AKTUALITATEA

EH Bilduk salatu du KPIaren igoerak eta prestazioak izozteak egoitzak erabiltzen dituzten familien arteko diskriminazioa areagotu duela

| 2022-03-22 10:49:00

EH Bildu Arabako batzarkide taldeak gaur Batzar Nagusietan salatu duenez, PEVS bidez finantzatutako egoitza-plazetarako sarbideak urtean 6.000 euroko batez besteko igoera ekarri du.

Zerbitzuari lotutako prestazioak, PEVS edo txeke-zerbitzu izenekoak, egoitza-plaza pribatuetarako sarbidea ematen dute, erabiltzaileari plaza publiko bat esleitzen zaion bitartean. Nabarmendu behar da, beraz, aldi baterako prestazioa dela, erabiltzaileari plaza publiko bat eskuratzeko eskubidea bermatzen zaion bitartean.

Prestazio horien arazoa da, KPIaren igoerarekin, familiak gehiegi ordaintzen ari direla, eta une honetan erabiltzaile batzuek bi urte baino gehiago daramatzate PEVS horiek kobratzen. Claudia Venceslaoren arabera, PEVSak «kronifikatzen ari dira», eta egoera horrek berekin dakar zaintza «prekarioak eta prekarizatuak» diru publikoarekin ordaintzea: «Egoitza pribatu batzuetan ez dira egoitza publikoetan dauden zaintza- eta arreta-baldintza berak, ratioak desberdinak dira, langileak aldi berean zaintzaileak, garbitzaileak, sukaldariak dira eta, batzuetan, baita erizainak ere». Gainera, «sektore pribatuko profesionalek beren lan handia duintzeko hitzarmenik gabe jarraitzen dute», esan du Venceslaok.

KPIaren igoera

Luis Salgado prokuradoreak zehaztu duenez, «Gizarte Zerbitzuen Legeak ezartzen du egoitza publikoak koordainketaren mende daudela, hau da, erabiltzailearen ahalmen ekonomikoaren arabera, zenbateko bat ordaindu beharko du». Kopuru hori Aldundiak ezartzen du, eta gehieneko tartea hilean 1456 €-koa da, erabiltzaileen % 85ek ordaintzen duena. Hala ere, eta «2021eko KPIaren ondorioz, plaza pribatu baten prezioa hilean batez beste 350 euro igo denez, plaza publiko bat eskuratzen ez duten eta PEVS bat jasotzen duten pertsonek 1456 € baino askoz ere gehiago ordaindu behar izaten dute». EH Bilduk urtean 6.000 € inguruko batezbestekoan ezarri du kopuru hori.

Hori dela eta, EH Bilduk gizarte ongizateko diputatuari interpelazioa egingo dio Arabako egoitzen erabiltzaileei kalte ekonomiko larriaren arazoa konpontzeko emango dituen pausoei buruz.