AKTUALITATEA

Herritarren artean ziurtasuna sortuko duten etorkizuneko aurrekontuak adosteko prest dagoela azpimarratu du EH Bilduk

| 2026-11-04 10:20:00

Maria Del Riok, EH Bilduko udal bozeramaileak, 2027ko aurrekontu proiektua gobernu taldearekin negoziatzeko alderdi subiranista prest dagoela adierazi du. "Hauteskundeetako zarataren eta gero eta zalantzazkoagoa den etorkizunaren aurrean, Bilbok ziurtasuna sortuko duten etorkizuneko aurrekontuak behar ditu, eta horretarako gehiengo zabalak behar dira", adierazi du. 

Ildo horretan, gogorarazi duenez, "iaz, benetako negoziazio bat ematen bazen osoko zuzenketa ez aurkezteko prest agertu ginen, baina ez zen hori gertatu". "Aurten konpromiso hori berresten dugu", nabarmendu du. 

Aurrekontuak eztabaidatzen diren testuinguruari buruz, Del Riok adierazi duenez, "hamaika urteko agintaldian" Juan Maria Aburtok "ez du oposizioko beste alderdien babesarekin aurrekonturik onartzea lortu, aurrekontuak bakarrik onartu baitu beti; Alderdi Popularrarekin egindako bi akordio puntual izan ezik, abstentzioa eragin zutenak". "Aldaketa garaiak datoz, ziurgabetasun garaiak baita, eta gehiengo zabalak batzea beharrezkoa da bilbotarrei ziurtasuna emateko. Aurtengoa Aburto alkateak aurrekontuak adosteko duen azken aukera da", gaineratu du.

Hori dela eta, "gobernantza kooperatiboko formulen alde" egiteko eta, "hauteskunde bezperetan beti sortzen den zarataren aurrean", "hauteskunde ikuspegiarekin jokatu beharrean hiri ikuspegiarekin joka dezala" eskatu dio Del Riok alkateari. Hortaz, talde ezberdinen kapital politikoa aprobetxatzera animatu dio eta etorkizuneko aurrekontuei ekarpenak egiteko EH Bilduk duen prestutasuna agertu du. 

Bilboren norabidea elkarlanean erabakitzea 

Hori horrela, EH Bilduko bozeramailearen esanetan, "errealitateak erakusten digu aldaketa-garaian gaudela, gehiengo berriekin eta errealitate konplexuagoekin", eta, beraz, "Bilborako norabide bat modu bateratuan zehazteko beharra agerikoa da". 

"Ezin dira gauzak orain arte egin diren bezala egin. Emaitza desberdinak nahi baditugu, gauzak modu desberdinean egin behar ditugu, maitasun eta lan gehiagorekin ", azaldu du, etxebizitzako partida adibide gisa jarri duen bitartean. "Etxebizitza-krisiari ezin zaio 326.000 euro gehiagorekin aurre egin, ezinezkoa da, Bilbon etxebizitza batek balio duena da, gutxi gorabehera", adierazi du.