AKTUALITATEA

Urretxu eta Zumarragaren arteko kohesioa

| 2024-12-10 19:26:00

EH BILDUREN 2025eko AURREKONTU PROPOSAMENA

Aurreko urtean egin genuen eskema berdina jarraituz, lehenik, Urretxuri
zuzenean eragiten dien aurrekontuak landu ditugu; eta, bigarrenik, Urretxuk
eta Zumarragak amankomunean landu beharreko gaiak identifikatu ditugu.
Bestetik, aurreko urtean proposatu genituen puntu batzuk ere sartu ditugu
idatzian; izan ere, beharrezko ikusten dugu horien gaineko hausnarketa bat
egitea.

URRETXU ETA ZUMARRAGA

Urretxu eta Zumarragako EH Bilduk bi udal gobernuei aurkezten diogun
proposamena:

Merkataritzaren etorkizuna

  • 18-25 urte bitarteko gazteei zuzendutako bonoak banatzea Zumarraga eta Urretxuko establezimendu guztietan gastatzeko. Gazte bakoitzak 10 euroko 5 bono jasoko ditu, 50 euro. Proposamen hau plan estrategikoaz aparte doa, behin behineko neurri gisa.

Mugikortasun jasangarri bateratua

  • Bi herrietan AuzoBus zerbitzu bateratua martxan jartzeko konpromisoa eta horretarako azterketa teknikoa lantzea. Era berean, bi udalerrien arteko garraio zerbitzua Aldundiaren eskumena dela kontuan hartuta, Aldundiarekin elkarlanean aritzeko konpromisoa. 

Aisialdia eta ikastetxeen arteko elkarlana

  • Hezkuntza Legeari jarraiki Zumarraga eta Urretxuko hezkuntza-kontseilua martxan jartzea 2025ean. Kontseiluaren lehen egitekoa eskolaz kanpoko aisialdi antolatua, euskararen arnasgune izan dadin, elkarlanean lan egitea izango delarik.

Euskararen garapenean jauziak

  • Zintzo Mintzorekin egindako bekaren ondoriozko ekimenak eta neurrien inguruan udalak bere gain ekimenak martxan jartzeko konpromisoa eta bi herrien artean eragile instituzional eta sozialez osaturiko Euskararen Mahaia eratzea proposatzen dugu.

Gizarte-zerbitzuen unibertsaltasuna

  • Zumarraga eta Urretxuko gizarte-zerbitzuen laguntza eta zerbitzuak koordinatu eta zerbitzu-karta bateraturantz joateko lanketa eta azterketa egitea.

Kulturara eta aisialdira sarbidea erraztu

  • Musika Eskolako matrikuletan progresibitatea sartzea beka-sistema baten bidez.

Kiroldegiko txartel bateratua

  • Ispila eta Aldiri kiroldegietako txartelek bi kiroldegietarako sarbidea izatea. Honekin, Urretxu zein Zumarragako herritarrek, bono berdina ordainduz, bi herrietako  zerbitzuak zein instalazioak modu berean erabiltzeko aukera izatea proposatzen dugu.

Osasungintza

  • Osasun komunitarioko estrategia garatzea eta osasun-kontseilua eratzea PAC elkartea, anbulategia, ospitalea eta eragile sozial desberdinekin batera.