AKTUALITATEA

| 2026-05-12 09:07:00

Dekretua Foru Arau gisa izapidetzeko eskatu du, talde guztiek ekarpenak egin ahal izan ditzaten, herritarrek bizi duten egoera arintzeko

Araba. 2026-05-12 | EH Bildu Araba batzarkide taldeak «anbizio handiagoa» eskatu dio gaur Foru Gobernuari, Trumpen administrazioak hasitako gerra inperialistaren ondorioak arintzeko neurrien sorta osoagoa izateko. Horretarako, EH Bilduk biharko osoko bilkuran proposatuko du foru exekutiboak aurreikusitako dekretua Foru Arau gisa izapidetzea, Gobernuaren neurriei ekarpenak egin eta hobekuntzak proposatu ahal izateko.

EH Bilduk uste du Foru Gobernua Ukrainako gerraren testuinguruan hartu ziren hainbat neurri berreskuratzera mugatu dela, baina «enpresen egoera arintzera mugatu da, eta behar handiena duten herritarrei zuzendutako beste neurri batzuk baztertu ditu».

Hori dela eta, EH Bildu Arabak hainbat proposamen egingo ditu, hala nola Fortuna Handien zerga berreskuratzea eta hobetzea, Nafarroan dagoenarekin parekatuz. Era berean, multinazionalen eta bankuen ezohiko mozkinen gaineko zerga berreskuratzea, lan- eta kapital-errenten tratamendu fiskala parekatzea eta PFEZren tarterik altuenetan presioa handitzea edo trantsizio ekosozialarekin lotutako kenkariak hobetzea proposatuko du.

Fiskalitateaz haratago

Gainera, EH Bilduren arabera, tresna guztiak erabili behar dira, fiskaletatik haratago. «Ildo horretan, adibidez, mugikortasunaz hitz egin behar da», adierazi du Eva Lopez de Arroyabek: «Erregaien prezioak etengabe igotzen ari diren une honetan, garraio publikoa sustatzea ezinbestekoa da pertsona zaurgarrien mugikortasunerako eskubidea bermatzeko. Horretarako, hobari-politika sakondu behar da, deskontu-sistema progresiboan oinarrituta. Foru garraio publikoa 18 urtetik beherakoentzat doakoa izatea eskatuko du EH Bilduk».

«Foru Gobernuaren proposamenak, 6,7 milioi euro gutxiago bilduko dituela aparte utzita, bistako mugak eta izaera guztiz partziala ditu, gure ustez. Zentzu horretan, gerrarekin negozioa egiten dutenen etekinak mugatzera eta zerbitzu publikoak indartzera bideratu beharko lirateke ahaleginak», amaitu du Eva Lopez de Arroyabek.