Bilbo

EH Bildu Bilbok emakumeentzat arriskutsuak izan daitezkeen guneak ezabatzeko mozioa aurkeztu du

| 2019-10-25 12:24:00

Euskal Autonomi Erkidegoko Fiskaltzak jakinarazi duenez, 2018. urtean Euskal Autonomi Erkidegoan sexu delituek %25 egin dute gora. Bilbori dagokionez, zoritxarrez, azken garaietan hainbat eraso sexual gertatu izan dira. Joan den abuztuan emakume bat sei gizonek bortxatu zuten Gas plazan; irailean 25 urteko emakume bat bahitu eta bortxatu zuten Atxurin. Irailean baita ere bi egunetan soilik sexu erasoengatik hiru salaketa eman ziren: bata emakume bati Uribarriko jaietan, bestea Gas Plazan eta hirugarrena Boluetako diskoteka baten aurrean. Azken leku honetan 18 urteko neska gazte batek urrian ere beste sexu eraso bat salatu du.

 

Indarkeria matxista kasuen jatorria da gizonen eta emakumeen arteko egiturazko ezberdintasuna. Emakume izate hutsagatik edozein emakumek sufritu dezake indarkeria. Ezinbestekoa da era ezberdinetako neurriak hartzea, eta horietako bat gure hiriko gune arriskutsu guztiak ezabatzea izan beharko litzateke, emakumeok seguru ez sentitzen garen tokiak, hain zuzen ere. Ildo horretan, gaur, hemen, Bilboko puntu arriskutsuetako batean, EH Bilduko emakumeok, urriaren 31ko Osoko Bilkurara aurkeztu dugun mozioa aurkeztera gatoz.

Mozio horretan egun indarrean dagoen Bilboko “Emakumeentzako Hiri Debekatuaren Mapan” (2010-2011) sei hilabeteko epean berraztertzea eta gaurkotzea eskatzen dugu, emakumeen taldeekin eta talde feministekin elkarlanean eta Udaleko sail ezberdinen inplikazioarekin.  Era berean, behin Bilboko “Emakumeentzako Hiri Debekatuaren Mapa” berraztertuta eta gaurkotuta dagoenean, egunerokotasunean emakumeentzat arriskutsuak izan daitezkeen guneak ezabatzeko beharrezko neurriak martxan jartzea eskatzen dugu. Ekimen horiek guztiak aurrekontu batekin onartzea eskatzen dugu baita ere, paperan ez gelditzeko.

Bilboko Emakumeen Kontseiluak, barrutietako kontseiluen inplikazioarekin, 2010-2011 urteetan  “Bilboko Emakumeentzako Hiri Debekatuaren Mapa” egin zuen. Lan horrekin GITE-IPESek 2004-2005 urteetan Bilboko barrutietan egindako “Bilboko Emakumeentzako Hiri Debekatuaren Mapan” ez seguru moduan agertzen ziren guneen egoera berraztertzen zuen. 2010-2011 Mapa egin zenetik zortzi urte pasa dira, eta, hori dela eta, ezinbestekoa da lan hori berraztertzea, berrikustea eta gaurkotzea eta egungo gune arriskutsuak antzematea, horiek ere ezabatzeko helburuarekin.

Indarkeria matxista kasu bat gertatzen den bakoitzean adierazpen instituzionalak egitea ondo dago, baina ezin gara horretan gelditu, haratago joan behar gara eta era ezberdinetako neurriak hartu behar ditugu, horien artean gaur aurkezten duguna. Bilboko Udalak emakumeen aurkako erasoen kontra egiteko benetako borondatea badu, gure proposamena onartzea espero dugu. Emakumeen aurkako biolentziari aurka egiteko guztion artean neurriak hartu behar ditugu, ezin gara adierazpen instituzionaletan gelditu.

EH BILDUk Udalari eskatu dio Gotzaindegiaren eraikin proiektuaren lizentziak geldiarazteko eta aldeen artean irtenbideak adosteko

Iceta gotzainari bilera eskatu dio, proiektu horri buruz adostasunak eta irtenbideak bilatzeko

| 2019-10-24 12:40:00

EH Bilduk mozio bat aurkeztu du Bilboko Udalari eskatzeko Gotzaindegiak Barrainkua 2ko orubean eraikin berria eraikitzeko duen proiektuaren eraiste eta eraikitze lizentziak geldiarazteko, eta parteen artean adostutako irtenbidea bilatzeko lan egin dezala,  Abandoko eremu horretan espazio libre bat izateko aukera ez galtzeko.

Era berean, Jone Goirizelaiak eta Asier Gonzalezek, EH Bildu Bilbo udal taldeko zinegotziek, Mario Iceta Bilboko Gotzainari gutuna helarazi diote batzar bat eskatzeko, aipatutako proiektuaren inguruan adostasunak eta irtenbideak bilatzeko eta proiektu hori birbideratzeko helburuarekin. 

Goirizelaiak azaldu duenez, kontuan hartu behar da egun zein den Barrainkua 2 orubean zazpi solairuko eraikina egiteko espedientearen egoera: eraispen baimena erabaki barik dago eta eraikitzeko baimenik ere ez du oraindik. Era berean, Euskadiko Auzitegi Gorenak tramitera onartu du 2018an Ekologistak Martxan taldeak orubearen xehetasun azterketaren kontra aurkeztutako helegitea. “Baina, horrez gain, proiektu honen kontra argi eta garbi agertu dira Abando inguruko bizilagunak eta Cervantes eskolako gurasoak”, gaineratu dute.

Eraispen baimenari dagokionez, adierazi dutenez, erabaki gabe dago, izan ere, orube horretan kutsatzailea izan daitekeen jarduera egon zenez,  IHOBEK  dokumentu bidez balioetsi behar du eraisketa, eta Gotzaindegiak ez du oraindik dokumentazio hori aurkeztu.

Palmondoen lekualdatzeari dagokionez, Lorezaintzako azpi-sailak 2019ko irailean xedatutako agirian honakoa esaten du: urriaren 15erako palmondoak lekualdatu ezean 2020 urteko maiatzera itxaron beharko da lekualdaketa egiteko.  “Egun palmondoak leku berdinean jarraitzen dute”, gaineratu dute.

Auzotarrentzako espazio askea

Hori gutxi balitz, EH Bildu Bilboko zinegotziek azpimarratu dutenez, Abando inguruko bizilagunak eta Cervantes eskolako gurasoak proiektu honen kontra agertu dira eta birbideratzea eskatu dute behin da berriz; izan ere, Abando Habitable y Saludable plataformak azaltzen duenez, inguru horretan auzotarrentzako espazio aske bat lortzeko aukera desagertzeko arriskua  dago.

“Garaiz gaude eta beharrezkoa da gaia alde guztien artean eztabaidatzea eta irtenbidea bilatzea”, azpimarratu dute EH Bildutik. Horregatik, batetik, urriaren 31n eztabaidatuko den mozioa onartzea espero dute eta, gainera, Mario Iceta gotzainari eskatutako batzarra onartzea ere bai.