Bilbo

EH Bilduk azalpenak eskatu ditu BAM Magisteritza eskola eraisteko baimena berehala ematearen inguruan

Abaunza, Narbaiza eta Gilen agerraldia eskatu du, hirigintzaren eremuaz gain, hezkuntzaren eta osasunaren esparruari eragiten dion gaia delako

| 2021-03-17 12:02:00

EH Bildu udal taldeak, espedientea kontsultatu eta BAM Magisteritza Eskola eraisteko lizentzia berehala emango dutela egiaztatu ostean, azalpenak eskatu dizkio gobernu taldeari. Ildo horretan, Asier Abaunza Obra, Hiri Plangintza eta Proiektu Estrategikoetako zinegotziaren, Koldo Narbaiza Euskara eta Hezkuntza zinegotziaren, eta Alfonso Gil Mugikortasun, Ingurumen, Hiri berroneratze eta Garapen Osasungarriko zinegotzi koordinatzailearen agerraldia eskatu du; izan ere, gai horrek hirigintzaren eremua gainditzen du, Cervantes ikastetxeko hezkuntza-komunitatearen hezkuntza-eremuari eta osasunari ere eragiten baitie. 

Alba Fatuarte EH Bilduko zinegotziak adierazi duenez, "etsipenez eta kezkaz" ikusten du "beste behin ere, haurren osasunerako eskubidea ez dela Udal Gobernuaren lehentasuna, konstruktoraren, Gotzaitegiaren eta Mutualiaren interes pribatuak lehenesten baititu". 

"Aldiz, Cervantes ikastetxeko hezkuntza-komunitatea eta inguruko herritarrak babesik gabe agertu dira Udal Gobernuaren jarreragatik, ez baitu entzun eraisketa hori geldiarazteko eskaera, pandemiaren egungo testuinguruan dituen ondorioengatik", adierazi du.

Fatuarteren ustez, "beharrezkoa" da Udal Gobernuak horri buruzko azalpenak ematea eta, besteak beste, eraisteko asmoa duen eraikinean amiantorik dagoen ala ez argitzea, amiantoa kentzeko lanek hezkuntza-komunitate osoari eta inguruko herritarrei ekar liezaiekeen arriskua kontuan hartuta.

 

EH Bilduk Bilboko Udalaren konpromisoa eskatu du metroaren 4. lineak Kastrexana eta Santa Ageda tren-estazioetan geltokia izan dezan

| 2021-03-16 13:34:00

EH Bilduk Bilboko Udalaren aldetik konpromisoa eskatu du metroaren 4. lineak Kastrexana eta Santa Ageda tren-estazioetan geldialdiak egin ditzan; izan ere, Eusko Jaurlaritzak argitaratutako eta parte hartze prozesu baten barne dagoen hasierako proiektuan, ez dira geldialdi horiek aurreikusten.

 

Bruno Zubizarreta EH Bilduko zinegotziak agerraldia egin du gaur FEVEk Kastrexanan duen geralekuan, Raúl Méndez batzarkidearekin eta María Solar Barakaldoko Udaleko EH  Bilduren bozeramailearekin batera. 

Zubizarretak adierazi duenez, "ezinbestekoa" da egun dauden azpiegiturak erabiltzea, Bilbo eta Barakaldo artean banatutako auzo horretako bizilagunek metroko 4. lineako geltokiak izan ditzaten, horrela euren mugikortasuna eta bizi-kalitatea hobetu ahal izateko. Gainera, gogorarazi duenez, leku horretan gune industrial bat dago. “Metroak geltokiak izatea sarbideak hobetuko lituzke, zona horren berroneratzeari lagunduz". 

“Egun dauden tren-estazioak geltokiak ezartzeko aprobetxatxen ez badira,  zonalde osoan bilbotarrentzat zein barakaldoko bizilagunentzat hain beharrezkoak diren zerbitzu hobeak emateko aukera galtzea ekarriko du", ohartarazi du. 

Gogorarazi duenez, azken Osoko Bilkuran, EH Bilduren ekimenez, Bilboko Udalak akordio garrantzitsu bat lortu zuen metroa Errekaldera eta hiriaren hegoaldeko auzoetara ahalik eta lasterren heldu dadin; izan ere, “Euskal Trenbide Sareari eskatzen diogu 2021eko abuztuaren 31ko informazio-azterlana amai dezala, eta, partaidetza-prozesuaren bidez aukerarik egokiena onartu ondoren, ahalik eta lasterren has dadila eraikuntza-proiektuaren lizitazioa”. "Oraingo honetan, geltoki horiek metroaren 4. linean sartzearen alde egiteko eskatzen diogu Bilboko Udalari, eta horri buruzko akordio bat lortzea espero dugu ", gaineratu du. 

Bestalde, Maria Solar EH Bilduren Barakaldoko zinegotzi eta bozeramaileak gogorarazi duenez, linea horretako geralekuak Bilbon egongo liratekeen arren, auzo horretako biztanle gehienak Barakaldon bizi dira. 

Horregatik, nahiz eta Barakaldoren kasuan koaliziotik jakin badakiten "Alkatetzak dagoeneko jakinarazpenen bat egin diela Aldundiari eta Eusko Jaurlaritzari zentzu horretan", eta positiboki baloratu, EH Bilduk udalaren osoko bilkura osoak aldeko jarrera har dezala eta eskaera horren berri eman dezala eskatuko du. 

Parte-hartze prozesua

Bere aldetik, Raul Mendez batzarkideak gogoratu duenez, EH Bilduk, metroaren 4. Linearen proiektu hau diseinatzeko orduan herritarren iritziak duen garrantziaz jabetuta, partaidetza-prozesua abian jartzea proposatu zuen, proiektu honek benetako beharrei erantzun ahal izateko.

“Prozesu parte-hartzaile hori bai Bizkaiko Batzar Nagusietan, bai Gasteizko Legebiltzarrean onartu zen, jadanik martxan dago eta asko dira Bilboko Hegoaldeko auzoetako herritarrak eta gizarte-eragileak egiten ari diren ekarpenak, besteak beste metroaren 4. Lineak Kastrexanan eta Santa Agedan geltokia izatea”, azaldu du.

Ildo horretan, gogorarazi duenez, hain zuzen ere, bihar Batzar Nagusietan EH Bilduk aurkeztutako mozioa eztabaidatuko da. “Horren bidez eskatzen dugu parte-hartze prozesuan eta informazio-azterlana idazterakoan kontuan har daitezela metroa Errekaldera eta Hegoaldeko auzoetara iristeko aztertutako aukera guztiak, Errekalde eta Moyua arteko L4 originala barne, izan ere Euskal Trenbide Sareak bi aukeratara mugatu baitu, bere garaian eztabaidatu ziren beste aukera batzuk alde batera utzita”, adierazi du.

 

 

EH Bilduk adierazi du pandemia ezin dela aitzakia izan fiskalitate bidezkoago eta progresiboago baten alde lan ez egiteko

| 2020-08-17 14:13:00

EH Bildu Bilbo udal taldeak adierazi duenez, pandemia "ezin da aitzakia izan 2020ko fiskalitate berdina mantentzeko”. Fiskalitate “bidezkoago eta progresiboago” baten alde lan egiten jarraitu behar dela gaineratu du eta, beraz, 2021eko fiskalitate proposamenari zuzenketak aurkeztuko dizkiola iragarri du.

Asier Gonzalezek, EH Bilduko zinegotziak, gaur egin ditu adierazpenok, Bilboko Udaleko gobernu taldeak 2021eko udal zerga eta tasa guztiak izozteko asmoa duela iragarri ostean.

Ildo horretatik, iazko ordenantza fiskalak baliabide gutxien zituzten bilbotarrentzat kaltegarriak zirela adierazi du eta, aldiz, enpresa handiak saritzen zituztela. Hori dela eta, fiskalitate progresiboagoa lortzeko ekimenak aurkeztuko dituztela jakinarazi du, gehien dutenek gehiago ordain dezaten.

EH Bilduk eskatu du Bilbok agroekologian eta elikadura-subiranotasunean oinarritutako elikadura-estrategia bat ezar dezala

Lehen urrats gisa, Bilbo "Agroekologiaren aldeko Hirien Sarean" sar dadila eskatu du, tokiko elikadura-sistemak eraikitzeko

| 2020-08-06 11:33:00

Bilboko EH Bildu udal taldeak, hurrengo Osoko Bilkuran eztabaidatuko den mozio baten bidez, Bilbo "Agroekologiaren aldeko Hirien Sarean" sar dadila eskatu du, Estatuko udalen arteko lankidetza- eta truke-dinamika bat sortzeko, tokiko elikadura-sistemak eraikitzeko, agroekologiaren eta elikadura-subiranotasunaren ikuspegiekin bat etorriz.

Bruno Zubizarretak, EH Bilduko zinegotziak, azaldu duenez, “beharrezkoa” da Bilbok agroekologian eta elikadura-subiranotasunean oinarritutako elikadura-estrategia bat egitea. Ildo horretan, adierazi duenez, Covid-19ak “krisi ekonomiko larria sortu du eta, horren eraginez, elikagaien eta nutrizioaren segurtasunaren krisia larriagotzen ari da”. “Horrela, nekazaritza industriala habitataren galera areagotzen ari da eta birusak agertu eta hedatzeko baldintzak sortzen ari da”, gaineratu du.

Beraz, ohartarazi duenez, egungo pandemia-testuinguruan “premiazkoa” da “industria-nekazaritzaren paradigmatik askotariko sistema agroekologikoetara aldatzea; izan ere, agroekologiak iraunkortasunaren dimentsio ekonomikoak, ingurumenekoak eta sozialak bateratzeko gaitasun bakarra du”.

Zubizarretak gogorarazi duenez, 2015ean, Bilbok elikadura-politika jasangarriei buruzko Milango Ituna sinatu zuen, eta, horren barne, hainbat ekimen egin dira, esate baterako, hiri-baratzak, arrakasta handiarekin gainera. Hala ere, bere esanetan, “orain beste urrats bat eman behar da, hau da, agroekologian eta elikadura-subiranotasunean oinarritutako elikadura-estrategia bat ezarri behar da”.

EH Bilduren ustez, elikadura-estrategiaren eredu hori ezartzeko “lehen urratsa” Bilbo "Agroekologikoaren aldeko hirien sareari" atxikitzea izango litzateke, sarearen helburua baita parte diren hirien prozesu indibidual eta kolektiboak indartzen laguntzea. Bilbo bezala, Milango ituna sinatu zuten Iruña edo Valentzia bezalako hiriak sare horretako kide direla jada, aipatu du Zubizarretak.

EH Bilduko zinegotziak azaldu duenez, dinamikak truke-ibilbideetan, lantaldeetan eta aurrez aurreko espazioetan zehazten dira, hiru ardatzen inguruan sortuak: gobernantza eta partaidetza, ekoizpen-ekimen agroekologikoetarako laguntza eta logistika eta banaketa. "Gure mozioa onartzea espero dugu, garrantzitsua baita une honetan premiazkoa den elikadura subiranotasunaren bidean aurrera egiteko", azpimarratu du.

 

 

EH Bilduk "sehaska etxea" eraikinaren funtzio soziala mantentzea eskatu du, Bilbo Zaharraren behar sozialei erantzuteko

BBK Banku Fundazioak lehen haur-eskola bat hartzen zuen eraikin horretan hasi dituen obrak direla eta, EH Bilduk ‘sehaska etxea’ kohesio sozialerako ekipamendu gisa mantentzea eskatu du

| 2020-07-08 11:53:00

BBK banku-fundazioak Bilbo Zaharra auzoko ‘sehaska etxea' hartzen zuen eraikinean hasitako obrak direla eta, EH Bilduk espazio horren funtzio sozialari eusteko eskatu du, auzoaren behar sozialei erantzuteko ekipamendu gisa.

Alba Fatuarte EH Bilduko zinegotziak gogorarazi duenez, 2018an Bilbao Bizkaia Kutxa Banku Fundazioak San Antongo "sehaska etxea" eraikina hartzen zuen haur-eskola itxi zuen, eta Urazurrutia kaleko eraikin horri erabilera berriak bilatzeko ideia-lehiaketa deitu zuen, BBKren arabera, "eraikinaren erabilerak inguruko beharretara egokitzeko eta Bizkairako erreferentziazko zentro berri bat sortzeko".

Une hartan, Fatuartek adierazi duenez, EH Bilduk, Bilbo Zaharra auzoko hainbat eragile sozial eta kulturalek bezala, "kezka" agertu zuen "BBK-Kutxabanken esku ‘sehaska etxeak’ bere funtzio soziala galtzearen arriskuagatik; izan ere, BBK bankarizatu eta pribatizatu ondoren, pixkanaka bere Gizarte Ekintzatik aldentzen joan da".

Horregatik, auzoko hainbat auzo elkarteak, kultur eta eta gizarte eragileekin, proposamen bateratu bat aurkeztu zuten lehiaketa horretara, hainbat proiekturekin, hala nola, bakardade-egoeran dauden adinekoentzako gune bat, emakumeen etxe bat, meatze-auzo horren memoria ez galtzeko gune bat, edo ikasle edo langabeentzako prestakuntza-gune bat. "Proiektuak desberdinak ziren, baina guztiek helburu bera zuten: gizarte-kohesioa sustatzea, ikuspegi inklusibo batetik, justizia sozialaren printzipioan oinarrituta", adierazi du.

Era berean, Fatuartek azaldu duenez, EH Bildu udal taldeak proposamen bat aurkeztu zion 2018ko martxoan Bilboko Udalbatzari, "sehaska etxearen funtzio soziala mantentzeko eta BBK Banku Fundazioak Bilbo Zaharreko herritarren beharrei eta eskaerei erantzungo ez zien proiektu bat ez inposatzeko".

Eztabaidan, gogorarazi duenez, Xabier Otxandiano zinegotziak Udalaren eta BBK Fundazioaren "parte hartzeko bide bat irekitzeko" konpromisoa agertu zuen, baina "bi urte geroago, Bilboko Udalak eta BBK Fundazioak ez dute hitza bete, parte-hartze prozesu hori ez baitzen inoiz egin".

Horri gehitu behar zaio duela egun batzuk obrak hasi direla eraikinean. Hori dela eta, EH Bildu Udal Taldeak hainbat galdera erregistratu ditu egoera argitzeko, eta, beste behin ere, Bilbo Zaharreko auzotarren eskutik partaidetza-prozesu bat egiteko eskatu du, sehaska etxeak auzoaren kohesio soziala sustatzen jarraituko duela bermatzeko. 

“Espoliazioa”

EH Bilduko zinegotziak azaldu duenez, Ricardo Bastida udal arkitektoak diseinatutako Sehaska Etxea 1916an sortu zen eta, bere jarduerarekin, gizarte arreta eskaini zuten, Udalaren esku-hartzea osatuz, herritar guztien bizi baldintzak hobetzeko asmoz.

"Ehun urte beranduago, Bilbo Zaharra auzoa aldatu den arren, arrakala sozialak arintzeko eta auzoan kohesio soziala sustatzeko ekipamendu baten beharrak indarrean jarraitzen du", nabarmendu du.

Horren jakitun, Fatuartek esan du EH Bilduri "ulertezina" iruditzen zaiola "diru publikoarekin altxatutakoa orain helburu pribatuetarako erabiltzea", eta BBK Banku Fundazioa "espoliazioa" egiten ari dela uste du.

 

ALBISTEAK

EH Bilduk Bilbon hutsik dauden etxebizitzei buruz neurriak hartzeko akordioa lortu du Udal Gobernuarekin

2021-09-30 12:19:00

Bilboko Udala etxebizitza hutsen espedienteak izapidetzen hasiko da, bai eta udalerrian dauden etxebizitza eskari eta premia egiaztatuen eremuak deklaratzen ere, eta udal-egiturari horretarako behar diren bitartekoak esleituko dizkio.

EH Bilduk Bilbon hutsik dauden etxebizitzei buruzko neurriak hartzeko eskatu dio Udal Gobernuari

2021-09-24 12:32:00

Osoko Bilkuran eztabaidatzeko proposamen bat aurkeztu du, Udalak Etxebizitza Legeak esleitzen dizkion funtzioak bere gain har ditzan eta hutsik dauden etxebizitzen espedienteak izapidetzen has dadin.