AKTUALITATEA

Udalak etxerik gabeko emakumeentzako Arrontegiko aterpetxea itxi du eta Kaleko Hezitzaileen programa bertan-behera utzi du

| 2023-06-30 14:43:00

EH Bilduk jakinarazi duenez, Udalak itxi egin du Arrontegi auzoan etxegabeentzako gaueko aterpetxea, eta kaleko hezkuntza-taldea bertan behera utzi du. Hala baieztatu du Mikel Antizar Enplegu, Gizarte Ekintza eta Aniztasunaren Kudeaketako zinegotziak, Maria Solar bozeramaile subiranistak duela aste batzuk egindako galderari erantzunez. Baliabide horiek finantzatzeko Eusko Jaurlaritzaren dirulaguntza gaur amaitzen da, eta  Barakaldoko Udalak ez du partida ekonomikorik aurreikusi horietarako bere aurrekontuan. Beraz, bihar bertan utziko diote utziko diote indarrean egoteari. Bi baliabide horiek oso beharrezkotzat jo ditu EH Bilduk, eta eredu izan dira bazterkeria-egoeran edo -arriskuan dauden pertsonen eskubideak babesteko.

EH Bilduk uste du baliabide horiek iraunkortasuna izan behar dutela denboran, eta ezin dutela behin-behineko dirulaguntza puntualen mende egon. Horretarako, gizarte-bazterkeriaren aurkako udal-estrategia aktibatzea eskatzen du: “Planifikatutako estrategia bat, Barakaldoko gizarteko kide izan nahi duen edonori eskubideak bermatuko dizkion baliabide eta inbertsioekin”.

Udalak gaur arte 34 leku zituen etxerik gabeko pertsonentzako aterpetxeetan. Horietako sei, Arrontegi auzoan, emakumeentzat bakarrik ziren. Bihartik aurrera, etxerik gabeko emakume horiek, kasurik onenean, eremu maskulinizatu batera itzuli beharko dute, inolako intimitaterik gabe.

Kaleko Hezitzaileen Taldearen programa, bestalde, etxegabetasun kritikoko egoerei erantzuten saiatzen zen. Hezitzaileen eta etxerik gabeko pertsonen arteko zuzeneko harremanari esker, jarraipen pertsonalak egin daitezke eta esku-hartze hauek eraginkorragoak izaten dira.