AKTUALITATEA

Gardentasunaren eta zuzentasunaren alde udal-kudeaketan

| 2025-01-31 09:22:00

Udalak landa-bide batzuk konpontzea erabaki zuen iaz, baina aukeratutako landa-bideetako bi ez zeuden titulartasun publikoko ondasunen inbentarioan, ezta Elgoibarko landa-bide publikoen mapan ere.

Foru-arauak bi bide horien izaera juridikoa argitzeko ezartzen dituen baldintzak aztertu ondoren, horietako batek publikoa izateko baldintzak beteko lituzke; hala ere, 2013an landa-bide guztiak publiko egin zirenean, bide horren izaera juridikoa ez zen aldatu, ez zen publiko egin, eta, beraz, ez zen ondasun publikoen inbentarioan sartu, ezta udal erreferentziako mapan ere.

Beste bidearen kasuan, ez ditu betetzen foru arauak bide publikoa izateko ezartzen dituen baldintzak.

Ondorioz, bi bideen izaera pribatua ikusita, eta bi kasuetan legeak ezarritako prozedurei jarraitu ez zitzaienez, EH Bilduk idatzizko informazio eskaera egin zuen gaia argitzeko. Erantzunik ez jasotzean eta Lurralde Batzordean azalpenik ez emateak, kontuan hartuta bi bide pribatu diru publikoz asfaltatu zirela, EH Bilduk Iñigo Loiolaren dimisioa eskatu zuen, Lurralde Batzordean eta Debemenen zituen ardurengatik, diru publikoa gaizki erabiltzeagatik.

Osoko Bilkuran alkateak gai honen eztabaidan lehen sektoreak duen garrantzia azpimarratu zuen, gaiaren muinean sartu gabe, bide horiek publikoak izan zitezkeela justifikatzen zuen daturik eman gabe; izan ere, foru arauak adierazten zituen baldintzak indartu egiten zuen gure tesia, alegia, bi bide horiek ez daudela bide publiko gisa jasota.

Prozedurak, erakundeetako arduradunek erabakiak behar bezala hartzen dituztela ziurtatzeko eta herritarrei bermeak emateko dago. Eta berme hau diru publikoa erabili aurretik bete behar da, ez alderantziz. Beraz, osoko bilkuran larriak iruditu zitzaizkigun alkatearen adierazpenak, ekintza prozeduraren gainetik lehenesten zutela esan zuenean "Zer nahi duzue, burokrazia beharraren aurretik jartzea?

EH Bilduren betebeharra da udal gobernuaren kudeaketa kontrolatzea, funts publikoen erabilera egokia bermatzea, eta horretan jarraituko dugu, elgoibartarren arteko berdintasuna eta bizi kalitatea hobetu dezaketen proiektuak eta programak proposatuz eta sustatuz.

(BIDEOA IKUSTEKO)