AKTUALITATEA

| 2026-10-21 15:30:00

Pasaiako EH Bilduk positibotzat jo du udaleko osoko bilkurak aho batez onartu izana Pasaiako Portuko Agintaritzari udal espazio eta ekipamenduen lagapenak gauzatzeko falta diren izapideak azkartzeko eskatzea. Akordioak aspalditik luzatzen ari den egoera desblokeatzeko balio behar du, Udalak pasaitarren eguneroko bizitzako espazioak kudeatzeko, mantentzeko eta hobetzeko duen gaitasuna mugatzen jarraitzen baitu.

2021ean Portu Agintaritzak eta Udalak sinatutako protokoloak hainbat espazio eta instalazio doan lagatzea aurreikusten zuen, baina bost urte geroago konpromiso horietako gehienak gauzatu gabe daude oraindik. EH Bilduren ustez, atzerapen hori justifikaezina da, eta ondorio zuzenak izaten ari da udalaren kudeaketan eta herritarren bizi-kalitatean, inbertsioak egitea, gune horiei eustea eta balioa ematea zailtzen ari baita.

Egiteke dauden lagapenen artean daude Trintxerpeko alkateordetza eta azoka, Gernika plaza, Bizkaia plaza, Donibaneko Kulturgunea, Trintxerpeko topoaren pasabidea eta Herrera Mendebaldeko biltegien estalkia. Hiri-bilbean integratuta egon eta herritarren erabilera izan arren, juridikoki portuko jabari publikoaren mende jarraitzen duten espazioak dira, eta horrek disfuntzioak sortzen ditu eta Udalaren jarduteko ahalmena mugatzen du.

Gainera, EH Bilduk gogorarazi du aurten bertan, uda baino lehen, galdera bat egin zuela Diputatuen Kongresuan lagapen horien egoerari buruz. Ministerioaren erantzunaren arabera, batzuk 2026 amaitu baino lehen gauzatuko ziren, eta beste batzuk 2027ko lehen seihilekoan. Hala ere, gaur egun ez dago aurrerapen zehatzik epe horiek betetzen direla bermatzeko. Ziurtasun falta horrek indartu egiten du Portu Agintaritzari espedienteak arindu ditzala eta konpromiso eta data zehatzak dituen egikaritze-egutegi bat ezar dezala eskatzeko beharra.

Taldeak bereziki kezkagarritzat jo du Donibaneko Kulturgunearen egoera. Udalak berak eraikitako ekipamendua da, eta egoera konpontzen ez bada, Portu Agintaritzari itzultzeko arriskua dago. «Pasaiak ezin du itxaroten jarraitu. Konpromiso zehatzak eta epe argiak behar ditugu gune horiek behin betiko udalen esku uzteko eta Udalak berme guztiekin kudeatu ahal izateko», defendatu du EH Bilduk.

Zentzu horretan, EH Bilduk bultzatutako 2023ko Estatuko Aurrekontu Orokorren negoziazioaren esparruan lortu zen Ciriza Etxearen lagapenak Pasaiako interesak defendatzeko Estatuko erakundeetatik ere lan egitearen garrantzia erakusten duela azpimarratu du alderdiak. Horrela, taldeak lanean jarraitzeko konpromisoa berretsi du, bai udalerritik bai Madrildik, pasaitarren eskubideak errespeta daitezen eta hartutako konpromisoak bete daitezen.

Azkenik, EH Bilduk Pleno batean elkarrekin lan egiteko aukera proposatu zien gainerako udal taldeei: Portuko Agintaritzari eskatzeko azter dezala esparru hitzarmenean espazio berriak sartzea, hala nola San Pedroko lonja berriaren plaza eta lonjaren gainean dagoen plaza, lagapena lehenbailehen gauzatu ahal izateko.

Mozioa aho batez onartzea urrats positiboa da, baina benetako aurrerapenak ekarri behar ditu. EH Bilduk Portu Agintaritzak hartutako konpromisoak bete ditzala eta lagatzeke dauden espazioak lehenbailehen Pasaiaren eta bertako biztanleen zerbitzura jar daitezela eskatzen jarraituko du.