AKTUALITATEA

| 2026-11-03 11:18:00

Deskontuak % 20ra jaisteko arriskua dago, egungo % 40aren aldean, eta EH Bilduk erabiltzaile bakoitzaren errentan oinarritutako sistema bidezkoago eta progresiboago baterantz pausoak emateko eskatu du

Araba. 2026-11-03 | EH Bildu Araba batzarkide taldeak Foru Aldundiaren asmoei buruzko galdera egingo dio Mugikortasun Iraunkorreko diputatuari biharko kontroleko osoko bilkuran, garraio publikoan deskontuak % 20ra jaisteko arriskua baitago.

Gogoratu behar da gaur egun garraio publikoaren deskontuak % 40koak direla. Xabier Valdor EH Bilduko batzarkideak azaldu duenez, «neurri hauek milaka erabiltzaileren eguneroko mugikortasunaren kostua arintzen lagundu dute eta garraio publikoa gehiago erabiltzen lagundu dute, deskarbonizazio, trafiko pribatuaren murrizketa eta mugikortasun jasangarriaren helburuekin bat eginez».

Baina hobari horiek guztiak 2026ko abenduaren 31n amaituko dira, eta, gainera, hauteskunde orokorrak azaroaren 29an izango direnez, ziurgabetasun-egoera sortuko da gaur egun neurri horien zati bat finantzatzen duten estatu-laguntzen jarraipenari dagokionez.

Horregatik guztiagatik, Valdorrek uste du beharrezkoa dela «Arabako Foru Aldundiak 2027ko ekitaldirako dituen aurreikuspenak behar besteko aurrerapenaz ezagutzea, bai eta erakundeek garraio publikoaren irisgarritasun ekonomikoa bermatzeko eta mugikortasun iraunkorrago baterantz aurrera egiteko hartutako konpromisoak ere».

Baina dauden deskontuez gain, EH Bilduk haratago joateko eskatuko du, eta sistema egonkorrago eta progresiboago baterantz pausoak ematea proposatu du, erabiltzaile bakoitzaren diru-sarreren arabera garraio publikoan deskontuak bermatuko dituena. «Azken urteotan, erakunde eskudunek eta indar politiko guztiek, bloke erreakzionarioa alde batera utzita, tarifa-eredu bidezkoago baterantz jotzea defendatu dugu, errenta-irizpideetan eta garraio publikoaren erabileraren erregulartasunean oinarrituta, deskontu handienak premia handiena duten pertsonei eta zerbitzua gehien erabiltzen dutenei helarazteko».

Hala, Valdorrek bihar diputatuari eskatuko dio Mugikortasunaren Euskal Agintaritzaren aurrean defenda dezala egungo deskontuak mantentzea, eta Aldundiak lagundu dezala beste erakunde batzuek egin ditzaketen murrizketak osatzen, erabiltzaileei kalte ekonomikoa saihesteko. Era berean, Aldundiari eskatuko dio erabiltzaileen erabilera-maiztasunean eta errenta-mailan oinarritutako hobari-sistema bat arautu dezala, eta Araban, Bizkaian eta Gipuzkoan indarrean dauden sistemen artean tarifak integratzeko urratsak egin ditzala, garraio publikoa erabiltzeko erraztasunak emateko.

«Azaroaren 29an gertatzen denaz haratago, tarifa-sistemaren etorkizuna hemen eta orain planifikatzeko eskatu behar da. Subiranotasun osoa izateko nahi eta lan egiten dugu, eta kasu honetan, hemen baditugu aurrera egiteko baldintzak eta gehiengo politikoak. Borondate politikoa besterik ez da falta», esan du Xabier Valdorrek.