AKTUALITATEA

| 2025-12-29 10:42:00

EH Bilduk ez du onartu Bizkaiko 2026ko aurrekontuen proposamena. Bizkaitarrek behar dituzten kontuak ez direla argudiatuz egin du. Aitor Lopez batzarkideak azaldu duenez, «mundua eraldaketa-prozesu batean murgilduta dago, eta Bizkaia ez da uharte bat, ezta salbuespen bat ere, erronka estrategiko handiei erantzun behar diena eta politika eraldatzaileak egin behar zaizkiena. Aurrekontuak horiek egiteko tresna gisa erabili beharko genituzke».

EH Bilduren iritziz, Aldundia kudeaketa hutsetik gure lurraldeko politika eraldatzaileen lidergo politikara igaro beharko litzateke. «Uste badugu zaintza-politikak eraldatu egin behar direla, erronka demografikoari aurre egin behar diogula edo mugikortasun iraunkorreko eredu berri baterantz eta gure ingurune naturalarekin harreman berri baterantz joan behar dugula, aurrekontuak erabili beharko genituzke horretarako palanka gisa. Arlo horietan, Aldundiak ezin dio errealitateari muzin egin, eskumenak eta gaitasuna ditu eraldaketa horien buru izateko», gaineratu du Lopezek.

Foru Gobernuaren aurrekontuek ez dute, EH Bilduren ikuspegitik, «ez anbiziorik ez gaitasun eraldatzailerik. Aurrekontu horien arima kontinuismoa eta inertzia dira. Kuantitatiboki, lehendik genituen gabeziei fiskalitatean izandako aldaketek eragindako kalteak gehitu behar zaizkie; hartutako neurriak 83 milioi € dira, aurrekontuak txikituta».

Horren aurrekaria EAJk EH Bildurekin aurrekontuak negoziatzeari uko egin izana da, abenduaren 12ko osoko bilkuran kontuak itzultzeko eskatzera eraman baitzuen alderdi subiranista. EH Bildu prest agertu zen aurreko urteko negoziazioa eta akordio arrakastatsua izan ziren baldintza beretan negoziatzeko, eta horretarako EH Bildurentzat estrategikoak diren arloak azpimarratu zituen, hala nola zaintzak, trantsizio ekosoziala, etxebizitza, mugikortasuna eta euskara eta kultura.

Baina aurten ez da negoziaziorik izan. Erantzuna ezezkoa izan zen, negoziaziorako biderik eman gabe, EH Bilduk abenduaren hasieran egindakoari kontraproposamenik egin gabe. «Eta gure proposamenari ezetza emateko arrazoiak -adierazi du Aitor Lopezek- proposatu genituen neurrietan oinarrituta baino gehiago, EH Bilduk beste lurralde batzuetan izandako jarreran oinarritu ziren. Baieztapen hori paradoxikoa da, iaz Araban eta Bizkaian EH Bildurekin aurrekontu-akordioa lortu baitzen, eta Gipuzkoan ez zen horretarako aukerarik izan, Foru Gobernuak PPrekin ituna egitea lehenetsi zuelako».

Lopezek adierazi duenez, «EH Bildurekin akordiorik ez lortzeko aldez aurreko erabaki politiko bat egon da, betoa, eta hori janzteko arrazoiak aitzakiak izan dira. EH Bildurekin duzuen lehia politikoa lehenetsi duzue, Bizkaiko herritarrentzat positiboak izango liratekeen neurriak eta akordioak bultzatu beharrean. Eta uste dugu erabaki hori alderdian hartu dela, ez Aldundian, ezta Batzar Nagusietan ere».