Nafarroa

Irisgarritasun arazoak dituzten ikasleei eskola garraio zerbitzua zabaltzeko eskatu dio EH Bilduk Gobernuari

| 2019-12-27 09:55:00

EH Bildu Nafarroa Talde Parlamentarioak eskola-garraioarekin lotutako bi ekimen erregistratu ditu. Alde batetik, Hezkuntzako kontseilariari zuzendutako galdera bat, Zizur Nagusiko eta beste herri batzuetako ikasleen aldarrikapenei zer erantzun emango zaien jakiteko, eskola-garraioaren onuradun izan ahal izateko, irisgarritasun-arazoak daudenean beren herriko ikastetxeetara joateko.

Indarrean dagoen araudiak hainbat baldintza betetzen dituen eta eskola-zonifikazioaren arabera dagokion ikastetxe publikora joateko hiriarteko desplazamendua behar duen ikaslea onartzen du eskola-garraioaren onuradun gisa. Hala ere, EH Bilduk adierazi duenez, "irisgarritasun arazoak daude herri berean ere, distantzia luzeak egin behar dituztelako eta autobiak edo trenbide-pasaguneak zeharkatu behar dituztelako". Izan ere, eskaera hori Zizur Nagusiko Udaleko Osoko Bilkurak onartutako adierazpen baten emaitza da, eta Tafalla edo Berriozar bezalako beste herri batzuek ere aldarrikatu dute, horiek ere antzeko irisgarritasun arazoak baitituzte beren ikastetxe publikoetarako.

Ildo beretik, EH Bilduk mozio bat ere erregistratu du, zeinaren bidez Hezkuntza Departamentuari eskatzen baitzaio eskola-garraioaren antolamendua eta funtzionamendua arautzen dituen araudia aldatzeko, ikasle horiek eskola-garraioaren onuradun izan daitezen. Gainera, neurri horren ondoriozko gastua 2020ko Aurrekontuen Proiektuan jasotzeko eskatu dio EH Bilduk Gobernuari.

Era berean, mozioaren bigarren puntuan, EH Bilduk eskatzen du urtebeteko epean azter eta proposa daitezela behar diren mekanismoak 16 eta 18 urte bitarteko ikasleei eskola-garraioaren estaldura emateko, baldin eta landa-eremuetatik Iruñera joan behar badute Batxilergoa edo Lanbide Heziketa egiteko, egungo araudiarekin zerbitzuaren onuradun ez baitira. Udal ugariren eskariaren aurrean, EH Bilduk gogora ekarri du "Hezkuntza Departamentuko aurreko lantaldeak aldarrikapen horri ekonomiaren eta antolakuntzaren ikuspuntu batetik estaldura nola eman aztertzeko konpromisoa" hartu zuela.

Hala, EH Bilduren ustez, "hori da egungo Departamentuak jarraitu beharko lukeen ildoa; izan ere, hainbat udalek argudiatu duten bezala, lurralde-kohesioa bultzatzeko eta landa-eremuetako despopulazioa saihesteko neurri bat da, hezkuntzarako sarbiderako ekitate-arrazoiez gain".

Etxez-etxeko errehabilitazio zerbitzua baliabide propioekin egin dadila eskatu du EH Bilduk

| 2019-12-23 11:25:00

EH Bildu Nafarroa Talde Parlamentarioak mozio bat erregistratu du, zeinaren bidez eskatzen duen Osasun Departamentuak eremu publikotik bere gain har dezala etxez-etxeko errehabilitazio zerbitzua eta haren pribatizazio prozesua geldiaraz dezala. Santos Indurain kontseilariak abenduaren 10ean iragarri zuen horren lizitazioa, Osasunbidearen Gaitasun Funtzionala Hobetzeko Planaren barruan.

Halaber, Osasun Departamentuari eskatzen zaio bere gain har dezala zerbitzu berririk ez pribatizatzeko konpromisoa, bai eta berrikusi ditzala ere enpresa pribatuekin egindako itun eta kontratu guztiak, sektore publikorako, ahal den neurrian, jada pribatizatuta dauden zerbitzuak berreskuratzeko.

EH Bilduren ustez, kontseilariak iragarritako erabakia "bide arriskutsua da, azken urteotan bultzatu diren politiketatik urruntzen dena; izan ere, sektore publikoarentzat hainbat zerbitzu berreskuratu dira, hala nola, Nafarroako Ospitaleko sukaldeen kudeaketa, etab.". Ildo horretatik, "jarraitu beharreko bidea hori dela uste dugu: ahal den neurrian pribatizatuta dauden zerbitzuak despribatizatzea eta zerbitzu berri bat ere ez pribatizatzea, zerbitzu publikoarentzat eta arretaren kalitatearentzat dakarren galeragatik".

Horrela, EH Bilduk kritikatu duenez, "akatsa da enpresa pribatu baten lizitazioa eta prestazioa aukera bakartzat hartzea".

Horregatik guztiagatik, EH Bildu bat dator fisioterapiako arreta behar duten herritarren etxera eramateko beharrarekin, “baina ez zerbitzua baliabide propioekin emateari uko eginez”.

Mankomunitatearen aurrekontuak eta urteko kudeaketa plana babestu ditu EH Bilduk

| 2019-12-19 19:00:00

Iruñerriko Mankomunitateko EH Bildu taldeak bere poza adierazi nahi du arratsaldean egindako batzarrean erakundearen aurrekontu berriak eta bere kudeaketa plana onartu izanagatik, lan ildo nagusiak markatzen dituen dokumentua. EH Bilduk horien alde bozkatu du, modu zehatzago batean jasota daudelako, eta etorkizunerako garrantzitsutzat jotzen ditugun eta eskualdeko pertsonen bizi-kalitatearekin eta ingurumenarekin zerikusia duten hiru gairi ematen zaielako garrantzia.

EH Bildurentzat garrantzitsua den lehenengo gaia Billabesasen gaueko zerbitzua berritzea da. Gai hau duela ia bi urtetik hona lantzen ari da hainbat kolektiborekin batera, besteak beste, kolektibo feministekin eta eskualdeko berdintasun-teknikariekin, eta horren emaitza izango da gaueko zerbitzua etxebizitzetara eta orain arte iristen ez zen eremuetara hurbiltzea. Genero kontuei erreparatuz, autobuserako sarbidea ere hobetuko dugu, hori baita mugikortasunerako bitarteko unibertsala, garraio publikoaren aldeko apustua indartuz. Gainera, EH Bilduk kudeaketa-planean sartzeko eskatu du, datorren urteko lehentasunetako bat izan dadin, hitzetatik ekintzetara pasaz.

Era berean, nabarmendu nahi dugu hondakinen egoera konpontzeko bidean aurrera jarraitzen dela. Hori da Mankomunitateak aurre egin behar dion gai larriena eta premiazkoena, eta, gure ustez, aurrekontu eta kudeaketa-plan honekin aurrera pausoak ematen jarraitzen da batzarraren gehiengoak babesten duen konponbide baterantz.

Bestalde, azpimarratu nahi dugu urteko kudeaketa-planean drainatze jasangarrien probak egiteko ere eskatu dugula, era horretako konponbideetan parte hartu nahi duten udaletan egiteko. Drainatze jasangarri horiekin euri-uren kudeaketa hobetu nahi da, ibaietara doazen jariatze-uren emaria eta kutsadura murriztuz, hiri-paisaia iragazkortuz eta azalera berdea handituz.

Azkenik, EH Bilduk garrantzitsutzat jotzen ditu beste gai batzuk ere, aurreko legegintzaldian hasi zirenak eta aurrekontu hauekin aurrera jarraituko dutenak, hala nola Salesasen egoitza berria edo EHGren berrikuntza teknologikoa, garraio-txartelaren kargan hobekuntza garrantzitsuak ahalbidetuko dituena, besteak beste.

Migratzailearen Nazioarteko Egunean, Navarra Sumak 'Zurrumurruen atzean, pertsonak' erakusketari egindako betoa salatzen du EH Bilduk

| 2019-12-18 10:10:00

Abenduaren 18arekin urtero egin bezala, EH Bilduk bat egiten du Pertsona Migratzaileen Nazioarteko Egunarekin, eta Nazio Batuen Batzar Nagusiak migrazioek gizateriaren garapenari egiten dioten ekarpena nabarmendu nahi du. Horrela, pertsona orok bide seguruak erabiliz migratzeko duen eskubidea aldarrikatu nahi dugu, baina baita bere jatorrizko lekuetan duintasunez eta askatasunez bizitzeko duen eskubidea ere, inork bere burua derrigorrean lekualdatu beharrik izan gabe. Kultura-aniztasun hori aberasgarria da eta, behar bezala kudeatzeko gai bagara, kohesioaren eta bizikidetzaren funtsezko elementu bihurtuko dugu. Horregatik uste dugu administrazio publikoei dagokiela lehentasuna ematea kultura anitzeko bizikidetza bultzatzen duten eta, gainera, pertsona guztien eskubide eta aukera berdintasuna bermatzen duten politika guztiei.

Hala ere, oraindik ere jarrera intoleranteak aurkitzen ditugu erakundeetatik bertatik, hala nola Navarra Sumak 'Zurrumurruen atzean, pertsonak' erakusketa debekatu izana. Nafarroako hainbat herritan zehar ibili ondoren, Eguesibarren ikusgai izan behar zen erakusketa, Burlatako Udaleko Kultura Aniztasuneko Arloarekin lortutako akordioaren ondorioz. Erakusketa horren bidez, gure gizartean bizikidetza larriki oztopatzen duten zurrumurru oinarrigabeak, estereotipo negatiboak eta aurreiritziak zabaltzen direla salatzen da. Beraz, erakusketa honi jarritako betoa gure herrietako bizikidetzari ere badagokio; izan ere, haren helburua zurrumurru guztiak desmuntatzea da, bai eta horietatik eratortzen diren diskurtso arrazista eta xenofoboak ere.

Ultraeskuindarren eskutik xenofobiaren eta arrazakeriaren gorakadaren aurrean, EH Bilduk berretsi egiten du bizikidetza bultzatuko duten era guztietako jarduerak sustatzeko beharra. Uste dugu ez dela beto edo debeku garaia, baizik eta Nafarroako erakunde guztietan kultur aniztasunaren kudeaketa demokratiko baterako politikak bultzatzekoa, gizarteratzea, bizikidetza eta pertsona guztien eskubideak bermatuko dituzten neurrien bidez.

Mankomunitateko EH Bilduk ingurumenarekiko konpromisoari eusten dio

| 2019-12-16 09:40:00

Navarra Sumak egindako salaketen aurrean, EH Bilduk adierazi nahi du txarteldun edukiontziak eskuratzeko proiektua Iruñerriko Mankomunitatean duela bi urte baino gehiagokoa dela. Zehazki, gai honekin lotutako 30 ekitaldi baino gehiago egin dira, hau da, akordioak, txostenak, informazio-bilerak …

Lizitazio hori joan den irailaren 3ko kontseiluak onartu zuen, horretarako txosten juridiko batean, beste tekniko batean eta datuen tratamenduarekin sortutako egoera aztertzen zuen beste txosten batean oinarrituta. Aurretik, uztailaren 2an, proba pilotuaren eremuetan lortutako emaitzak ikusita, sistema hedatzea onartua izan zen.

Sarrailak erosteko lehiaketarako lizitazio bat onartu zen, 2 milioi eurotik beherako balioan, lehen fase baterako. Hurrengo faseak beste lizitazio berri bat ezarriko luke, sistema osoa bete-betean garatzeko. Beraz, ez gara 7,4 milioi euroko kontratu bati buruz ari. IMko abokatuaren ustez, txosten teknikoan ez dago behar bezala arrazoituta egutegi-epeen gaia; beraz, dena kontratu bakarra izan beharko litzatekeela ezartzen du.

Hitzez hitz dio "gai honi dagokionez, ezin da a priori adierazi zatikapena iruzurrezkoa izan den ala ez. Azter daitekeen gauza bakarra da justifikazioa arrazoituta dagoen". Agerikoa da juridikoki desberdinak diren interpretazioen aurrean gaudela..

Bere garaian esan genuen ordenantzaren aldaketa eta lizitazio hau aldi berean eraman beharko genituzkeela. Ez zen aurreikusten kontratua onartzea eta esleitzea, orduan baita lizitatzaileei eskubideak sortzen zaizkienean, ordenantza aldatu aurretik. Ostegun honetan bertan, hilak 19, IMk batzarrean helduko dio aferari.

Gai hau premiazkoa da, txosten ugaritan justifikatua, eta hondakinen plan integralean sartutako beste gai batzuekin batera behar du, lehenbailehen ekin diezaiogun.

Beraz, erakundearentzat inolako kalte ekonomikorik ez duen kontu bati buruz ari gara, azken bi urte hauetan askotan jakinarazi eta eztabaidatu den kontu bati buruz, eta hondakinen legeak markatzen dizkigun helburuak betetzen aurrera egiteko beharrezkoa dena.