AKTUALITATEA

| 2026-11-12 11:59:00

Foru Gobernuko taldeek, EAJk eta PSEk, bloke erreakzionarioarekin bat egin dute beste behin ere, irabazi ekonomikoen gainetik pertsonen ongizatea eta interes kolektiboa lehenesten dituen sektore hori arautu eta bultzatzeko arau bat baztertzeko

Araba. 2026-11-12 | EH Bilduk foru-arau proposamena aurkeztu zuen Arabako Batzar Nagusietan, Araban gizarte-ekonomia arautzeko eta, batez ere, sustatzeko. Gaur atzera bota dute osoko bilkuran, Foru Gobernuko alderdien, EAJren eta PSEren, eta bloke erreakzionarioko alderdien, PPren eta Voxen, kontrako botoekin.

Eva Lopez de Arroyabe EH Bilduko bozeramaileak gobernuko alderdiek kontrako botoa eman izana arbuiatu du, nahiz eta ekonomia soziala babesten dutela esan. «Tristea da ikustea nola errefusatzen dituzten Arabarentzat onak diren proposamenak, kalkulu alderdikoi hutsagatik», esan du bozeramaileak. Izan ere, lurralde historikoak ez du berariazko araudirik formula horretarako, nahiz eta «ekonomia- eta ekoizpen-sistemaren funtsezko zutabea den, XXI. mendeko erronken aurrean erantzun berriak bilatzeko motor gisa balio duen eta gorantz doan sektorea baita».

Kooperatibismoaz haratago, gizarte-ekonomiak lan-sozietateak, elkarteak, fundazioak, gizarte-ekimeneko enplegu-zentro bereziak, laneratzeko enpresak eta gizarte-ekonomiako beste formula batzuk biltzen ditu.

«Egungo egoera sozioekonomikoan, botere publikoek egungo erronkei erantzun berritzaileak eman behar dizkietela uste dugu. Eta esparru juridiko-normatibo propioa izateak sektorea indartu eta onurak ekarriko ditu. Gizarte-ekonomiak lehentasuna ematen dielako pertsonen ongizateari eta interes kolektiboari, irabazi ekonomikoen gainetik. Eta gaur egun bizi dugun egoeran, ez da gutxi», nabarmendu du Eva Lopez de Arroyabe batzarkide taldeko bozeramaileak.

Arabako EH Bilduk bereziki aurpegiratu dio ezezkoa PSEri; izan ere, talde horrek berak antzeko proposamen bat aurkeztu zuen, baina ez hain anbizio handikoa, eta 2014an atzera bota zuten. «Arabak ez du defentsiban dagoen gobernu bat merezi, eztabaidak saihestu eta denbora pasatzen utzi besterik ez baitu nahi. Zuen immobilismoaren aurrean, EH Bildutik ez gara nekatuko ekarpenak egiten dituzten ekimenak ekartzen, nahiz eta Gobernuak ez duen proposatzen, ezta proposatzen uzten ere», amaitu du Lopez de Arroyabek.