Bilbo

EH Bildu Bilbok LGTBI+ baliabideen udal gunea sortzeko mozioa aurkeztu du

| 2019-08-09 13:42:00

Bruno Zubizarretak EH Bildu Bilboko zinegotziak jakinarazi duenez, Bilboko Udal Gobernuari LGTBI+ baliabideen udal gunea sortzea eskatzeko mozioa aurkeztu du EH Bilduk Udalean. Espazio horrek, zehaztu duenez, bereziki, bi lan ildo izango ditu: “batetik, informazio, babesa eta LGTBI+ ahalduntzea sustatzeko zerbitzua izatea; eta, bestetik, sexu-aniztasunarentzat harrera zerbitzua izatea”.

Ildo horretan, Zubizarretak azaldu duenez, azken hamarkadetan aurrerapauso asko eman dira LGTBI+ pertsonen eskubide formalei dagokienez, baina “oraindik bide luzea daukagu errespetuzko eta bidezko gizarte bat lortzeko”; izan ere, LGTBI+ kolektiboak “jipoiak, eskoletan jazarpena eta lan arloan gutxiespena sufritzen ditu eta eleizaren alde batek konbertsio terapiak ezartzea defenditzen jarraitzen du”.

Horregatik, bere esanetan, “beharrezkoa” da “sexu-identitateagatik edota genero adierazpenagatik diskriminazio forma guztiak ezabatuko dituen eta arlo guztietan tratu berdintasuna eta aukera errealak bermatuko dituen gizarte baten alde aurrerapausoak ematea”. Hori lortzeko, Zubizarretak azpimarratu duenez, “ezinbestekoa” da “Bilbon sexu eta genero aniztasunari buruzko topaketa eta hausnarketa gunea sortzea, Iruñak eta Bartzelonak daukaten moduan”.

Zubizarretaren ustez, iraileko Osoko Bilkuran “udal gobernuak mozio hau onartuko du, LGTBI+ kolektiboarentzat nahitaezko baliabide bat delako”. Era horretan, gogoratu duenez, Bilboko Udalak “70.000 euro baino gehiago bideratu ditu irailaren 20tik 22ra  Euro Pride Bilbon antolatzeko egingo den asanbladara eta Bilbao Bizkaia Harro 2019ra 60.000 euro baino gehiago bideratu zituen”.

“Aipatutako ekitaldietara 130.000 euro baino gehiago bideratzen dituela kontuan hartuta, Bilboko Udal Gobernuak ez luke inolako eragozpenik izan behar LGTBI+ baliabideen udal gunea sortzeko, udal baliabide integrala eta LGTBI´kolektiboa ahalduntzen duena, hain zuzen ere”, adierazi du.

Azkenez, Zubizarretak adierazi duenez, “Bilbo LGTBI kolektiboarekiko diskriminazio eta biolentzia gabeko hiri askea, errespetuan oinarritutakoa, benetako berdintasun normalizatuarekin eta aurreiritzi gabekoa izatea nahi badugu, Udal Gobernuak aukera aparta du helburu horretan aurre egiteko”.

 

EH Bildu Bilbok ‘Jaietan ere, emakumeok libre’ sentsibilizazio kanpainaren neurriak martxan jartzeko beharrizana azpimarratu du

| 2019-08-08 15:12:00

Jone Goirizelaiak, EH Bildu Bilboko bozeramaleak, gogoratu duenez, uztailean ‘Jaietan ere, emakumeok libre’ kanpaina abiarazi zuen EH Bilduk eta horren barne proposatutako neurriak martxan jartzea beharrezkoa dela gaineratu du.  Ildo horretan, gogoratu duenez, kanpainaren neurri bat da ezinbestekoa dela jai egitarauan mezu, irudi edo hizkuntza sexistarik ez erabiltzea.

Horrela, Bilboko Udalak C. Tangana jai egitarauan aurreikusteak emakume eta talde feministen artean eragin dituen kritikak  “ulertzen dituela eta bat egiten duela”, adierazi du, DJ horren “emakumeen kontrako mespretxuzko letra matxistengatik”. Horregatik, EH Bildu Bilboko bozeramaleak “begi onez” ikusi du Bilboko Udala C. Tangana jai egitarautik kentzeko lanean egotea.

“Hori ez da ez askatasun artistikoaren ez adierazpen askatasunaren kontra egotea; izan ere, emakumeak eta bere eskubideak errespetatzen diren gizarte bat nahi badugu, ezin dugu hizkuntza sexistarekin beteriko ekitaldiak ahalbideratu, zuzenean emakumeen eskubideen kontra doazelako” gaineratu du.

Goirizelaiak adierazpen hauek egin ditu  gaur, Aste Nagusiko Beatriz Sever Egaña pregoilariaren eta Itsasne Nuñez  txupineraren aurkezpenean egon ondoren.  “Bilboren eta Bilboko jaietako ordezkari bikainak izango diren bi emakume hauei zorionak eman dizkie bihotz bihotzez” EH Bildu Bilboko ordezkariak.  

Neurriak

Goirizelaiak adierazi duenez, “egiazko jai parekideak eraiki” behar ditugu; izan ere, “emakumeek eta gizonek ez dute askatasun eta behar berdinekin jokatzen jaietan eta jai eremuetan”. Ildo horretan, EH Bilduk ‘Jaietan ere emakumeok libre’ kanpainaren barne martxan jarritako neurriak gogoratu ditu eta martxan jartzeko beharra aldarrikatu du.  

Proposatutako neurrien artean honakoak aipatu ditu: jaietarako indarkeria matxistari aurre egiteko protokoloa, jaien aurretik autodefentsa feminista ikastaroak, eraso sexistei buruzko kontzientziazio kanpainak… Era berean, Goirizelaiaren esanetan, jaietan eta espazio ludikoetan  sortzen diren jardun, portaera, bizitzeko modu desberdinak, rolak… identifikatzea eta parekidetasuna lantzeko tailerrak zein espazioak aktibatzea ere “garrantzitsua” da.

Ildo horretan, azpimarratu duenez, ezinbestekoa da jai egitarauetan eta komunikazioko materialetan mezu, irudi edo hizkuntza sexistarik ez erabiltzea eta  gizonen eta emakumeen aniztasuna (adina, jatorria, sexu orientazioa, genero adierazpena...) ikusaraztea.

Indarkeria matxistari aurre egiteko neurriak martxan jarri behar diren moduan, askatasun afektibo-sexualaren kontrako indarkeriari ere aurre egin behar diogula, LGTBIQ koleltiboekin elkarlanean, nabarmendu du Goirizelaiak, izan ere, “sistema heteropatriarkalean oinarrituta dauden indarkeriak dira biak”.

EH Bilduko ordezkariak gogoratu dutenez, “aipatutako neurriak eta beste batzuk proposatu genituen uztailean eta espero dugu martxan jartzea jai parekideak lortzeko helburuarekin”.

 

EH BILDUk Bilbok airearen kalitatea uztailean Bilbon txarra izan dela ohartarazi du eta Udalari azalpenak eskatu dizkio

| 2019-08-05 10:18:00

EH Bildu Bilbok uztailean airearen kalitatea Bilbon “txarra” izan dela ohartarazi du, Arraiz mendian Eusko Jaurlaritzak airearen kalitatea neurtzeko duen estazioaren datuen arabera. Horrela, Alfonso Gilen, Mugikortasun eta Jasangarritasun sailaren zinegotziaren, agerraldia eskatu du, “uztailaren 2, 4, 10, 11, 12, 13, 15 eta 16an Bilbon izandako airearen kalitate txarrari buruz azalpenak emateko; izan ere, egun horietan  PM partikulen baloreak oso altuak izan dira”.

“Egun horietan, ordu askotan, hamar ordu baino gehiagotan, hain zuzen ere, airearen kalitatea txarra izan da eta kezkatuta gaude”, adierazi du EH Bildu Bilbok. Gainera, ez Eusko Jaurlaritzaren Ingurumen Sailak ez Bilboko Udalak egoera horri buruzko azalpenik ez ematea salatu du.

EH Bilduren ustez, airearen kalitatea txarra denean “zentzuzkoa” da inguruan bizi diren herritarrei “abisua ematea eta jarraibide batzuk ezartzea, edo, behintzat, egoera horretan zergatik gauden azaltzea, kontuan hartuta, Osasunaren Mundu Erakundearen arabera, PM partikulak osasunarentzat kaltegarriak direla eta horien baloreak oso altuak izan direla”.

Egoera horren aurrean “ezin dela besoak uztarturik” gelditu adierazi du EH Bilduk. Horrela, batetik, Eusko Legebiltzarrean hainbat galdera aurkeztu ditu eta, bestetik, Bilboko Udalean Gilen agerraldia eskatu du, “bilbotarron osasunak kezkatzen gaituelako eta Arraizeko estazioak momentu batzuetan normalak ez diren kontaminazio mugak adierazi dituelako”.

EH BILDUk Bilboko sexu erasoa gogor salatu du, biktimari bere elkartasun eta babes osoa helarazi dizkio eta deitzen diren mobilizazioetan parte hartuko duela jakinarazi du

| 2019-08-02 11:18:00

EH Bildu Bilbok “gogor salatu” du gauerdian Bilbon gertatutako sexu erasoa eta erasoa pairatu duen emakumeari bere “babes eta elkartasun” guztia helarazi dizkio. Era berean, eraso sexista larri hau salatzeko deitzen diren mobilizazioetan parte hartuko duela jakinarazi du EH Bildu Bilbok.

Bruno Zubizarretak EH Bildu Bilboko zinegotziak adierazi duenez, “indarkeri sexista kasu larri berri baten aurrean gaude eta horren jatorria da gizonen eta emakumeen arteko egiturazko ezberdintasuna”. “Emakume izate hutsagatik edozein emakumek sufritu dezake indarkeria”, salatu du.

Horrela, EH Bildu Bilbok azpimarratu duenez, “arazoaren larritasunaren aurrean, instituzioek premiazko erantzun integrala” eman behar dute eta “prebentzioan eta heziketan egiten denaz gain, emakumeek zein erasoek dituzten berezitasunak aintzat hartu behar dira”. “Berdintasun politika aktiboak aldarrikatzen ditugu”, nabarmendu du.

Era berean, EH Bilduko zinegotziak Bilboko Udalari eskatu dio eraso sexisten “jarraipen berezia” egiteko “berriro erasorik ez gertatzeko”. Horrez gain, Zubizarretak gogoratu duenez, orain dela aste batzuk EH Bilduk jaietan eraso sexistak saihesteko kanpaina abiarazi zuen eta hainbat neurri proposatu zituen. “Ezinbestekoa da neurriak martxan jartzea edozein motatako eraso sexista saihesteko”, aldarrikatu du.

EH BILDUk Bilboko Udalari larrialdi klimatiko egoera deklaratzeko eta aurre egiteko politika eraginkorrak martxan jartzeko eskatu dio mozio baten bidez

| 2019-07-30 12:59:00

EH Bildu Bilbok adierazi duenez, “larrialdi klimatikoak datozen urte eta hamarkadetako agenda baldintzatuko du, gure ongizatearentzako mehatxu nagusienetarikoa baita, benetako zibilizazio erronka bat”. “Mundu mailako eta Euskal Herriko egoera eta joerak ez du baikortasunerako tarte handiegirik uzten, are gutxiago geldotasunerako. Gazteentzako dagoeneko kezka nagusia bihurtu da, ez bakarrik larrialdia, baita gaiari ematen zaion erantzun politiko eskasa ere”, adierazi du.

Egoerari aurre egiteko, EH Bildu Bilbok mozio bat aurkeztu du eta, horretan, Bilboko Udalari eskatu dio “larrialdi klimatiko egoera deklaratzeko eta, bere eskumenen baitan, klima-aldaketari aurre egiteko politika eraginkorrak garatzeko konpromiso irmoa adierazteko”.

Era berean, aurkeztutako proposamenean, EH Bilduk honakoa proposatzen du: Bilboko Udalak Eusko Jaurlaritzari “larrialdi klimatiko egoera deklaratzea eskatzea eta horri aurre egiteko beharrezkoa den karbonagabetze prozesua 20140. urtera aurreratzeko moduko plangintza eta politikak abiatzea eskatzea eta baita klima- aldaketaren eraginez pairatuko ditugun ondorioetara egokitzeko neurriak hartzera premiatzea ere”.

Horrez gain, EH Bildu Bilborentzat garrantzitsua da Bilboko Udalak “8 hilabeteko epean klima-aldaketa eragiten duten udal eskumeneko faktore guztiei buruzko diagnosi bat eta 4/2019 Jasangarritasun Energetikoaren Legearen garapena udalerrira egokitzeko hurbilpen lan bat egitea”. 

Egoeraren diagnosia kontuan hartuta, Bilboko Udalari prozesu parte-hartzailea martxan jartzea eskatu dio EH Bildu Bilbok, “herritarren, auzoen eta beste edozein eragileren ekarpenak barne bilduko dituen plangintza osatzeko 2020. urtean” eta plangintza hori aurrera eramateko beharrezkoak diren bitarteko tekniko zein ekonomikoak.

Azkenez, Bilboko Udalari proposatzen dio, klima-larrialdi egoera dela medio, irailaren 27an deituta dagoen nazioarteko grebarekin bat egiteko eta herritar guztiak parte hartzera animatzeko eta aipatu mozioa Bizkaiko Foru Aldundiari, Eusko Jaurlaritzari eta Espainiako trantsizio ekologikorako ministerioari bideratzeko.

“Mozio honen bitartez, egoeraren larritasuna aitortzea dugu helburu, Larrialdi Klimatikoari behar besteko arreta ipintzeko asmoarekin, aurrerantzean politika publiko guztiak Larrialdi Klimatiko egoeraz kutsa daitezen”, adierazi du EH Bildu Bilbok.