Elgoibar

Herriko mugikortasunarekin kezkatuta badago, itxurakeriak utzi eta eragile guztiekin elkarlanean konponbide integrala lantzeko eskatu dio EH Bilduk Udalari

| 2019-12-11 16:42:00

 

Mugikortasun Astearen barruan proposatutako neurriek herriko merkatarien artean ezinegona sortu duela gogoratzearekin batera, herri autobusa eta industrialdeetara langileak eramateko autobus publikoa martxan jartzea proposatu du ezker subiranistak 

 

Mugikortasun Iraunkorraren Astea izendatu du Elgoibarko Udalak abenduarek 9tik 15erakoa, eta ekimen horren barruan, herriko erdiguneko kaleak (San Frantzisko, Errosario, San Bartolome eta Santa Ana) motordun ibilgailuentzat itxi ditu. Ibilgailuak erdigunetik ateratzeko helburua ontzat ematen du EH Bilduk, baina ez du kontuan hartzen horrek dituen ondorioak. Hain justu, Udalak modu aldebakarrean hartutako erabaki horrek kalteak eragin dizkie herriko merkatariei, haserreak eta ezinegonak eraginez. EH Bilduk gogoratu nahi du nahikoa zailtasun dituztela herriko merkatari txikiek beraien egunerokoan, gabon sasoian, irabaziak izan ditzaketen sasoian, zailtasun handiagoak ipintzeko. 

 

Izan ditzakeen ondorioak kontuan izan gabe eta kaltetuak izan daitezkeenak kontuan izan gabe erabakiak hartzea eta praktikan jartzea salagarria dela uste du EH Bilduk, politika egin eta instituzio publikoak kudeatzeko modu eta estilo bat agerian uzten duelako. 

 

Mugirkortasunarekin benetan kezkatuta badago, arazoari adarretatik heldu eta konponbide integrala mahai gainean jartzeko eskatzen dio EH Bilduk Elgoibarko Udalari. Urteko 7 egunetarako hartzen diren neurriek itxura egiteko balio dezakete eta herritarrak kontzientziatzeko, baina ez dira benetako soluzioak. Zentzu horretan, arazoari konponbide integrala emateko gaia modu serioan landuko duen mahaia sortzea proposatzen du Elgoibarko EH Bilduk, eta mahai horretan arlo guztietako eragileek parte hartzea. 

 

EH Bildu ere aspalditik dago kezkatuta herriko mugikortasunaren arazoekin eta horrek herriaren erdigunean daukan eraginarekin. Era horretara, bi neurri proposatzen ditu ezker subiranistak, konponbide gisara: auzoetatik erdigunera herritarrak hurbiltzea errazteko, herri autobusa martxan jartzea. Modu horretara, autoak aterako lirateke erdigunetik eta aparkalekuekin Elgoibarrek daukan arazoari irtenbidea emango zitzaion. Aldi berean, ordu jakin batzuetan errepide nagusian izaten diren auto-pilaketak ikusita, industrialdeetara langileak eramateko autobus publikoak jartzea proposatzen du EH Bilduk.

Plazara egitasmoa aurkeztuko die ostegunean EH Bilduk Elgoibarko eragileei

| 2019-11-25 21:04:00

 

Hauteskunde kanpainan iragarri zuen Elgoibarko EH Bilduk Plazara egitasmoa aurkeztuko ziela herriko eragileei, auzolanean udalerriari zuzendutako kultur eskaintza integrala lantzen hasteko helburuarekin. Joan den urrian, Aita Agirre kulturgunearen inaugurazioaren bezperatan, kezkatuta azaldu zen ezker subiranista, udalerriarentzat inbertsio ekonomiko handia suposatu zuen eraikinarekin lotuta ez zegoelako kultur eskaintza ganorazkorik. “Mamirik gabeko oskola” zela esan zuen orduan. Hiru hileko epean, eragileekin bilera egiteko konpromisoa hartuz zuen orduan. 

 

Ostegunerako deitu du bilera EH Bilduk, Aita Agirreko areto nagusian, arratsaldeko 18:00etan.Bertara deituta daude sektore ezberdinetako herriko eragileak, baina batez ere kultur eskaintzarekin harremana daukaten eragileak eta norbanakoak. 

 

Urrian egindako agerraldian, Aita Agirre kulturguneko kultur eskaintza taberna kudeaketuko zuen pertsonaren esku geratuko zela-eta kezka azaldu zuen ezker subiranistak, gerta zitekeelako pertsona horrek kultur kudeaketarekin zerikusia ez izatea. Gainera, Udalak jarritako baldintza (kultur egitasmo bat hilean) eskasa zela azaldu zuen. Orduan mahai gainean jarritako zalantzak baieztatu egin dira. Hedabideetatik ezagutu da Aita Agirreko taberna kudeatuko duen pertsonak kultur eskaintzarekin harremanik ez daukala eta, okerragoa dena, egin dituen adierazpenen arabera ostalaritza eskaintza erabat lehenesten duela, kultur egitasmoa bigarren mailan utzita. 

 

Horretaz guztiaz hitz egiteko eta udalerriak merezi zuen kultur egitasmoa auzolanean lantzen hasteko helburuarekin, herriko eragileekin lan saioa egingo du EH Bilduk ostegunean. Plazara proiektua herrigintza proiektu bat da. Kontuan hartzen dituena, ikuspegi integral batetik abiatuz, sormen, gizarte eta kultur alorreko eduki eta ikuspegi ezberdinak. Alegia, gure kultur eragile eta sortzaileen beharrei erantzuteaz gain eta kultura sustatzeko eta hedatzeko bitartekoak eskaintzeaz gain, Plazara proiektuak herrigintzarekin zerikusia duten arloak jorratuko lituzke: bizikidetza, herri kohesioa, gazteen eta ez hain gazteen aisialdia, tokiko garapena eta auzolana.

ALBISTEAK

EH Bilduk San Antolingo araztegiaren inguruko airearen eta uraren kalitateari buruz galdetu die administrazioei

2020-03-10 19:06:00

Elgoibarko EH Bilduk idazkiak bidali dizkie Elgoibarko Udalari, Gipuzkoako Foru Aldundiari, Eusko Jaurlaritzako Ingurumen Sailari eta Ura Agentziari, San Antolin araztegiaren inguruan airearen eta uraren kalitatearen inguruan hainbat galdera eta eskaera eginez.