EH Bilduk iragarri du tokian tokiko errealitatea eta herritarren interesak lehenetsiko dituela udalak osatzerakoan

Ibon San Saturnino: EH Bilduko hautetsiak herriz herri ari dira hitz egiten indar politiko guztiekin, gehiengo nahikoak eta egonkorrak sortzearren

| 2019-06-13 12:53:00

Arabako 53 udalak osatzeko bi egun falta direnean, EH Bilduk iragarri du tokian tokiko errealitatea eta herritarren interesak lehenetsiko dituela udalak osatzerakoan. Horrela adierazi du Arabako EH Bilduko koordinatzaile Ibon San Saturninok Arabako Mahai Politikoko hainbat ordezkarirekin batera egindako agerraldian. “Kezkatzen gaitu alkatetzak alderdien exekutibek negoziatzeko dinamika horrek, baita gerora akordio horiek herrietan automatikoki ezartzeak ere, inolaz ere udal errealitatea zein udalerrietako herritarren nahiak eta interesak kontuan hartu gabe”, esan du San Saturninok.

Maiatzaren 26ko hauteskundeak igaro eta gero, EH Bilduko hautetsiak herriz herri ari dira hitz egiten Arabako udalerrietan ordezkaritza lortu zuten indar politiko guztiekin “gehiengo nahikoak eta egonkorrak”  ahalbidetzeko helburu bakarrarekin, alkate makila alde batera edo bestera eramateko ez ezik, udalerri bakoitzean datozen lau urteotan politika zehatzak garatzeko ere.

 

Pasa den hauteskunde kanpaina agindu zuen bezalaxe, EH Bilduk ahal diren tokietan Alderdi Popularra alkatetzetatik kanporatzeko konpromisoa bereganatu du, gehiengo alternatiboak sortzearren. Norabide horretan lanean ari da EH Bildu Bastidan eta Guardian. “Aurretik egin dugu, baina aurreko legealdian ikasi dugu ez dela nahikoa PP alkatetza batetik kanporatzea, baizik-eta horrekin batera beharrezkoa dela legealdirako ibilbide orri bat eta gobernantza eredu bat adostea ere”, zehaztu du. Ildo horretatik, EH Bilduk EAJrekin batera koalizio gobernuak osatzeko borondate irmoa dauka, “egonkortasuna eta gobernagarritasuna” bermatzeko.

 

Trebiñuri eta Argantzuni dagokienez, EH Bilduk uste du indar korrelazio nahikoa dagoela integrazioaren arloan aurrera egiteko ibilbide orria adosteko, eta norabide horretan ari da lanean. Horrexegatik, EH Bilduk ohartarazi du guztiz ulertezina izango zela EAJk integrazioaren kontra dagoen PPren sostengua bilatzea EH Bilduri alkatetza kentzearren.

 

“Uste dugu koalizio balizko akordio horiek elkarrenganako leialtasunean eta begirunean oinarritu behar direla, eta alde horretatik EAJk EH Bilduri Zigoitiko alkatetza kendu nahi izateak ez du laguntzen behar den konfiantzazko giro hori sortzen”, azpimarratu du San Saturninok.

 

Larunbatean ikusiko dugu ea tokian tokiko ikuspegi politikoa eta interesak edo edozein modutan alkatetzak lortzeko handikeria eroa eta interes alderdikoiak nagusitzen diren. EH Bildun sinetsita gaude herritarrek luzera saritzen dutela erantzukizuna neurririk gabeko anbizioaren kaltetan”, gehitu du. Eta adibide gisa aipatu ditu Artziniega eta Urkabustaiz, bi herri horietan larunbatetik aurrera koalizioak gehiengo absolutuarekin gobernatuko baitu.

 

San Saturninok hauteskunde emaitzak ere aipatu ditu. Izan ere, EH Bilduk bere historiako emaitzarik onenak eskuratu ditu. Udal hauteskundeetan 37.149 bozka lortzearekin batera, lehen indarra izan da hamabi udalerritan eta 121 zinegotzi eskuratu ditu. Foru hauteskundeei dagokienez, EH Blduk lortutako 33.841 bozkaren ondorioz hamabi batzarkide dauzka.

 

EAJ eta PSEren arteko hitzarmen ia ziurrak Foru Gobernuari gehiengo absolutua bermatzen badio ere, EH Bilduk azpimarratu du datozen lau urteotan bestelako gehiengoak ere osatu daitezkeela. “Ezkerreko indarrek Batzar Nagusietan 51 batzarkidetatik 26 dauzkagu, erabakitzeko eskubidearen aldeko batzarkideak 33 gara, autogobernu berriaren aldekoak 29... Foru Ganbera, beraz, bestelako gehiengo zabalak ere sortzeko gauza da”, zehaztu du.

 

EH Bilduk Arabako Batzar Nagusietan oposizioaren lidergoa hartuko du hurrengo legealdian gobernu alternatiba eraikitzeko helburuarekin

Batzarkide taldea osatuko duten hamabi eledunek gaur hartu dituzte akreditazioak

araba,ehbildu | 2019-06-07 12:17:00

Hurrengo legealdian EH Bilduko Batzarkide Taldea osatuko duten hamabi eledunek akreditazioa hartu dute gaur goizean. Hurrengo ostiralean, ekainaren 14an, emango zaio hasiera legealdi berriari osaketa osoko bilkurarekin. Hamabi batzarkide horietatik zortzi Gasteizko barrutitik datoz, beste bi Aiaraldetik eta azken biak Lur Jareetatik. Kike Fdez de Pinedok, batzarkide taldeko bozeramaileak, gobernu alternatiba osatzeko asmoz oposizioaren lidergoa hartuko duela iragarri du.

 

33.841 bozkekin, inoizko emaitzarik onenak atera ditugu eta emaitza horiek lurralde historikoaren bigarren indarra eta Arabako lurraldean gobernu alternatiba bakarra kokatzen gaituzte. Ispiritu horrekin hasi berri behar den legealdi honetan zehar oposizioaren lidergoa hartuko dugu. Erantzukizunez lanean jarraituko dugu Arabarako alternatiba bat eraikuntzaren ardura EH Bildurena delako. Hori izango da gure betekizuna lehen egunetik datozen lau urteotan”, zehaztu du EH Bilduko bozeramaileak.

 

EH Bildu batzarkide taldean lau batzarkideek errepikatuko dute (Kike Fdez de Pinedo, Iñaki Ullibarri, Nerea Martinez Cerrillo eta Manu Rezola) eta beste zortzi berriak izango dira (Itziar Amestoy, Claudia Venceslao, Antxon Belakortu, June Mujika, Xabi Valdor, Ainhize Solaun, Javier Argote y Eva Lopez de Arroyabe). Taldeko bozeramailea pozik agertu da osaketarekin talde oso “orekatua” delako, hainbat arlotan “eskarmentu handikoarekin” eta esperientzia zein indar eta ideia berriak uztartuko dituena delako.

EH BILDU BATZARKIDE TALDEKO OSAKETA

 

  1. KIKE FERNANDEZ DE PINEDO

Gasteiz. 1961. Euskal Filologian lizentziatua, Bigarren Hezkuntzako irakaslea da. 2011tik 2015era EH Bilduko Udal Taldeko bozeramailea izan zen. Orain, Arabako Batzar Nagusietako bozeramailea da.

 

  1. ITZIAR AMESTOY

Gasteiz. 1985. Kazetaritza ikasi zuen Bartzelonan, ostean Arabara itzuli eta Garan lan egiteko. 2011-2015 legealdian Gasteizko zinegotzi izan zen, EH Bilduren lehen pausuekin batera. Fracking Ez mugimenduan hasieratik ibilitakoa. EH Bilduren baitan komunikazioan aritu da.

 

  1. IÑAKI ULLIBARRI

Gasteiz, 1965. Euskal Filologian lizentziatua. AEKko irakaslea eszedentzian. 2011ko legegintzaldian udal taldeko koordinatzailea izan zen eta 2015eko legegintzaldian batzarkideen taldeko koordinatzailea. Euskalgintzako militantea.

 

 

  1. CLAUDIA VENCESLAO

Madrid. 1979. Gasteizera dator 1989. Alde zaharreko bizilaguna. Internazionalista bihotzez, bere gaztaroan Askapenako militantea izan zen. 1998an Donostira joan zen Zuzenbidea ikastera. Gizarte Lanean diplomatua da. Herri mugimenduan hasi zen Hiesaren Kontrako Batzordean pertsona presoak bisitatzen, eta Cesar Manzanosekin batera ikerketa ezberdinetan parte hartu du. Hiesaren Kontrako Batzordean lan egiten du 2006tik gaur egun arte, gizarte bazterketaren eta espetxeen arloan.  2015ean elkarte berdineko zuzendaritzako idazkaria izaten hasten da 2018ko ekainera arte.

Bere seme alaben eskolako guraso elkarteko kidea da eta Euskal Eskola Publikoaren aldeko plataforman parte hartzen du.

 

  1. ANTXON BELAKORTU

Gasteiz, 1969. Elektronika arloko lanbide heziketa ikasketak. Frantzia kaleko komertzianteen elkarteko kidea eta lehendakari ohia. Gaztedi Rugby Taldeko jokalaria. Gasteizko udaletxeko zinegotzia 2001tik.

 

  1. JUNE MUGICA

Gasteiz, 1988.Enpresa zientzietan diplomatua. Azkenengo 6 urteetan Aernnovako langilea. Gaztetatik hezkuntza ez formalean militatzen, Kimuak Atarrabi aisialdi elkartean.

Mugimendu Feministako kidea.

 

  1. MANU REZOLA

Cornago, Errioxa, 1968. Gasteiztar berri eta euskaldun berria. Gizarte Hezkuntzan diplomatua eta Orientazio Profesionalerako unibertsitate masterra. Nerabeentzako arreta pisu batean lan egin du gizarte hezitzaile moduan eta  laneratze teknikari moduan ere aritu da. 2015etik batzarkidea izan da Arabako Batzar Nagusietan. Talde antimiitaristetan eta intsumisoen mugimenduan ibilitakoa.

 

  1. XABIER VALDOR

Gasteiz 1992. Historian graduatua, eta Bigarren Hezkuntzako irakasleentzako masterra.  Herri mugimendu ezberdinetan parte hartu du, adibidez Gora Gasteizen eta Judimendiko Gazte Asanbladan edota Gazte Mugumenduan.

 

  1. AINHIZE SOLAUN

Aiara, 1990. Goi mailako ikasketak gizarte integrazioan eta gizarte eta kultura animazioan. Gaur egun hezitzaile laguntzailea da Laudioko ikastolan. Dantza garaikideko dantzari eta irakaslea da. Ikasle eta gazte mugimenduan ibilitakoa

 

  1. NEREA MARTINEZ CERRILLO

Laudio, 1977. Zuzenbide juridikoan lizentziatua. Formakuntza teknikaria eszedentzian.

Gaur egun udalgintzako langilea EH BILDUn. Laudioko udaleko zinegotzia formakuntza eta emplegurako ordezkari gisa. (2003-2007).BBNNetako batzarkidea Aiaraldeatik 2013tik gaur egun arte, fiskalitatearen eremuan.

  1. EVA LOPEZ DE ARROYABE

Gasteiz 1973. Larrean bizi da. Abeltzaina. 2007-2011 UAGAko zuzendaritzako kidea izan da. 2014-2016 Gure Soroak elkarteko (emakume nekazarien elkartea) lehendakari ordea izan da. Gaur egun legebiltzarkidea da.

 

  1. JAVIER ARGOTE

Manzanos. 1961. Ikasketak: Goi mailako Batxillergoa. Gasteizko Udaleko Gizartetxeetako zerbitzuko langilea Informazio Agente bezala. LABetik komiteko delegatua izandakoa. Gasteizen, Judimendiko auzoan, jaioa Judimendikoak Auzo Elkartean eta Jai batzordean parte hartu izan zuen. 1988an Manzanosera joan eta bertan Batzar Administratiboko kidea izan da hainbat alditan, bokal eta presidente gisa. 1996an Arabako Kontzejuen Elkartearen (ACOA-AKE) sorreran parte hartu zuen. Elkartearen presidentea izan da 18 urtez 2017an kargua utzi zuenerarte. Egun Manzanoseko Batzar Administratiboaren Presidentea eta Arabako Ibarretako AHTri EZ Plataformako kidea.

EH Bilduk iraingarria deritzo ITELAZPIk Batzar Nagusiek onartutako mozioari emandako erantzuna eta azalpenak eskatuko ditu bihar Legebiltzarrean

Kike Fernandez de Pinedo: “ITELAZPIk berriro ere mesprezatu egin ditu Arabako Kontzejuak eta Batzar Nagusiak”

eh bildu,araba,kontzejuak,eskumenak,itelazpi | 2019-06-04 10:42:00

Pasa den hilabetean, ITELAZPIk erantzun ofiziala bidali zien Arabako Batzar Nagusiek otsailaren 27an onartutako mozioa zela-eta. Gogoratu beharra dago mozio hartan batzarkide talde guztiek, EAJ eta PSE izan ezik, eskatzen ziotela Eusko Jaurlaritzaren menpekoa den ITELAZPI sozietate publikoari jarrera proaktiboa hartu zezala eta oraindik ere euren mendi publikoetan kokatutako telekomunikazio zentroen egoera arautzea lortu ez duten 28 herriri (gehien-gehienak kontzeju txikiak, baliabide juridiko propiorik gabeak) lagundu ziezaiela, lau hilabeteko epean herri horiekin harremanetan jarriz eta ITELAZPIk kudeatzen dituen telekomunikazio zentro horien eta kudeaketa horretatik ITELAZPIk lortutako diru-sarreren informazioa helaraziz, Foru Agindu banaren bidez herriek kobratu beharreko kontraprestazioa ezarri ahal izateko.

 

Tamalez, eta Eusko Jaurlaritzak Arabako kontuak tratatzen dituen ohiko harrokeriaz, pasa den ostiralean ITELAZPIk bidali zuen eskutitz bat Arabako Batzar Nagusiei, bertako lehendakariorde Xabier Patxi Arrieta Goirik sinatuta, non, eskumen banaketa instituzionala aitzakiatzat hartuta eta Batzar Nagusiak dagoeneko jarduerarik gabe daudela aprobetxatuta, hitzez hitz zera dioen: “…ez da egokia Arabako Batzar Nagusien otsailaren 27ko osoko bilkuran hitzartutako 14/2019 Mozioan eskatutakoari arretarik ematea”.

 

EH Bilduk guztiz iraingarria eta onartezina deritzo berriro ere ITELAZPIk Arabako Kontzejuei eta Batzar Nagusiei erakutsitako mesprezua, Arabako medi publikoetan kokatutako telekomunikazio zentroen bizkar sozietate publiko horrek jasotzen dituen diru etekinen zatia mendi horien jabe diren herriei aitortzeko borondate eza ezkutatzen duena. Horrexegatik, eta dagoeneko Batzar Nagusietan inoren ardurarik eskatzerik ez zegoenez, EH Bilduk Arrieta Goiriren jaunaren agerraldia eskatu zuen Legebiltzarrean, mozio hori ez betetzeko arrazoien berri eman dezan. Agerraldi hori bihar izango da.

EH Bilduk bozka aurrerakoia kontzentratzera deitu du, Araban eta Gasteizen lehen indarra izatea lortzeko

Larrionek gogoratu du EH Bilduk «alderdi bozkatuena» izan behar duela, «Gasteizen gobernu aurrerakoia eta irekia egongo dela bermatzeko»

| 2019-05-24 12:45:00

. EH Bilduko Arabako diputatu nagusigaiak, Kike Fdez. De Pinedok, eta Gasteizko alkategaiak, Miren Larrionek, agerraldia egin dute gaur, amaitzear dagoen hauteskunde kanpainari buruzko iritzia emateko, eta igandeko hauteskundeetan botoa eskuratzeko deia egiteko. Bi hautagaiek boto aurrerakoia aktibatzeko eta kontzentratzeko eskatu dute, Araban zein Gasteizen lehen indarra izatea lortzeko, eta gobernua eratzeko aukera izateko.

Fdez. De Pinedo-k ziurtatu du igande honetan Arabak «berriro ere historia» egin dezakeela bere emaitzekin. «Ordu gutxi batzuk falta dira, azken bultzada geratzen da. Boto aurrerakoia aktibatu, mobizatu eta kontzentratu behar dugu. Ezkerreko botoa aktibatu, mobiizatu eta kontzentratu behar dugu. Hiru premisa horiek betetzen baditugu, Arabak berriro ere historia egingo du igandean. Igandean hiru premisa horiek  betetzen baditugu, bete egingo da hamarkadaz hamarkada egin den lan eraldatzailearen ametsa. Herrialdean aro berri bat zabalduko dugu azkenik», azpimarratu du hautagaiak.

Bestalde, Larrion-ek gogoratu du EH Bilduren konpromisoa dela Gasteizen gobernu aurrerakoi eta ireki bat osatzea, eta azpimarratu du hori lortzeko berme bakarra dela igandean hiriko indar bozkatuena izatea: «Igande honetan aukera handia dugu udala hiritarren zerbitzura jartzeko. Jendearentzako aukera berrien itsaso zabala nahi dugu. Eta itsaso hori tantaz tanta beteko dugu, bozkaz bozka. Gobernu aurrerakoia eta irekia bermatzeko, EH Bilduk alderdi bozkatuena izan behar du. Nahikoa da bigarrenak baino boto bat gehiago lortzea. Horregatik esaten diogu jendeari: zure bozka erabakigarria da. Zure bozka da gehiengoa emango duena. Zure botoa da aukera berrien itsaso zabala irekiko duena».

Kanpainari dagokionez, Fdez de Pinedo-k adierazi du «asteak» damaratzatela herrialdean mugitzen, ez bakarrik kanpainan, eta ilusioa ikusten ari direla nonnahi: «Herrialdea zeharkatu dugu herriz herri, eta ilusioa ikusten dugu, jendea pozik dago, eta indartu egin nahi du 2011n abiatu zen olatu eraldatzailea. Geure eskuetan dago. Sinesten genuen ametsa oso hurbil dago».

Larrion pozik agertu da bere kanpainak hirian izan duen harrerarekin, eta baita ere hiritarrengandik jaso dituen babesekin eta ekarpenekin: «Proiektu berriei buruz hitz egiten kanpaina egin dugu, proiektuz beteriko Gasteiz bat nahi dugulako, norabide berri batekin. Besteekin adeitsua izan den kanpaina egin dugu, sinesten dugulako ezberdinen artean egindako Gasteiz batean. Etengabeko irribarre batekin egin dugu kanpaina, etorkizunean denok irribarretsu izango garen Gasteiz bat delako geure helburua».

Gasteizen politika berriak garatzeko foru instituzioekin sinergia eta konplizitatea beharko dela gogoratu du Larrionek

Kike Fdez de Pinedo: udaletako emaitzak udalerriz udalerri Araba eramaten baditugu behingoz gure herrialdean aro berri bat zabalduko da

ARABA,Gastei,aldaketa,hauteskundeak | 2019-05-22 12:08:00

EH Bilduren Gasteizko alkategaia Miren Larrionek gogoratu du Gasteizen politika berriak garatzeko foru instituzioekin sinergia eta konplizitatea beharko dela. “Gasteizen aro berri eraginkor bat zabaltzeko ezinbestekoa izango da aldaketa hori foru instituzioetara bidaltzea Arabako Foru Aldundian eta Batzar Nagusietan Gasteiz eta Araba osoko herritarren bizi-baldintzetarako oinarrizko erabakiak hartzen  direlako: politika ekonomikoa, zerbitzu sozialak edota ingurumenari lotutakoak”, zehaztu du Larrionek.

 

Ildo berdinean, Arabako Ahaldun Nagusia izateko hautagaia Kike Fdez de Pinedok esan du Gasteiz historia egiteko zorian dago lehen aldiz emakume feminista eta progresista izanda. Era berean, gogoratu du “Arabako beste udalerri askok 2011an hasitako olatuan jarraituko dute edo bat egingo dute geldiezina den olatu horrekin. “Aldaketa hori egonkortzeko ezinbestekoa da herrialdeko instituzioetara eramatea: hor zerga bilketa justua bermatuko dugu, finantzazio zuzena banatu, gertuko politika sozialak, ekonomikoak eta anbientalak, tokian tokiko errealitateei egokituak eta herri zein eskualde guztien aukerak aprobetxatuko dituenak”, azaldu du Fdez de Pinedok.

 

Are gehiago, nabarmendu duenez, “udaletako emaitzak udalerriz udalerri Araba eramaten baditugu behingoz gure herrialdean aro berri bat zabalduko da”. Horren ondorioz, Larrionek eta Fdez de Pinedok azpimarratu dute hurrengo igandean herriz herri eta auzoz auzo boto-txartela txuri zein sepiak EH Bilduren logoarekin

 

ALBISTEAK

Urkabustaizek ukatu egin du Eusko Jaurlaritzak udalei ingurumen-proiektuak inposatzeko asmoa

2021-11-25 09:58:00

Ingurumen Administrazioari buruzko Legearen artikuluetan sartu nahi diren aldaketen aurkako mozio bat onartu du; ekimen horren bidez, Eusko Jaurlaritzak Goi Mailako Interes Publikoko Proiektu deklaratu ahal izango du, udal-araudiaren gainetik.

Bastidako Udalak osoko bilkuran adierazi du Zaragozatik Jundizera tentsio handiko linea bat eraikitzeko proiektuaren aurka dagoela

2021-11-23 09:30:00

Lautadako Kuadrillak ere baztertu egin du Arabako Lautada zeharkatzen duen goi-tentsioko linea eskualdean inpaktu larriak dituelako.

EH Bilduk bihar egingo diren Arabako kontzejuetarako hauteskundeetan parte hartzeko deia egin du

2021-11-20 09:31:00

Javier Argote: “Mila pertsona baino gehiago hautatuko ditugu gure herriak dohainik eta borondatez ordezkatuko dituztenak. Horregatik bakarrik merezi du igande honetan zure kontzejuan botoa ematera joateak”.