Zeberio

Ezezkoa 2021eko Udal Aurrekontuei

| 2021-02-09 15:06:00

Otsailaren 5eko Udalbatzan onartu ziren Zeberiok 2021ean izango dituen aurrekontuak. Zeberioko EH Bilduren Udal Taldeak ezezko botoa eman zien aurrekontuei honako arrazoiengatik:

- Ez dugu konpartitzen EAJ/PNVren Udal Gobernuak aurrekontuak egiteko erabili duen prozedura: “parte-hartzaileak” izenpean doazen arren, errealitatean ez du gure 10 proposamenetatik bakar bat ere kontuan hartu. Ez da behin ere gurekin batu gure proposamenez edo aurrekontuak hobetzeko moduez berba egiteko, eta, gainera, egitera derrigortuta dauden Ogasun Batzordean argi eta garbi esan ziguten aurrekontuak aldaezinak zirela, hau da, haiek ekarri bezala aurkeztuko zituztela otsailaren 5eko Udalbatzan. Horrek ez digu, aurrekontuak hobetze aldera, inongo ekarpenik egiteko aukera eman eta EAJ/PNVren jarrera itxiaren isla garbia da.

- Aurrekontuei dagokienez diru sarrera gutxiago dagoela eta horrek gastuetan isla izango zuela jakinda, ezin ditugu babestu, inondik inora, Udal Gobernuak egindako aurrekontuak, murrizketa itzelak daudelako oso garrantzitsuak diren zenbait arlotan. Kultura, kirol eta aisialdi arloetan murrizketa nabariak egon dira baina atalik garrantzitsuena da, duda barik, ez dutela batere kontuan hartu Covid-19ak herritarrengan izan eta izango duen eragina. Izan ere, egoera zaurgarrian dauden pertsona eta kolektiboei laguntzeko neurririk ez da aurreikusten. Guk, gure proposamenetan zenbait neurri batu genituen kolektibo hauen egoera latza, nolabait, arintzeko. Eta EAJ/PNVren aurrekontuetan Covidaren arrastorik ez dago, existituko ez balitz bezala daude eginda aurrekontuak, amesgaizto horrek herritarren ekonomian eta osasunean inongo eragina izan-izango ez balu bezala.

Horrez gain, gure herrian, berez, egoera tamalgarrian dagoen liburutegiari ere murrizketa etorriko zaio. Liburutegia utzita dago, zentzuzko ordutegi barik, zaindu barik, akabera noiz etorriko. Benetan nahi du Zeberioko Udal Gobernuak herritarrak liburutegira hurbiltzea??  Zubialde eskolako Txubelasu Guraso Elkarteari bezala…. 2020ko partidaren zati bat ukatu zaie, oraindik ez dakigu zergatik eta 2021erako murrizketa dator. Gure ustez, akats ikaragarria da Zeberio herriari hain ekarpen mamitsua egiten dion eta herriaren ardatzetako bat den elkarte bati horrela zigortzea, are gehiago pandemia garai honetan, non diru iturri posibleak hainbeste murriztu diren.

Murrizketekin jarraituz, Zertu Kultur Elkarteari (Begitu) eta Geuria aldizkariari berari ere heldu zaizkie eta 4700 euro jasotzetik 0 euro jasotzera pasatuko dira. Berria egunkaria ere desagerraraziko dute udaletxetik. Ondorio zuzena da euskarazko komunikabideak kinka larrian eta itotzeko zorian jartzea. Hau al da euskara gure herrian eta inguruko herrietan sustatzeko plana??

Bestalde, aurrekontuetan badaude hainbat partida jasota, Ludoteka, Gaztelekua, Udalekuak, esaterako, zalantzazkoak direnak. Zalantzazkoak diogu, orain arte ez dugulako ikusi inongo gogorik oraingo egoerari buelta emateko. Izan ere, zerbitzu horiek bertan behera utzi zituzten pandemiaren aitzakiapean eta holan jarraitzen dute gaur egun, inguruko herrietan zabalik eta martxan dauden bitartean. Guk ikusten duguna da oso erreza eta erosoa dela dena ixtea covidaren aitzakiapean eta gordetzea ekaitza bukatu arte, baina funtsezkoa deritzogu herriari erantzun eta aukerak ematea, funtsezkoa lan egitea oinarrizko zerbitzu horiek bueltan izateko, kirol eta aisialdirako abaguneak bilatu... Baina, noski, horretarako lan egin behar da, borondatea behar da, gogoa behar da, buruari eragin behar, eta guk ez dugu horrelakorik ikusten.

2021eko Urtarrileko EHBZ INFOa

| 2021-02-07 18:32:00
Urtarrileko INFOa argitaratu berri dugu eta dagoeneko Zeberioztarren buzoietan egongo da berriz beteta. Dena den, denon eskura jarri dugu PDF formatuan:

Gure proposamenak 2021eko Udal Aurrekontuen aurrean

Jarraian, gure taldearen iritziz, aurrekontuetan agertu beharko liratekeen premiazko puntu batzuk azaltzen ditugu:

| 2020-12-28 15:32:00

1- Gizarte laguntzak

Larrialdiko laguntzak berebizikoak dira herritarren ongizaterako. Are gehiago, COVID-19ak eragindako pandemiaren ostean.
Oraindik ere, Udalak Gizarte Zerbitzuen daturik eman ez badigu ere , herritarren beharrizanak bermatzeko beste diru gordetzea proposatzen dugu. Udalak aurreikusitako 10000 euroko partidari eskas deritzogu.
Egoera ekonomiko txarrean daudenei laguntza eman: udal zergak BARKATU (ezin zaizkie barkatu, baina bai zergen kopuru bereko diru-laguntza eman).

2- Ostalaritzari laguntzak

Oraindik ere tabernek ez dute lehengo dinamika berreskuratu, eta, gainera, Covid-19aren kontrako borrokan hartutako azken neurriek ere ostalariak kolpatzen dituzte bete-betean. Udal jabetzako ostatuei, itxita dauden bitartean, alokairua ez kobratzea proposatzen dugu, ezta zaborra, estolderia eta bestelako zergak ere. Gainera, hainbat herritan jada egiten ari diren moduan, diru-laguntza zuzenak bideratu herrian ditugun tabernari eta ostalariei.
Zabalik daudenean aztertu behar da ea ordutegi osoan eta bere osotasunean (taberna barruan eta kanpoan, aforo osoarekin) jardun ahal duten. Horrela ez den bitartean, alokairu osoa edo alokairuaren zati handiena ez ordaintzea proposatzen dugu.

3-Kultur eta aisialdi arloak sustatu

Ostalaritzarekin batera kultur eta aisialdi sektoreak izan dira kaltetuenetarikoak jasaten ari garen pandemia hasi zenetik. Eta pandemiak berak baimena ematen digun neurrian, behintzat, kultur eta aisialdi ekimenak antolatzeko premia ikusten dugu, bai sektoreari nolabaiteko haizealdia emateko, bai covid-19ak ezarritako eragin psikologiko sakonak  arintzeko.

4- Covid-19ak sortutako pandemiari aurre egiteko maskarak doan banatzea

Beste Udalerri batzuetan egiten duten antzera, maskara kopuru finkoa banatu hilero premia berezia edo beharrizana duten herritarren artean.

5- Laguntzak etxeen alokairuagatik eta konpontzeagatik

Zeberion hainbat eta hainbat baserri daude hutsik eta gazteak dira, bereziki, zailtasun handienak aurkitzen dituztenak etxebizitza duina eskuratzeko orduan. Beraz, Zeberioko EH Bilduren Udal Taldeak proposatzen du alokairurako diru-laguntzak ematea herritarrei, bereziki gazteek alokatzeko orduan dituzten trabak kontuan hartuta.

Gainera, egoera txarrean dauden baserriak konpontzeko diru-laguntzak abiatzeko eskatzen dugu, betiere, gerora, alokairuaren merkatura irteten baldin badira. Ugaon jarri zituzten martxan horrelako laguntzak.

6- Suteen aurrean prebentzioa

Honakoak dira gure proposamenak:

- Suteak ekiditeko prebentzio-informazio kanpainak burutu eta tximinia garbitzeko diru-laguntzak banatu: Zeberioko baserrietako tximiniak garbi izatea ezinbestekoa da suteak ekiditeko. Denok dakigunez, ezbehar horiek kalte ekonomikoez gaiz, hildako edo zaurituak ere eragin ditzakete. Pertsonen eta patrimonioaren babesaren helburuarekin bat eginda, beraz, Zeberioko Udalak tximiniak garbitzeko  sentsibilizazio-kanpainak abia ditzake urtero auzotarron artean. Horrez gain, zerbitzua erabili ahal izateko diru-laguntzak jarri daitezke behar gehien dutenen esku.

- Jada instalaturik dagoen suteen kontrako materiala: egoera txarrean dagoena ordezkatu eta faltan dena birjarri.

- Kutxak gainerako auzoetan jarri.

- Kutxetako materiala herritarrei erabiltzen irakatsi.

7- Herri-bide eta lur publikoen inbentarioa

Zeberioko Udalak ondare publikoa babesteko betebeharra du. Baina oraindik ere Inbentarioa ez du  EAJko udal gobernu taldeak egin, nahiz eta bere garaian dokumentu hau egiteko partida aurrekontuetan jaso zen. Inbentarioa derrigorrezkoa izateaz gain, beharrezkoa da gure herriko auzoen arteko bideak, bestelako bide publikoak eta lurrak zehazteko. Identifikatze lan horrek garrantzi handia du kudeaketan, horretan oinarritu behar baita Udala horiek guztiak berreskuratzeko orduan. Eta batez ere une honetan, non errepide nagusia, herri honetako bizkarrezurra dena, estutu den obren eta bionden ondorioz.

8- Ikasgela

Bada garaia Zeberiok kalitatezko ikasgela egonkor, jantzia eta atondua izateko. Mahai eta aulki egokiez hornitua, ordutegi zabalarekin, USB sarrerekin, argiteria egokiarekin,... Geure iritzian, udaletxearen hitzaldi aretoari itsatsitako gela egokiena izango litzateke.

9- Plazako frontoia

Plazako frontoiaren erabilera aldatu eta, Ermitabarrikoaren antzera, zabalik uztea proposatzen dugu. Argia ordutegi finko batean piztuta egongo litzateke, betiere, jarritako sentsore batzuek  bertan norbait dagoela detektatzen dutenean.

10- Diru-partida bat Eydeiria (Smara) herriaren egoera ezagutu eta kooperazio-proiektuak-edo aurrera eramateko

Azken Udalbatzan onartu zen aho batez Mendebaldeko Saharako su-etenaren amaieraren aurrean adierazpen instituzionala. Hitzok ondo egon arren, ekintzak eta ekimenak dira benetan bereizten  gaituztenak. Saharako Arabiar Errepublika Demokratikoko Eydeiria (Smara) herriko eta Zeberioko udalok senidetzea eta elkarrekin lan egitea erabaki zuten 2001ean. Pentsatzen dugu momentu egokia dela berriro hurbiltzeko eta udalerrien arteko lankidetza bultzatzeko.

2020ko azaroko EHBZ INFOa

| 2020-11-09 11:49:00

Azaroko INFOa argitaratu berri dugu eta dagoeneko Zeberioztarren buzoietan egongo da berriz beteta:

  • TXIRRINDULA ALOKAIRUA
  • KONTZILIAZIOAREN ALDEKO DIRU-LAGUNTZAK
  • UDAL-LOKALAK
  • LUDOTEKA ETA GAZTELEKUA
  • FRONTOIA
  • POBREZIAREN KONTRAKO NAZIOARTEKO EGUNA
  • Sare eta Etxerat elkarteen mezua

PDF formatuan ere eskuratu daiteke ondorengo estekan klikatuz.

Nerbioi Ibaizabal Mankomunitatea

| 2020-11-02 15:32:00

Joan den urriaren 26an Nerbioi Ibaizabal Mankomunitate berriaren estatutuak onartu egin ziren. Biltzar Orokorra lehen aldiz batzartu eta eskualdeko alkate eta zinegotzi guztien aldeko bozkekin aurrera egin du Zeberioztarrentzat garrantzitsua izango den Mankomunitatea.

Astebete lehenago Zeberioko EH Bilduk hitzaldia antolatu zuen Nerbio Ibaizabal Mankomunitatearen sorreraz informatzeko. Txutxi Ariznabarretak hartu zuen hitza, Arrankudiaga-Zolloko Alkate eta Mankomunitatearen Estatutuen Talde erredaktorearen burua. Txutxik Mankomunitatearen sorreraren inguruko informazioa eman zigun eta etorkizunera begirako erronkei buruz hausnartu genuen.

2009. urtean Udaltalde merkataritza-sozietatea sortu zen eskualdeko udalei zerbitzu komunak emateko helburuarekin. Besteak beste etxeko hondakinen kudeaketaz arduratu izan da. Urteekin merkataritza-sozietatearen izaera motz geratu da eta Udaltaldeak hasitako bideari jarraipena emateko Mankomunitatea sortzeko beharra ikusi da.

Nerbio Ibaizabal Mankomunitatea Urduña, Orozko, Arakaldo, Arrankudiaga-Zollo, Ugao-Miraballes, Zaratamo, Arrigorriaga, Etxebarri eta Zeberiok osatuko dute.

Mankomunitateak aukera berriak eskainiko dizkigu eskualdeko herriei zerbitzu osagarriak onartuz. Ingurumen arazoei heltzeaz gain, alderdi ekonomiko eta sozialetan (gizarte zerbitzuak) sartuko da, bereziki garrantzitsuak direnak une honetan.

Euskara izango da Mankomunitatean erabili eta lan egiteko lehentasunezko hizkuntza. Halaber, Mankomunitatearen jarduera instituzional eta administratiboan genero ikuspegia sartuko da.

Herri txikiok gogotik begiratzen genion mankomunatzeari, gureak propio ez diren zenbait zerbitzuz baliatzeko. Nerbioi-Ibaizabalgo Mankomunitatearen xedea da zerbitzu hauek ematea Eskualdeko bulegoaren kudeaketaz gain: Agenda 2021 eta Agenda 2030 - Jasangarritasun-irizpideak udal-politikan txertatuko ditu ; Etxeko hondakinak bildu eta garraiatzeko zerbitzua, eta hondakin-frakzioen tratamendua kudeatzea; Erosketa eta kontratazio zerbitzua; Oinarrizko eta arloko gizarte zerbitzuak. Baita eskualdekoak ere; Euskara zerbitzua; Eskualdeko enplegu plana; Eskualdeko bizikleta-bideak; Eskualdeko Gazteria Plana eta Berdintasunerako Zerbitzua. Zeberiok behar dituen zerbitzuei atxiki ahal izango dio.

Jendaurrean jarriko dira Estatutuak herritarrek ezagutu eta alegazioak egin ditzaten. Zeberioko Udalbatzak onartu beharko ditu.

Mankomunitateak ondorengo organoak izango ditu:

  • Lehendakaritza eta lehendakariordetza: bere eskumenak argaldu dira Gobernu Batzordearen mesedetan.

  • Batzar Orokorra: Mankomunitatea osatzen duten udal guztietako alkate eta zinegotzi guztiek osatzen dute. Haien eskumenak estatutuak aldatzeko ekimena eta Mankomunitatea desegiteko erabakia dira bakar-bakarrik.

  • Osoko Bilkura: ordezkaritza udal bakoitzeko zinegotzi kopuruaren araberakoa da, D´Hont sistemaren bidez. Zeberiok 3 ordezkari izango ditu. Eskumen zabalagoak ditu organo honek, hemen hartuko dira benetan erabakiak.

  • Gobernu Batzordea: bederatzi kidek osatuko dute, horietako 1 Zeberiokoa. Mankomunitatearen eguneroko kudeaketan arituko da.

Azkenik, Mankomunitatearen zerbitzuak edukiz jantzi beharko dira. Erronka handia dugu aurretik, beti bezala, gakoa baitago hartzen diren erabakietan. Halakoa edo bestelakoa izango baita Mankomunitatearen egitekoa: irizpide ezkertiarrak edo eskumakoak txertatu heinean herritarren beharrengandik hurbilago edo urrunago egongo da. EH Bildu ikuspegi ezkertiarra bermatzen saiatuko da une oro.

ALBISTEAK

2020ko Iraileko EHBZ INFOa

2020-09-11 16:53:00

EH Bildu: aurrera Zeberion, Bizkaian eta EAEn

2020-07-14 07:31:00

2020ko uztaila. EH Bildu, gehien hazi den indarra: 248.000 boto; 22 ordezkari