AKTUALITATEA

| 2025-12-16 09:56:00

Azpiegitura berriaren eraikuntzari lehentasuna ematea eta etorkizuneko beharrei erantzuteko plangintza egitea eskatu du udalbatzak, udalerriaren hazkunde-erritmoa kontuan hartuta

Araba. 2025-12-16 | Iruña Okako udalbatzak EH Bilduren mozio bat onartu du gaur, Eusko Jaurlaritzari eskatuz udalerriko osasun zentro berriaren eraikuntzari lehentasuna eman diezaiola. EH Bilduren mozioaren alde bozkatu dute udalbatza osatzen duten talde guztiek. 

Mozioak azaltzen duenez, duela zenbait urte Udalak ekimen bat onartu zuen —hura ere EH Bilduk aurkeztuta—, Osakidetzari eta Eusko Jaurlaritzako Osasun Sailari osasun zentro berri bat eraikitzeko eskatuz, udal finka bat ere eskainiz horretarako. «Hala eta guztiz ere, egoerak ez du hobera egin, eta egungo osasun-zentroak egiturazko eta funtziozko gabezia larriak ditu oraindik, osasun-arreta duina, irisgarria eta herritarren benetako beharretara egokitua bermatzea eragozten dutenak», adierazi du Davide di Paola EH Bilduko bozeramaileak.

Eskaera hori babesten duten argudioen artean, duela gutxi egindako udal-azterlana dago, bai eta CEAR-en harrera zentroa ere: azterlan horrek aurreikusten du biztanleria asko handituko dela epe laburrean, hirigintza-garapen berrien eta etxebizitza berrien eraikuntzaren ondorioz eta, bestalde, CEAR harrera-zentroak laguntza-eskaria handitzen du eta osasun mentaleko eta komunitarioko zerbitzuen beharra indartzen du.

Di Paolak gaineratu duenez, «osasungintzako profesionalen txostenek eta udal-dokumentazioak bat egiten dute gabezia larriak adieraztean: berokuntza sistema eskasa, ohatiletarako irisgarritasun falta, egonkortze-gelarik eza, altzari zaharkituak eta pribatutasun- eta ergonomia-baldintza egokirik gabeko administrazio-eremua; horrek zuzenean eragiten die pazientearen segurtasunari, zerbitzuaren kalitateari eta osasun-langileen ongizateari».

Proposatzen den proiektu berri hori errazteko, «Udala prest dago Osakidetzari udal-titulartasuneko erdiguneko lurzati berri bat eskaintzeko, osasun-zentro berria hartzeko eta tokiko gizarte- eta osasun-zerbitzuak zentralizatzeko eta optimizatzeko egokia. Eskaintza horrek berresten du udalaren borondatea proiektua ahalik eta lasterren gauzatzeko».

Eskaera zehatzak

Horrela, mozioak Eusko Jaurlaritzako Osasun Sailari eskatzen dio kalitatezko lehen mailako osasun arreta bermatzen jarrai dezala, horretarako Iruña Okako Osasun Zentro berriaren proiektua idaztea eta gauzatzea lehenetsiz, udal txostenei eta antzemandako osasun beharrei erantzunez. Gainera, udalerrian biztanleriak izan duen hazkundearen erritmoa kontuan hartuta, Osasun Zentro berriarekin Iruña Okako bizilagunen eskaerei osasun-erantzun egokia eta dimentsionatua emateko beharrezkoak diren baliabideak planifikatzeko eskatu diote.

Azkenik, Iruña Okako Udalak konpromisoa hartu du inplikatutako erakundeetan beharrezkotzat jotzen dituen kudeaketa guztiak egiteko, osasun-zentro berria lehenbailehen errealitate izan dadin.