Nafarroa

Bel Pozuetak berretsi egin du Pirinioetako despopulazioaren aurkako neurriak bultzatzeko konpromisoa, inguruko ordezkariekin izandako bileraren ondoren

| 2021-06-10 09:50:00

Bel Pozueta Nafarroako EH Bilduko diputatua Pirinioetako alkate, beste hautetsi eta zonaldeko hainbat asanbladetako kideekin bildu da, eremu horretako “premia larrienak” aztertzeko.

Pirinioetako ordezkariek Pozuetari adierazi diotenez, despopulazioa da kezka nagusia. “Premiazkoa da politika zehatzak abian jartzea, duela hamarkada batzuetatik Pirinioen inguruan izan den despopulazioari eraginkortasunez aurre egiteko”, salatu dute.

Ildo horretatik, Pozuetak balioa eman dio EH Bilduko talde parlamentarioak Espainiako Gobernuarekin negoziatu zuen 3 milioi euroko zuzenketari. Pozuetak zuzenketa horren “garrantzia” azpimarratu du, “Pirinioetan hainbat instalazio sortu eta hobetzeko balioko baitu”. “Funtsezko urratsa da zonaldea ekonomikoki suspertzeko neurriak abian jartzeko”, esan du Pozuetak. “Pirinioetako herriak despopulatzen ari dira, eta zahartze-tasa handia da. Hori dela eta, premiazkoa da egoera horri aurre egiteko eta herritarren bizitza duintzeko politikak zehaztea”.

Halaber, Pozuetak Pirinioetako ordezkarien “kezka” jaso du, “Nekazaritza Politika Erkidea berriaren baldintzen inguruan, atzerapauso bat suposatzen duen eredu espekulatiboa ekarri baitu”. Horri dagokionez, EH Bilduko diputatuak “sektorearekiko konpromisoa” eta “nekazaritzarako laguntza horiek modu bidezkoagoan eskuratzeko lan egiteko asmoa” adierazi du.

Bestalde, Pozuetarekin izandako bileran, Pirinioetako ordezkariek gaitzetsi egin dute foru Gobernuak berriki jakinarazi duen Batxilergoan sartzeko araudi berria. Kritikatu duten bezala, “inguruko gazteentzat beste oztopo bat da, Batxilergoko ikasketak D ereduan jarraitzeko eskubidea zailtzen dielako”. Hala, berriro ere, Pirinioetako Mahaiak egin bezala, “eskualdean Batxilergoko euskarazko eskaerari erantzungo dion institutua eraikitzeko beharra” aldarrikatu dute. Bien bitartean, balioan jarri dute “hala nahi duten ikasleei Nafarroako Gobernuak bermatzea euren ikasketak euskaraz jarraitu ahal izateko aukera”, gaurkoan Nafarroako Parlamentuan, EH Bilduk proposatuta, eztabaidatuko den mozioarekin bat etorriz.

Bel Pozuetak Pirinioetako hainbat herritako hautetsiekin egindako honako bilera Nafarroako hainbat eskualdetako ordezkariekin legegintzaldiko bigarren urtea dela-eta diputatua egiten ari den kontaktu-txandaren barruan kokatzen da. Hala, Pozuetak berretsi egin du “Nafarroako herritarren bizi-baldintzak hobetuko dituzten politika zehatzak eta eraginkorrak bultzatzen jarraitzeko konpromiso sendoa”.

EH Bilduko militantziak Nafarroako Koordinazio Talderako hautagaitza babestu du botoen %94ko baiezkoarekin

Miren Zabaleta Nafarroako arduradun politikoarekin batera, Unai Lako, Lola Eslava, Haritz Romeo eta Maddi Lasak osatzen dute herrialdeko zuzendaritza berria.

| 2021-06-05 13:17:00

Nafarroako Koordinazio Taldea aukeratzeko barne bozketak amaituta, EH Bilduko militantziak babes zabala eman dio Miren Zabaleta Telleriak, EH Bilduren bigarren kongresuan hautatu berri den Nafarroako arduradun politikoak, zuzendutako hautagaitzari. Hala, bilkideen %94,49ko babesarekin, Unai Lako Goñi, Politika Instituzionaleko arduraduna, Lola Eslava Serrano, Udal Politiken arduraduna, Haritz Romeo Galdeano, Antolakuntza arduraduna eta, Maddi Lasa Garcia, Komunikazio arduraduna, izango dira Zabaletarekin batera lurralde zuzendaritza berrian. Ezezko botoak %1,27 izan dira, eta boto zuriak jasotako botoen %4,24 izan dira. Aukeraketa honekin, EH Bildu Nafarroa aurrera doa Mahai Politikoaren osaketan, datozen lau urteetako jardun politikoak eta estrategikoak zehaztuko dituena. Barne-estatutuen arabera, mahai horretako partaile izango dira lurraldeko arduradun politikoarekin eta Koordinazio Taldearekin batera (Instituzio, Udal Politika, Antolakuntza eta Komunikazio arloetako arduradunek osatua), Nafarroako Parlamentuko eta Iruñeko Udaleko EH Bilduren bozeramaileak eta EH Bildu osatzen duten alderdi politiko bakoitzeko ordezkari bana (Nafarroaren kasuan, Sortu eta Eusko Alkartasuna). Prozesua ekainaren 12an amaituko da, 11:00etan Berriozarko Musika Eskolan egingo den ekitaldi politiko batekin. 

Landa-eremuetako ikasleei D ereduko Batxilergoa ikastea ahalbidetzeko eskatu du EH Bilduk

| 2021-06-04 12:43:00

EH Bildu Nafarroa talde parlamentarioak mozio bat erregistratu du foru Gobernua premiatuz “Nafarroako ikasle guztiek beren eskualdean D ereduko batxilergoa ikasteko duten eskubidearekin konpromisoa har dezan” eta, ildo horretatik, Hezkuntza Departamentuari eskatzen dio “behar diren neurriak hartzeko D ereduko Batxilergoa Tafallan eta Zangoza-Pirinioen inguruan bermatzeko, 2022ko aurrekontuen aurreproiektua egokituz”.

EH Bilduko bozeramaile Bakartxo Ruizek dagoeneko kritikatu duenez, onarpen-araudi berriak “Batxilergoko ikasketak euskaraz egiten jarraitu ahal izateko Tafallatik, Zangozatik edo Pirinioetatik Iruñera joan behar duten D ereduko ikasleekiko konparaziozko bidegabekeria eragingo du”.

Ildo horretatik, Ruizek jada eskatu zion Hezkuntza Departamentuari “bidegabeko egoera” horri irtenbidea emateko, baina deitoratu egin du kontseilariak “erantzun argirik ez ematea eta konponbiderik ez eskaintzea” joan den ostegunean Nafarroako Parlamentuan egindako osoko bilkuran. “Bere erantzuna iraingarria izan zen eta Departamentuaren jarrera, ikastetxeen eta familien kexen aurrean, benetan penagarria izaten ari da”, gaitzetsi du Ruizek.

Era berean, EH Bilduren bozeramaileak kritikatu du onarpen-araudiaren aldaketak “Nafarroako hainbat eskualdetako ikasleei eta haien familiai eragiten dien kaltea eta egoera bidegabea”.

Hori dela eta, EH Bilduk Hezkuntza Departamentuari eskatu dio “eremu horietako ikasleek sare publikoko D ereduko Batxilergoa beren eskualdean egiteko duten eskubidea gauzatzen ez den bitartean, beharrezko ekintza positiboko neurriak hartzeko, euskaraz ikasten jarraitzeko ahalegin berezia egin behar duten ikasle horien salbuespenezko egoerei eta irisgarritasun-beharrei erantzuteko”.

Halaber, EH Bilduren mozioak Hezkuntzari eskatzen dio “Iturramako Institutuan bi ikasgela ixteko erabakia zuzentzeko eta landa-eremuetako ikasleentzat beharrezkoak diren plazak bermatzeko, hala nahi badute eta beste ikastetxeetara iristeko arazoak badituzte”. Azkenik, eskatzen du “Iruñerritik kanpoko ikasleak ez diskriminatzeko, Arte Eszenikoen eta Arte Plastikoen Batxilergoko erreferentzia-zentroei dagokienez hurbiltasun-irizpidearen arabera, Nafarroako ikasle guztientzako aukera-berdintasuna bermatuz”.

EH Bilduk datorren ostegunean, ekainak 10, defendatuko du mozio hau Nafarroako Parlamentuan, eta aurrera egitea espero du, “ikasle horiek diskriminaziorik jasan ez dezaten”.

Nafarroako EH Bilduko Koordinazio Talderako hautagaitza aurkeztu da

Miren Zabaleta Nafarroako arduradun politikoarekin batera, Kongresuan aukeratu zena, Unai Lako, Lola Eslava, Haritz Romeo eta Maddi Lasak osatuko lukete lan taldea.

| 2021-05-28 14:20:00

EH Bildu Nafarroa aurrera doa Mahai Politikoaren osaketan, datozen lau urteetan alderdiak lurraldean izango dituen ildo politiko eta estrategikoak zehaztuko dituena. Koalizioak egin berri duen bigarren Kongresuaren barruan Miren Zabaleta Telleria Nafarroako arduradun politiko izendatu ostean, orain Koordinazio Taldea osatu behar da. Hautagaitza bakar bat aurkeztu da horretarako, erantzukizuneko lau postuz osatutakoa: Unai Lako Goñi, Politika Instituzionaleko arduraduna; Lola Eslava Serrano, Udal Politiken arduraduna; Haritz Romeo Galdeano, Antolakuntza arduraduna eta, Maddi Lasa Garcia, Komunikazio arduraduna. Plantxa horien bozketa ekainaren 4an eta 5ean egingo da, EH Bilduren plataforma telematikoaren bidez. Aldi berean, prestakuntzak abian dira udalerri bakoitza ordezkatuko duten pertsonak hautatzeko, baita Iruñearen koordinaziorako ere. Prozesua ekainaren 12an amaituko da, 11: 00etan Berriozarko Musika Eskolan egingo den ekitaldi politiko batekin. Barne estatutuen arabera, lurraldeko arduradun politikoarekin eta Koordinazio Taldearekin (Instituzio, Udal Politika, Antolakuntza eta Komunikazio arloetako arduradunek osatua) batera Mahai Politikoa osatuko da Nafarroako Parlamentuko eta Iruñeko Udaleko EH Bilduren bozeramaileekin eta EH Bildu osatzen duten alderdi politiko bakoitzeko ordezkari banarekin (Nafarroaren kasuan, Sortu eta Eusko Alkartasuna).

Batxilergorako onartzeko araudiak D ereduko ikasleengan eragiten duen bidegabekeria kritikatu du EH Bilduk

| 2021-05-26 11:05:00

EH Bildu Nafarroa talde parlamentarioak Carlos Gimeno Hezkuntza kontseilariari zuzendutako galdera bat erregistratu du, “2021-2022 ikasturterako onarpen-prozesuaren araudi berriak Nafarroako hainbat eskualdetako D ereduko ikasleei sortzen dizkien arazoak eta bidegabekeriak nola konponduko dituen jakiteko”.

Bakartxo Ruiz Hezkuntza Batzordean EH Bilduko bozeramaileak nabarmendu duenez, “Tafallatik, Zangozatik edo Pirinioetatik (Garralda, Erronkaritik eta Otsagabiatik) Iruñera joan behar duten D ereduko ikasleek konparaziozko bidegabekeria pairatuko dute, onarpen-prozesu berriaren eraginez”.

Ruizek ohar batean azaldu duenez, “ikasketak euskaraz egiten dituzten Tafallako eta Zangozako ikasleen kasuan, orain arte Batxilergoa egiteko puntuak lortzeko aukera zuten Iturrama institutuan, bertarainoko irisgarritasuna lineako autobusaren bidez bermatuta baitzuten”. Hala ere, ohartarazi du “ikasle horiek ez dutela atxikitako zentrorik hurbileneko ikastetxeetan, Iruñerrian”, eta, gainera, gaitzetsi du “araudi berriarekin, Iruñeko ikastetxeen eragin-eremuetan agertzen ez direnez, 0 puntu lortuko dutela eta, beraz, haien aurretik geratuko direla Iruñerriko ikasle guztiak, 4 edo 3 puntu lortuko dutenak, nahiz eta azken horiek beste ikastetxe bat bermatuta izan”.

Pirinioetako ikasleei dagokienez, Ruizek nabarmendu duenez, “orain arte aukera zuten izena ematen zuten ikastetxearen helbidea ikaslearen helbide gisa jartzeko, baina eskola-mapa berriak institutu atxiki bakarra izatea eragiten du, eta ezinen dute ikastetxea irisgarritasunaren arabera aukeratu”.

Era berean, Ruizek kritikatu du “beste disfuntzio batzuk ere agerian jarri direla araudi berri honekin, Arte Batxilergoan, esaterako”. “Nafarroan ikastetxe bakar batek eskaintzen du Arte Plastikoetako Batxilergoa D ereduan, Iturramako Institutuak hain zuzen, eta, orain arte, Nafarroa osoko ikasleei baimena ematen zitzaien ikastetxeko helbidea ikaslearen helbide gisa ager zedin, eta, beraz, guztiek aukera berberak zituzten onarpen-prozesuan; baina hemendik aurrera ez da horrelakorik gertatuko”, azaldu du. Eta gaineratu du “gauza bera gertatzen dela Barañaingo Alaitz Institutuko D ereduko Arte Eszenikoen Batxilergoarekin”. “Bi kasuetan, Iruñerritik kanpoko ikasleek 0 puntu izanen dute, eta Iruñerrikoek, aldiz, 3 puntu eta hori konparaziozko bidegabekeria larri bat da”, kritikatu du Ruizek.

Horregatik guztiagatik, Departamentuari irtenbide bat eskatu dio ikasle horiek diskriminaziorik jasan ez dezaten.