AKTUALITATEA

| 2026-10-28 11:33:00

EH Bilduko udal taldeak Bilboren birnaturalizazioan beste pauso bat emateko ekimen berri bat aurkeztu du gaur. Oraingoan, "itsasadarra hiriaren ardatz egituratzaile gisa berreskuratzea" eskatu du, "bilbotar guztien gozamenerako gune gisa". Horretarako, itsasadarraren kudeaketa publikoa proposatzen du, Bilbao Kirolak-ek espazio publiko hori kirol-azpiegitura gisa gehituta.

Patxi Xabier Fernandez EH Bilduko zinegotziak adierazi duenez, "Bilbok bere itsasadarrarekin zuen lotura berreskuratzea nahi dugu, gure bizitzetan presente dagoen elementu bihurtzea".

Hala, adierazi du mozio bat aurkeztu dutela osteguneko osoko bilkuran eztabaidatzeko, Bilbao Kirolak itsasadarra dinamizatzeaz eta bilbotarrek erabiltzeko eta gozatzeko sor daitezkeen pantalanak eta azpiegitura zehatzak erabiltzeaz arduratzeko eskatuz.

"Ez gara ekimen edo jarduera puntualez ari", zehaztu du, eta gaineratu du jarduera osoaren plangintza bat izango litzatekeela, hala nola "ikastaroak, ekimenak, kirol-eskolak, arraun-kluben erabilerak, piraguismoa, igeriketa irekia edo uretako jolas-espazioak udan, besteak beste".

"Itsasadarra espazio publiko berria izango bada, erabilera eta helburu zehatzak eman beharko dizkiogu", adierazi du. Fernandezen ustez, lasaigune klimatikoan bihurtu behar da,  herritar guztientzako espazio naturala izan behar da.

Horretarako, azaldu duenez, "espazioaren dinamizazio publikoa ezinbestekoa da: dena ezin da pantalan pribatuak eta itsasadarraren gaineko tabernak izan". Ildo horretan, nazioartean arrakasta izan duten hainbat adibide aipatu ditu, hala nola Herbehereetan, Vienan, Katalunian eta Galizian.

"Bilboko Itsasadarraren Plan Berezia eztabaidatzen ari den honetan, une ezin hobea da gure proposamena aurrera eramateko, kudeaketa publikoa defendatzeko eta itsasadarraren kirol-kudeaketa esku pribatuetan ez uzteko. Horrela egiten ez badugu, gure hiria hobetzeko aukera ezin hobea galduko dugu", nabarmendu du.