| 2021-04-17 10:40:00

Gaur gure udalerriko hiritarren aurrean aurkezten garen alderdi politikook pertsona euskaldun presoei Espainiako Gobernuak aplikatzen dizkien politikei buruzko gure azterketa eta balioespena ezagutarazi nahi dizkiegu Espainiako Gobernuari eta euskal zein nafar iritzi publikoari.

Sinatzen dugun alderdiok, euskal erakunde gehienetan eta sindikatu gehienekin askotan adostu ditugun adierazpenetan honako hau eskatu izan dugu: “Espetxeetako Lege Orokorrak aurreikusten duena bete dadila, askatasunaz gabetzen duten zigorrak bete daitezen norbereingurunetik deserrotu gabe, birgizarteratzearen printzipioek adierazten duten moduan. Zentzu honetan, 2011 urtean ETAk jarduera armatua utzi zuenean irekitako denboraldi berriaren barruan honako hau adierazten dute: beharrezkoa dela beste espetxe politika bat, presoek beren gizarte eta familiako erroak dituzten lekuetatik urrun zigorrak bete beharra ekidingo duena. Politika berri horrek presoak bere familiarekin harremanak izatea erraztuko du eta adin txikikoseme-alaben ongizateari begiratuko dio, gurasoek haiekin egoteko duten eskubidea defendatuz”.

Covid-19ak eta konfinamenduak pandemia honek espetxeratuentzat dituen ondorioei buruzko eztabaida ireki dute. Hilabete hauetan ugariak izan dira erakunde politiko eta sozialen ekimenak, nazioarteko erakundeen gomendioak jarraituz, Europatik, Madriletik, Gasteizetik eta Iruñeatik eskaera hau egin dutenak: dagokien agintariek har ditzatela neurri espezifikoak pertsona presoei begira, haien osasun eta segurtasun baldintzak hobe daitezen eta hobera egin dezaten osasun krisialdiaren ondorioek bereziki ukitu dituzten legedi juridikoko eskubideek ere.

Zentzu honetan, bereziki garrantzitsua jotzen dugu 2020ko apirilaren 27ko Eusko Jaurlaritzaren proposamena, honako hau baieztatzen duena: Espetxeetako Lege Organiko Orokorraren 12.1artikuluaren arabera, Covid-19 izurritearen ondorioen testuinguruan eta osasun publikoa prebenitu eta babesteko helburuarekin, egitasmo orokor bat artikulatu behar da espetxeratu guztiak preso bakoitzaren familia ingurunetik hurbilen dauden espetxeetara hurbilduak izan daitezen”

Euskal Autonomia Erkidegoko gizarteak bakearen eta bizikidetzaren aldeko apustu garbia egindu. Hainbat modutako eta etengabeko eskaerak egin ditu, iraganeko logiken araberako espetxe politika behin betirako gainditu dadin.

Ondorioz, honako hau adierazi nahi dugu:

1. 2011tik irekita dagoen errealitateari jarraiki, Espainiako Gobernuari helarazten diogu Euskadiko Autonomia Erkidegoko gizartearen eta adierazpen honen sinatzaileen sostengu osoa, pertsona euskaldun presoei legedi arrunt soila eta espetxe politika normalizatu bat aplikatzeko beharrezkoak diren urratsak ematea erabakitzen badu, aldatzear dugun iraganeko logiken araberako legedian oinarritutako egoera behin betiko gaindituz.
2. Espetxeetako Lege Orokorrean aurreikusitakoa betetzea eskatzen dugu berriro ere, askatasunaz gabetzen duten zigorrak betetzean deserrotzerik gerta ez dadin. Askatasunaz gabetzen duten zigorrak familia eta gizarte sustraiak dituzten lekuetatikurrun betetzea ekidingo duen espetxe politika bat ezinbestekoa jotzen dugu.
3. Premiazkotzat jotzen dugu egungo urruntze politikari amaiera ematea eta Covid-19arenegungo testuinguruan gure sostengua adierazten diegu honako egitasmo hau artikulatzera zuzendutako proposamen guztiei: espetxeratu guztiak orokorrean eta pertsona preso bakoitza, partikularrean, hurbil ditzatela beren familia ingurunetik hurbilen dauden espetxeetara. Euskal Autonomia Erkidegoaren kasuan Martutene, Basauri eta Zaballako espetxeetan birkokatzea dakar neurri horrek.
4. Helburu hau betetzeak modu erabakigarrian esku hartuko luke euskal gizartean eta politikan iraganarekin lotutako etapa bat ixten eta aukera emango luke, biktima guztiak oroituz, bizikidetza demokratikoan ardaztutako orainaldiko eta etorkizuneko denboraldi berri bat eraikitzen.

Akordio hau Etxerat elkarteari helaraztea, konpromiso hau gizarteratzeko eta ezagutarazteko.

Amaitzeko, egoera hau jasaten ari diren pertsona presoen senitarteko eta adiskideeiezagutarazi nahiko genieke hartua dugun konpromisoa, aipatu helburua lortzen laguntzekobeharrezkoak diren urratsak ematekoa.

 

Sinatzaileak:

Usurbilgo Euskal Herria Bildu eta Usurbilgo Eusko Alderdi Jeltzalea - Partino Nacionalista Vasco

 

Begiak irekitzeko garaia da

| 2020-06-25 13:07:00

Iragan hurbila.

HARROPUZKERIA. Kazetariak: "Zergatik ez zoaz Zalbibarrera?" U.k, harro: "Ez naiz joango txiolari batzuengatik...". Agerian, trama ustel handi bat, zaborrak berak baino ustelagoa. Bi langile desagerturik, eta ebidentzia bat: agintari horiek interes ekonomikoak pertsonen eta osasunarengainetik jartzen dituzte.

USTELKERIA. Epaitegiak dira mintzo: De Miguel, Alonsotegi, Balentziaga, Bidegi... Kasu isolatuaketa puntualak ote dira? Ez, gaitz estrukturala da, eta oinarrian ondo finkatutako sareak daude, aginte-postuetatik kudeatzen direnak diru publikoa lagunen artean banatzeko.

AUTORITARISMOA. COVID-19aren krisiak nabarmen utzi du zein modu autoritarioan gobernatzen duen Gasteizko gobernuak. Ez dute onartu eragile politiko eta ekonomikoen mahairik. Ez dute eragile sozialekin kontrasterik egin nahi izan, ez eta herritarron iritzirik ere aintzat hartu.Bulego isolatuetan hartu dituzte erabakiak.

DESBIDERAKETA. Patrika pribatuek dute lehentasuna. Zerbitzu publikoak oso ahul agertu diren honetan (osasuna, zaintza, hezkuntza, euskara, kultura, eta abar), non jarri dute lehentasuna? Abiadura handiko trenaren edo Donostiako Metroaren obretan.

HONDAMENDIA. Bertatik bertara ikusi ditugu errauste-plantaren ketzarrak eta Arkaitzerrekako arrainak hilik. Herritarroi barruak nahastu zaizkigu, eta kezkaz bete burmuinak. Jaurlaritzakoeta Aldundiko agintariek, axolagabe, lehenbizi ikerketa oztopatu, gero ukatu, ondoren garrantzia kendu, eta bukatzeko azalpen sinestezina zabaldu dute. Kitto. Hori da gureganako duten errespetuaren neurria.

ESKASKERIA. Urkuiluk zer lortuko, eta Kantabriako mugaren irekiera bi egunez aurreratzea, sekulakobaliabide mediatiko-propagandistikoz hanpatuta. Txistea dirudi. Bien bitartean, EAEkoeuskaldunok ezin Nafarroara edo Iparraldera joan. Hori da Urkuiluren ikuspegia: nazionala? Ez,bakazionala. Txistea litzateke, horren atzean benetako ikuskera politikoa ez balego.

AHULTASUNA. Ikusi dugu nola berrogei urtez bete ezin izan den hala moduzko autonomia, bi egunetan desegin zen: harreman bilaterala bai (hala dira guztiak), baina ez berdinen artekoa.

Orainean, lehengo lepotik burua.

Krisi honek zer ikasia eman behar ligukeen arren, Gasteizko gobernuan daudenek oso jarduneta mezu kezkagarriak zabaldu dituzte dagoeneko. Petronorren, Euskal Herriko enpresa kutsatzaileenetakoan, ateratako argazkiak dena zioen irudi bakar batean: lehen bezala jarraituko dute aurrerantzean ere. Munduko herrialde aurreratuenek ekonomia ekologikoranzko trantsizioa premiazkotzat jotzen dutenean, hemen lehen bezala jarraituko dugu, larrialdi klimatikoari kasurik ez, eta natura hondatzen. Hori gutxi ez, eta zerbitzu publikoak eraginkorrago izan daitezen ez da inongo berrikuspenik planteatu. Esate baterako, epe motz-motzari begira, inork ba al daki zenbat baliabide eskainiko diren 2020-21eko ikasturtea ondo has dadin? Hezkuntza-komunitateak ba al du plan serio baten berririk? Antolatu al dira bitartekoak egoera desberdinetarako? Prestatu al dira irakasleak? Ez, ez eta ez. Deus ez. Nola ba? Orain lehentasuna hauteskundeak dira. Eta gero berandu izango da.

Etorkizuna.

Gauzak beste era batera egin daitezke. Usurbilen ikusi dugu zer den laguntza-sare komunitarioak eratzea, zer den behar handiena dutenei begira aritzea, zer den desberdinenarteko akordioak lortzea, zer den elkarlana. Ikusi dugu zer den herrigintzan aritzea. Hori da bidea: konpromiso kolektiboa, dinamika komunitarioak, ahulak bazterrean ez uztea, etakrisi-egoera latz honetatik ateratzeko sektore publikoa indartzea. EHBilduk horretan sinestendu. Kutxa batean sartzen den papera gauza hutsala da. Papertxo batek ez du, berez, mundua aldatuko. Baina desegoki erabiltzeak, edo ez erabiltzeak, gauzak dauden-daudenean utziko ditu. Eta ederki ikusi dugu zer den hori.

 

2020ko ekainaren 23an Noaua!ren 829.alean publikatutakoaren bertsio osoa.

AGUR ETA KOLORE JOSE LUIS!

| 2020-04-23 16:15:00

Kolpe gogorra jaso dugu gaur usurbildarrok, Euskal Herriak eta, oro har, kulturak Jose Luis Zumetaren heriotzaren berri izan dugunean.

Arte garaikidearen ikur, artista bizi eta emankorra izan da Zumeta. Gure herriaren imaginario kolketiboan ezinbesteko erreferentzia. Mila esker!

Aberri egunerako deia usurbildarrei

Atera euskal ikurrak etxeko balkoietara! eta parte hartu mosaiko erraldoian!

| 2020-04-10 18:49:00

Aberri eguna 2020

Usurbilgo Udalaren adierazpen instituzionala

| 2020-04-10 18:35:00

Igandean ospatuko dugun Aberri Eguna egoera oso berezian datorkigu, izan ere, konfinamendu betean aurkitzen da euskal jendartea, eta, dagoeneko, Euskal Herriaren luze zabalean bere arrastorik gordinena utzi du gaitz honek: mila herritar inguru zendu dira, gaitzak jota daude milaka herritar, eta beste milaka herritarrek euren lanpostua arriskuan dute.  Halaber, osasun krisi honen ondorioz, gure herriko egitura ekonomikoa gogor kolpatzen ari da.  Mundu mailako krisi humanitario honek, ondorio sanitarioez gain, aurreikusi ezin ditugun beste hainbat ondorio ere eragingo ditu beste hainbat alorretan, besteak beste, gure bizimodu eta ohituretan. Edonola ere, espero dugu politikaren alorrean orain arteko egiteko moduetan ere aldaketak eragitea.

Ama lurraren jasangarritasuna eta gizaki ororen duintasuna eta zoriontasuna mundu mailako lehentasun bilakatzea espero dugu, baita gure aberriarentzat ere. Inoiz baino beharrezkoagoa da Euskal Herriaren aitortza defendatzen dugunon aldetik hausnartzea oraindik aitortu gabeko herri txiki honek munduan jokatuko duen papera zein izan behar duen: nazio aitortza ez da soilik esparru politikoan gauzatu beharreko helburua, izan ere, nazio izaera gero eta gehiago lotzen da komunitatearen garapenarekin eta haren jasangarritasunarekin, autoeraketa eta dinamika sozial eraldatzaileen arteko lankidetzarekin, nortasuna eta aniztasuna bateratzearekin. Oinarrizko eskubideak bermatzea, pertsonen arteko berdintasuna eta elkarrenganako errespetua sustatzen dituen komunitatea da nazio eraikuntzaren oinarria. Horregatik, oinarrizko eskubideen bermea, pertsonen arteko berdintasuna eta elkarrenganako errespetua sustatzen dituen komunitatea aldarrikatu nahi dugu 2020ko Aberri Egun berezi honetan.

Erabaki guneak erabakiak gauzatu behar diren lurraldeetatik zenbat eta hurbilago egon, orduan eta eraginkortasun handiagoz erantzungo zaie egoera zailenei. Zer izan nahi dugun erabaki nahi dugu, alboko herrialdeekin zer-nolako harremanak izan nahi ditugun erabaki nahi dugu, bai eta krisi honetatik nola atera eta utziko dituen ondorio lazgarriei erantzuteko ahalmen politikoa izan nahi dugu. Herri honek badu horretarako nahikoa sen demokratiko.

Osasun krisia amaitu amaituko da, bidean heriotza asko eraginda, tamalez. Krisia amaitutakoan, egoera sozial eta ekonomiko latzari aurre egin beharko diogu, eta egoera horrek eskatuko dizkigu abertzaletasuna eta ahalegina. Herri plan erraldoi bat jarri beharko dugu abian, krisi honek familietan, enpleguan eta enpresen jardueran dituen ondorio izugarriak arintzeko.

Elkarlanean aritzeko garaia da: batera eta auzolanean. Norabide horretan, pasarte ilun hau atzean utzi eta gure herriarentzat eta herritarrentzat etorkizun hobeagoa lortzeko prestutasun oso dugu. Horregatik, Aberri Egun honetan eta egoerak eskaintzen dituen aukera urriak profitatuaz,

Usurbilgo Udalak, honako hau adierazten du:

I.- Doluminak helarazten dizkie senitartekoen artean edota lagunartean galera pertsonalak izan dituzten herritarrei

II.- Esker hitzak baino ez ditu osasun eta zaintza arloko langileentzat eta egoera honetan beren onena ematen ari diren herritar guztientzat

III.- Udaletxe aurreko ikurriña masta erdian jarriko du.

Halaber, dei egiten die herritarrei:

I.- Eguerdiko 12:30ean minutu bateko isilunea egitera eta hurbilekoak galdu dituzten eta nahi bezala agurtu ezin izan dituzten familiekin dolua partekatzera.

II.- Ikurriñak jartzera etxeetako balkoietan.

III.- Eta beste zenbait eragilek Aberri Egunerako deitutako ekimenetan parte hartzera.

 

SINATZAILEAK: Euskal Herria Bildu eta Euzko Alderdi Jeltzalea

• «
• 1
• 2
• 3
• »