako bultzatzaile» gisa, legegintzaldi honetan erantzukizunez jokatu baitu 2023ko hauteskunde-kanpainan agindutakoa betetzeko. «Zarataren eta konfrontazioaren aurrean, intentsitatez eta diskrezioz lan egiten jakin dugu. Erakutsi dugu, oposizioan egon arren, funtsezkoak eta ezinbestekoak izan gaitezkeela Gasteizi egonkortasuna eta gobernagarritasuna emateko».

Euskal Herria Bildu bere ekintza politikoaren bidez saiatu da udal honen pultsua aktibatzen eta bere ahaleginak lehentasun eta behar sozialekin lerrokatzen. Horrela, akordio garrantzitsuak lortu ditu, Gasteizerako proiektu eraldatzaileetan eta herritarrentzako zerbitzu gehiago eta hobeetan gauzatu direnak.

«EH Bilduk hiru aurrekontu-akordioen bidez sartutako partidei dagokienez (27 milioi euro baino gehiago), esan dezakegu 10 eurotik 8,5ek eragin zuzena dutela jarduera ekonomikoaren sustapenean. Besteak beste, etxebizitza berriak eraikitzeko, adinekoentzako edo bazterketa-arriskuan dauden pertsonentzako zerbitzu berriak eskaintzeko, enpresa-ehuna deskarbonizatzeko, energia garbietara igarotzeko, auzoetan hobekuntzak egiteko, merkataritza-jarduera eta enplegua sortzeko diruarekin egindako partidei buruz ari gara. Gasteizi zerbitzu gehiago eta hobeak ematea», gogorarazi du Viterok.

Proposamen horietako batzuen emaitzak honako hauek izan dira, besteak beste: 6 etxebizitza-bloke birgaitzea Alde Zaharrean, gazteentzako alokairu babestura bideratzeko; gure laguntzen bultzadari esker, 84 saltoki irekitzea hirian; hogei bat energia-komunitate sortzea; Goya gasolindegia birgaitzeko eta eraldatzeko proiektua; AMVISAren etorkizuna bermatzeko akordioa; eta fiskalitatearen arloan justizia eta progresibitatea areagotzea, egoera zaurgarrienean dauden pertsona eta familiei hobariak handituta.

Hala ere, EH Bilduko bozeramaileak berretsi du oraindik eztabaida asko daudela Udalean legegintzaldia amaitu aurretik, eta horien artean dagoela eztabaida fiskala. Eztabaida horrek, zalantzarik gabe, nazioarteko testuinguruaren ondorioetatik at geratuko ez dena. «Gerren kostuak gure bizilagunen poltsikoan eragina dute. Ikusiko dugu nola eboluzionatzen duen ekonomiak udan, baina EH Bilduren irteera posizioa zuhurtzia handikoa da. Zerbitzuak ematea bermatu behar da, zalantzarik gabe, baina, nolanahi ere, tasei eta zergei dagokienez, eguneratze oso moderatuak izan beharko lirateke, halakorik balego. Izan ere, Udal hau ezin da errealitate globaletik at egon», amaitu du.